ကာလသားရောဂါရေ များရေအားဖြင့် မေထုန်မှီဝဲရာမှ စပနာဖြစ်ပေါ်လာရေ ကူးစက်တတ်သည့်ရောဂါ ဖြစ်ရေ။ ကာလသားရောဂါ အမျိုးမျိုး အစားစား ဟိသည့်အနက် အရီးတကြီး ကာကွယ်တားဆီးရမည့် ရောဂါတိမှာ ဆစ်ဖလစ်နန့် ဂိုနိုညောင်းကျ ရောဂါရို့ဖြစ်ရေ။
ဆစ်ဖလစ်ရောဂါ ဖြစ်ရခြင်းမှာ စပိုင်ရိုခီပိုးကြောင့် ဖြစ်ရေ။ ယင်းပိုးရေ အရေပြား၊ သို့မဟုတ် ကျိချွဲမြှေးတိ ပွန်းပဲ့ရာမှ လူ့ခန္ဓာကိုယ် အတွင်းသို့ ဝင်ရေ။ မေထုန်မှီဝဲခိုက်တွင် အတိဆုံး ကူးစက် ဝင်ရောက်တတ်ရေ။ ရောဂါဟိသူကို နှုတ်ခမ်းချင်း စုတ်မိရေကြောင့်၎င်း၊ ယင်းရို့သုံးထားသည့် ပန်းကန် ခွက်ယောက်၊ မျက်နှာသုတ် ပဝါ စသည့် အသုံးအဆောင်ပစ္စည်းကို သုံးစွဲမိရေကြောင့်၎င်း ဆစ်ဖလစ်ရောဂါ ကူးစက်တတ်သိမ်းရေ။
ဆစ်ဖလစ်ရောဂါ ကြာရှည်စွာ ဖြစ်ခကေ အာခေါင်ရိုးပေါက်ခြင်း၊ အရီး သို့မဟုတ် အရေပြားပေါ်၌ အနာဆိုးတိ ပေါက်ခြင်း၊ နှာခေါင်းရိုး ကျိုးလားခြင်းတိ ဖြစ်တတ်ပြီး ဦးနှောက်၊ သွေးကြော၊ နှလုံးနန့် ဗဟိုအာရုံကြောစုရို့ကို ထိခိုက် ပျက်စီးစေတတ်ရေ။ ဝမ်းတွင်းပါ ဆစ်ဖလစ်ရောဂါရေ ရောဂါသျှင် မိခင်ထံမှ ပဋိသန္ဓေသားသို့ ကူးစက်ခြင်း ဖြစ်ရေ။ သန္ဓေဟိစက ကူးစက်ခကေ သန္ဓေပျက်ပြီး သားလီျှာတတ်ရေ။ ဆစ်ဖလစ်ရောဂါကို ကုသရာ၌ ခန္ဓာကိုယ်ထဲဟိ စပိုင်ရိုခိပိုးတိကို ပဋိဇီဝဆီးတိသုံးပနာ သုတ်သင် သျှင်းလင်းပစ်ရရေ။ ထိုကိစ္စအတွက် ပင်နီဆီလင် ဆီးတိကို အသုံးတိရေ။
ဂိုနိုရီယာခေါ် ဂိုနိုညောင်းကျနာမှာမူ ဂိုနိုကော့ကတ်ပိုးကြောင့် ဖြစ်ရေ။ ဤရောဂါရေ အင်္ဂါဇာတ်နန့် အင်္ဂါဇာတ်အနီးဟိ အင်္ဂါအစိတ်အပိုင်းတိနန့်သာ သက်ဆိုင်သည့် ရောဂါမျိုးဖြစ်ရေ။ ဂိုနိုညောင်းကျနာရေ တာရှည်လာရေအခါ ခန္ဓာကိုယ်တစ်ခုလုံးသို့ ပျံ့နှံ့လားပြီး အဆစ်အမြစ်ရောင်ခြင်း၊ နှလုံးသားတိရောင်ခြင်း စသည်ရို့ကို ဖြစ်ပေါ်စေနိုင်ရေ။ ဂိုနိုညောင်းကျရောဂါဟိရေ မိခင်တိမှမွေးသည့် မွေးကင်းစ ကလီးတိရေ ဂိုနိုရီယားပိုးကြောင့် မျက်စိကန်းတတ်ရေ။ ကလီးတိကို မျက်စိကန်းခြင်းမှ ကာကွယ်နိုင်ရန် ဆီလဗာနိုက်တြိတ်ခေါ် မျက်စဉ်းတစ်မျိုးကို မွေးကေမွေးချင်း ခတ်ပီးလီ့ဟိရေ။ ဂိုနိုညောင်းကျနာကိုကုသရာ၌ ဆာလဖာဆီးနန့် ပင်နီဆီလင်ဆီးတိကို သုံးကတ်ရေ။
ကာလသားရောဂါရေ မျိုးပွားအင်္ဂါတိကို အန္တရာယ်ကြီးစွာ ပီးတတ်ရေကြောင့် မျိုးဖျက်ရန်သူဟူပနာပင် ခေါ်စမှတ်ပြုကတ်ရေ။ ဤကဲ့သို့လူမျိုးပြုန်းတီးစေရေ ရောဂါဆိုးမှ ကာကွယ်ရန် အကောင်းဆုံး နည်းလမ်းမှာမိမိ ခင်ပွန်းနန့် ဇနီး မှတပါး မေထုန်မှီဝဲခြင်းကို ရှောင်ကြဉ်ရန်ပင် ဖြစ်ရေ။