| Еуфемия Гарди | |
|---|---|
| Народзена | 21. септембра 1945. |
| Умарла | 28. мая 2001 (56) |
| Державянство | югославянске, сербске |
| Язик творох | руски, словацки |
| Школа | Учительска школа, Сримски Карловци |
| Висша школа | Висша педаґоґийна школа, Нови Сад |
| Период твореня | 1968—2001. |
| Жанри | просвита, подобова уметносц |
| Похована | Братислава, Ружиновски теметов, Словацка |
Еуфемия Гарди (*21. септембер 1945—†28. май 2001), подобови уметнїк, педаґоґ.
Биоґрафия
Еуфемия Гудак ше народзела 21. септембра 1945. року у Руским Керестуре. Оцец Йовґен и мац Єлисавета (Ержа) нар. Надь. Еуфемия мала ище два шестри, Магдалену и Марию и брата Емила. Основну школу Еуфемия закончела у Руским Керестуре. Потим ше уписала до Учительскей школи у Сримских Карловцох и закончела ю. Висшу педаґоґийну школу закончела 1968. року у Новим Садзе. Истого року почала робиц як подобови педаґоґ у Руским Керестуре, потим прешла на исту роботу до Ковачици дзе робела по 1989. рок.
Еуфемия Гудак ше повинчала зоз Владимиром Гардийом, у малженстве мали дзивку Ванесу.
У перших двох деценийох педаґоґийней роботи Еуфемия Гарди мала векше число виставох по наших местох у Войводини. Основни єй мотиви теди були ровнїна и салаши хтори єй були окремна инспирация.
Творчи период у Словацкей
Од 1991. року Еуфемия Гарди жила и робела у Братислави дзе єй дзивка Ванеса студирала на Подобовей академиї. Теди почала и єй нова животна фаза хтора ше одражела и на способ єй мальованя. Єй малюнки були крашнє прияти и живот и творча робота у Братислави єй отворели дзвери до швета уметносци. Еуфемия здобула статус шлєбодного уметнїка а малюнки ше єй нашли на виставох и у ґалерийох нє лєм у Словацкей алє участвовала на самостойних и колективних виставох у Французкей, Нємецкей и Австриї. Була член Союзу подобових уметнїкох Словацкей.
Евфемия Гарди ше фахово усовершовала у рамикох студийного пребуваня у Паризу. Участвовала на Бардейовским пленару.
Самостойни вистави мала у Руским Керестуре, Ковачици, Новим Садзе, Братислави, Бечу, Баньскей Бистрици, Пештанох.
Колективни вистави мала у Ковачици, Новим Садзе, Беоґрадзе, Панчеве, Бардейове, Братислави, Паризу, Мартину, Тренчину и Бечу.
Еуфемия Гарди умарла у Братислави (Словацка) 28. мая 2001. року. Похована є на братиславским Ружиновским теметове.
На чесц Еуфемиї Гарди Руска матка установела подобову колонию Еуфемиї Гарди 2018. року.
Ґалерия
Литература
Подобова творчосц Руснацох: Евфемия Гарди, подобови уметнїк, педаґоґ - Дружтво за руски язик, литературу и културу, Нови Сад, 2003, б. 39.
Референци
Ин мемориам у новинох Руске слово, чис. ?, юний 2001. року.