Fernando Daquilema (1845? - 8 ayriwa killapi 1872 watapi) shuk kichwa pushakmi karka, payka Chimborazo markamantami karka. 18 kapak killapi 1871 watapi, Gabriel García Moreno pushakka, mamallakta pushak kashpaka, Chimborazo markaman diezmosta hapinkapak supay runakunatami kacharka. Mana yankamanta diezmoskunata karankapakka, Daquilema pushakka mashikunawan (Bruno Valdés, Nicolás Aguagallo Turunchi, Miguel Pilamunga) Cacha pampapi katarirka, 3.000 runakunata tantachirka, chay runakunawan Yaruqui llaktata hapinata munarka, shinapash 19 kapak killapi 1871 watapi mishu awkakkunaka paykunata kutin urkuman kacharka, shinapash Sicalpa llaktata hapirka. Kipaka, Morocho llaktapi, Cajabampa llaktapipash sinchi sinchi makanakuykunaka tiyarka, mishukunaka runakunawan makanakurka, kari, warmipash wanchishkami karka. 21 kapak killapi 1871 watapi Daquilemapa awkakkunaka Punín llaktata hapirka, chaypi Daquilema mashikunawan wasikunata iglesiatapashmi rupachirka. Paykunaka sinchi awkakkunami karka, puka wipalakunawan purirka.
Kipaka, mana yachanchikchu imamanta karka, chay katariyka ñami tukurirka, mishu awkakkunaka Daquilema pushakta paypa wasi kuchupi hapirka, payta wichkana wasipi churarka. 23 pawkar killapi 1872 watapi, paypak juicioka kallarirka, apukkunaka payta katarishkamanta, wasikunata rupashkamanta wañunami kan nirka, chaymanta 8 ayriwa killapi 1872 watapi, Yaruqui llaktapi, mishukunaka payta balaskunawan wanchirka, payka ñami wañuna pirkapi kashpaka paypa runa mashikunaman Kichwa shimipi rimarka, balaskunalla payta upachirka. Kunan pachapi, payka ashtawan yuyashkami kan, sinchi runa pushakmi karka, runapak hayñikunaman makarka, diezmoskunata tukurichinkapapash makarka[1] [2].
5 ayar killapi 2010 watapi, mamallaktapa tantanakuyka (Asambleaka) Fernando Daquilemata, paypak warmi Manuela León pushaktapash Héroes nacionales nishka tukuchirka, paykunaka nirka Daquilemaka Manuela León wan shunkuwan sinchi ayllu runakuna hayñikunata charinkapak makarka, chaymanta kunankaman yuyashkami kan[3].
Ashtawan yachakunkapak edit
Kaypipash rikupay edit
Maymanta surkushka edit
- ↑ FERNANDO DAQUILEMA, Rodolfo Pérez Pimentel, Diccionario biográfico del Ecuador,
- ↑ DAQUILEMA, EL GRAN DAQUILEMA, Valerian Goncharov, 1979
- ↑ FERNANDO DAQUILEMA Y MANUELA LEON HÉROES NACIONALES, culturaenecuador.org