Wp/mfb/Masakan Bangka

< Wp‎ | mfb
Wp > mfb > Masakan Bangka

Masakan Bangka adalah masakan yang dimasak kek resep-resep Orang Bangka. Masakan Bangka to ken dak banyak jenis e, karene jenis e ade masakan Orang Melayu ade puli masakan Orang Cin.

Lempah Daret
Lempah Kuning

Masakan Bangka ne dimasak dari bahan-bahan yang seger dari laut kek ladang. Orang Bangka makanan pukok e nasi. Die orang men di kampung-kampung pakai tangan makan e. Orang Bangka kate e saro men dak makan nasi sehari. Tapi karene padi dak pacak ditanem di Bangka, harus ngimpor dari daerah lain kayak Sumatera Selatan ape Pulau Jawe.

Laut di Bangka ne ade 4 sisi, tu lah yang nyebabken banyak nian hasil laut di Bangka ne banyak minta ampun. Orang Bangka to asak makan ikan harus yang seger-seger. Die orang la tau mane ikan bagus mane ikan dak bagus asak mile ikan. Masakan yang dimasak e antara lain yang banyak dikenal lempah kek rusip. Lempah ne banyak jenis e, mulai dari lempah daret yang isi e sayur mayur tambah terasi, sude to ade puli lempa nanas yang dimasak pakai ikan tenggiri seger. Orang Bangka to paling suka lah makan pedes. Men muet sambel cabik e ken dak banyak ditumbuk e. Tulah jenis sambel Bangka to banyak, kayak sambel bawang, sambel petai, sambel terasi, kek sambel cabik kecit.

Rendang Bangka beda kek rendang dari daerah lain. Rendang Bangka dak asin rase e tapi pedes nian. Selain tu, ade rusip kek terasi. Rusip to adalah ikan bilis yang diasinken, sedangken terasi ape belacan dibuet dari fermentasi udang paling seger, dak kayak terasi di Jakarta, banyak bulak orang. Orang Bangka to paling banggalah ke belacan die orang.

Seku e, dimane-mane orang ge tau Bangka to nyamen kemplang e. Mimang karene kemplang Bangka to dibuet pakai ikan kek udang yang paling seger. Kota Belinyu to paling dikenal kek kemplang kek kerupuk paling nyamen.

Empek-empek ge ade, tapi agak beda kek Palembang. Empek-empek Bangka banyak e dibuet pakai ikan laut, men Palembang ken muet e pakai ikan sungai. Empek-empek Bangka to jenis e ade banyak, ade yang rebus, gureng, enjan kek empiang. Empek-empek Bangka to malah sambel e yang buet die makin enak. Sambel e pedes nian rase e, ade yang dari terasi ade pulik yang dari taucong.

Orang Cin ge banyak muet jenis masakan. Masakan die orang beda kek masakan orang Melayu. Die orang ngenalken Mie, Teucong, Teufusui, Kicap asin, tahu kek Pantiau (kwetiau). Ade ge kue Hoklopan yang la tekenal seluruh Indonesia to, die orang yang merantau ke luar Bangka lah yang ngenalken e. Di Bangka orang Cin mikin pabrik tahu kek pabrik kicap asin. Kicap asin Bangka asal Sungailiat Cap Gajah to la dipakai dimane-mane di Bangka.