Miak Nawataketzat kishmatit ne cuentoj ipal ne Nanawatzin wan ne iechkawan. Sejse nusan kinnutzat Ne Tepewa [1] Inat ka yejemet welit wey: wetzi ne at kwak yejemet kinekit, wan yejemet kiajsiket ne sinti. Seuseujti mupalewiat, seuseujti musumat. Ne Nanawatzin ne mas chikitik wan kimati wey; ne sejseuk melemet. Te kipiat innan nian inteku; takatket ijtik se wajkal wan kinhiskalijket se lamajtzin. Ne pipilmet yawit katka ka kojtan tapewiat wan kalwikat takwal ka inchan. Ne innoya kipiatuya se iawil, wan kinshijshikua ne pipilmet: kimaka katka ne nakat ne iawil wan te kintakwaltia katka ne pipilmet. Ne Nanawatzin kishketzki wan kinhilwij ne iechkawan, wan se tunal kimiktijket ne ishulejyu ne innoya. Nusan kimiktijket ne noya wan yajket.
|
Ne Tepewa welit kisajsaka at ijtik se matat. Kianat ne at ipal ne ajapan tik imajmataw wan kiwikat ka ikajku. Sejse matat kipiat kujkuyuntuk chikitik wan wetzi talchi chiupi at; sejse matat kipiat kujkuntuk wey wan wetzi wey at. Ijkiuni yejemet kichiwat ne shupan wan ne tunalku: tik ne tunalku ne ajapan kipiat chiupi at ika yejemet kiwikat yawit muchi ka ikajku.
Se tunal kitaket se tutut kipiatuya chiupi sinti. Pal kimatit kanka witz ne sinti, yajket iipan ne tutut wan kiajsiket kan nemituya wey sinti ijtik ne tepet. Kinekituyat kishtiat ne sinti pal kikwat wan te welituyat; ne Nanawatzin kipalewijket wan kishtijket. Yajket iwan wey sinti, sejse ka ukse ladoj. Ne sejseuk kikwajket ne sinti wan kwak tamik mayanat; ne Nanawatzin inte, yaja kitukak ne isin itan tal wan kipishki wey sinti. Ne iechkawan kitaket wan ajsiket kichtekit ne isin ne chimpe. Kikwajket senpa wan te kipiatuyat, sema ne Nanawatzin kipiatuya ika yaja tatuka. Kinhajwak ne iechkawan; kintakulij sinti senpa, wan kinhilwij ma kitukakan pal kipia ukchiupi, ika yaja tea keman yawi kintakulia.
References edit
- ↑ Leonhard Schultze Jena, Mythen in der Muttersprache der Pipil von Izalco in El Salvador, 1935.