Владимир Мученски (*26. фебруар 1933. - †13. юний 2022.), длугорочни секретар у ОШ "Петро Кузмяк", алє и познати музични виртуоз на гармоники и шеф оркестра "Сивґамуриз".
| Владимир Мученски | |
|---|---|
| Народзени | 26. фебруара 1933. |
| Умар | 13. юния 2022. (90) |
| Державянство | югославянске, сербске |
| Школа | |
| Период твореня | 1952-1992 |
| Жанри | школска администрация, музика |
| Поховани | у Руским Керестуре |
Биоґрафия edit
Владимир Мученски народзени 26. фебруара 1933. року у Руским Керестуре. Мац Иля, дзивоцке Семанова, и оцец Янко Мученски, мали штверо дзеци: дзивки Феброну и Гелену, та синох Янка и Владимира. Основну школу Владимир Мученски закончел у родним валалє, потим закончел и нїзши класи ґимназиї по руски.
Його оцец Янко грал, бул музично образовани и любел музику, та жадал же би му и синове були музичаре. Обидвоме мали добре розвити слух. Старши син Янко почал музичне образованє а вец пришол шор и на Владимира. Обидвоме браца грали дома на гармуникох а вежбали и на виолинох. До приватней школи клавира ходзели до Кули. Док ше други дзеци на драже бавели у Мученскових капурка була замкнута и обидвоме хлапци мушели вежбац. Оцец их наганял вежбац, ридко кеди ше им удало дакус ше побавиц зоз пайташами. Таки стаємни и длуготирваци вежби допринєсли же би вони обидвоме постали одлични инструменталисти.
Владимир Мученски по законченю нїзшей ґимназиї пошол до Опатиї у Горватскей дзе робел як службенїк у банки, а вноци грал у готелским бару. Солфедьо (наука о шпиваню) Владимир закончел у Риєки. Його перфектна музична рутина, схопносц, и власна гармоника му преправели вшадзи драгу. Под час пребуваня у Опатиї Владимир призберовал нотни кнїжочки популарней забавней музики хтори принєсол до Руского Керестура дзе ше врацел бо мал исц до войска.
Роки 1954 - 55 Владимир препровадзел у войску.
По врацаню з войска Владимир Мученски кратши час робел у општини у Руским Керестуре, вец прешол до Кули дзе робел у општини, у дїловоднїку, алє нєодлуга потим почал знова робиц у Руским Керестуре, як секретар у Основней школи "Петро Кузмяк".
Владимир Мученски ше оженєл зоз Ирину родз. Дудаш.
Музична кариєра edit
Владимир Мученски бул, на своєй гармоники, найлєпши инструменталиста у Руским Керестуре, та и вельо ширше. Його безпрекорне гранє му принєсло моцни авторитет и прето ше коло нього призберовали вецей млади музичаре хтори жадали направиц викрок у музичним живоце младих Руснацох, хтори почитовали дотедишню руску музичну традицию алє сцели ступиц и на нови драги у музики хтори сучасносц приношела. Джез теди бул моцни у виразу, оркестерска музика пановала такповесц у цалим швеце.
Бул то час кед Владимир Мученски формовали ансамбл "Сивґамуриз". Мено оркестра "Сивґамуриз" составене з часцох презвискох його членох (СИВч, ҐАднянски, МУченски, РИЗнич). Окрем Владу, у оркестру стаємно грали Яким Сивч, Мирко Ґаднянски и Павле Ризнич. Дзекуюци нотним кнїжочком хтори Владимир принєсол зоз Опатиї члени составу "Сивґамуриз" увежбовали и збогацовали свой репертоар. А то бул репертоар з теди найновшима забавнима композициї дзечнє слухани у цалим швеце. Влєце на лєтнєй бини у теди популарней "Желєней загради" спомнути музичаре през дзень увежбовали композициї а вечар заграли младим Керестурцом на такволаних явних пробох.
Кед посцигли одредзени квалитетни уровень вони, як оркестер, стаємно грали на танцох валалскей младежи. Соботу и внєдзелю бул танєц у "Желєней загради" або у Младежскей сали кед бул диждж и оркестер "Сивґамуриз" грал. Цалу другу половку 50-тих рокох вони наступали под тим меном як музични оркестер. Виртуозне музициранє Владимира Мученския и його оркестра "Сивґамуриз" виховало нови ґенерациї младих у валалє, преширело музични видики даскелїх ґенерацийох рускей младежи, и на традицийох того оркестра познєйше наставали, у рижних вариянтох, состави и ґрупи як цо то були Вельки младежски оркестер, потим "Шкорванчки", а на єден способ и рок групи як цо "Канонади", "Ореоли" и други.
У цеку 1962. року члени ансамбла були часц ґрупи младих хтори потримали идею и потим основали "Червену ружу". Яким Сивч, иншак єден з єй иницияторох и "кум" назви забавного вечара "Червена ружа", вєдно з Мученскийом позберали и за наступ пририхтали шицких шпивачох. Ґу тому их и провадзели з Вельким оркестром, Сивч на гармоники, а Мученски на клавире. З Вельким оркестром вони познєйше освоєли и значни награди звонка Руского Керестура.
И на идуцих двох "Червених ружох" Владимир Мученски и його товарише з Велького оркестру одграли комплетну програму фестивала. Вони були найлєпши оркестер у валалє, барз увежбани и з барз солидним уровньом квалитету за тедишнї час.
Музичну кариєру Владимир Мученски, уж як оженєти, предлужел у Оркестри Дома култури дзе велї роки наступал з "Кирданцами". Мученски виховал и велї ґенерациї младих гармоникашох, цо у першим оддзелєню Музичней школи вєдно з Якимом Сивчом, цо на приватних годзинох.
Владимир Мученски робел як секретар у Основней школи "Петро Кузмяк" у Руским Керестуре полни 35 роки. За тоту роботу го вязали найкрасши памятки, робел у колективе з добрима людзми, почитовали ше шицки, помагали ше и водзели школу напредок.
Владимир Мученски умар 13. юния 2022. року. Поховани є на теметове у Руским Керестуре.
Ґалерия edit
-
Члени администрациї и техїчного отримованя ОЦ Петро Кузмяк, Владо Мученски шедзи треци з лїва -
З лїва: Терезка, Янко зоз супругу Славку, Миронь зоз супругу Мелану, Владимир и Ирина Мученски, Ана Шедза: Мария, Геленка, мац Єлена з унуком, унук, оцец Дюра з унуком, Сенка з мужом
Литература edit
Вонкашнї вязи edit
Гавриїл Колєсар, Чловек хторого гармоника слухала, Владимир Мученски, дакедишнї музични виртуоз, Studia Ruthenica, Дружтво за руски язик, литературу и културу, ч. 20, 2015, б. 176.
Умар Владимир Мученски (1933-2022), М. Афич, Рутенпрес, 14. юний 2022.