Sungailiat ialah kota yang letak e di Pulau Bangka. Kota ni ge merupaken ibukota kabupaten Bangka. Orang yang tinggel di sini ade 70.959 orang, dak cukup banyak la tapi paling padet to ade di kawasan pusat kota di Jalan Muhidin. Kawasan ne ge dinamekan daerah Pasar karene banyak pusat bisnis kek belanje. Di luar kota ne banyak e agik daerah kampung-kampung kek kebon-kebon. Kota Sungailiat ne la berape kali dapet penghargaan kota Adipura karena jalan-jalan e selalu berseh dari sampah.
Sejarah edit
Kota ne sejarah e didirikan pada tahun 1830-an. Samelah ke daerah Bangka yang lain, awal e di sini orang asli e Orang Melayu, tapi menjelang taon 1800-an to banyak Orang Cin datang dari Propinsi Kwangtung di Tiongkok sanen dibawa kek Belande jadi tukang nambang timah yang banyak di dalem tanah Bangka to. Die orang ne ngumong pakai Bahasa Hakka ape Thongboy sebutan e. Di Sungailiat ne lah konsentrasi Orang Cin yang paling besak di Bangka. Lame-lame Orang Cin di Sungailiat dak nambang timah agik kek dak pulang agik ke Tiongkok sanen. Die orang la betah tinggel di Sungailiat seakan-akan nganggep tempet ne la jadi kampung halaman diwek. Die orang ne idup betetangga lame ke orang Melayu bahkan ade yang kawin ke orang Melayu sehingga due kok suku ne saling rukun, dak pernah ade cek-cok. Bahkan name kota Sungailiat ne diambik dari sebutan orang Cin kek kota ne yaitu Liat-Kong.
Tempet wisata edit
Sungailiat ne adalah kota paling besak kedue di Pulau Bangka sudeh kota Pangkalpinang. Di kota ne ade tempet jalan-jalan yang bagus, terutama pantai-pantai termasuk yang paling bagus di Bangka, kayak Pantai Matras, Pantai Parai Tenggiri, Pantai Batu Bedaon, Pantai Teluk Uber, Pantai Tanjung Pesona. Ciri kas e pantai di Sungailiat ne batu e besak-besak, pasir e puteh, aik laot e biru jening.