Vienan Virta on kanšalaisjärještö, kumpani toimiu Louhen piirin Piäjärven kyläššä. Järještön toiminta on šuunnattu karjalan kielen ta karjalaisen kulttuurin šäilyttämiseh ta kehittämiseh Karjalan tašavallan pohjoispiirissä.
Vienan Virta –kanšalaisjärještön jäšeninä ollah innoštunuot henkilöt – ihmiset, kumpaset on kiinnoššuttu oman elinpaikan – Karjalan – istorijašta ta kulttuurista; ihmiset, kumpaset muissetah omat juureh ta kunnivoitetah esituattojen perintehie; ihmiset, kumpaset on šynnytty tiälä ta ne, ket on tultu tänne elämäh Venäjän eri perukoista ta pietäh Karjalua omana kotimuana.
Vienan Virran jäšenien tärkeimpie ajatukšie ollah:
- Myö muissamma omua kieltä – karjalan kieltä, kumpaista meilä lapšuošša puajittih miän ämmöt ta kumpasella juoruttih nuapuriakkaset luavičoilla. - Myö tiijämmä miän perehien istorijua ta olemma kuullun kertomukšie hylätyistä kylistä ta jätetyistä taloista, Šuurešta Šovašta ta kauheista vainoista. - Myö šuvaičemma omua meččäšeutuo ta pyrimmä šäilyttämäh šitä puhtahuošša miän lapšilla varoin. - Myö ruamma, opaššumma, harraššamma bisnessie. - Myö rakennamma taloja, kašvatamma lapšie ta punukkoja, kalaššamma, keryämmä marjua ta šientä. - Myö, tavalliset ihmiset, yritämmä muuttua miän elämyä paremmakši ta meitä ympäröivyä muajilmua hyväntahtosemmakši.
Vienan Virran alottehešta Piäjärven kyläššä toimiu Etnokulttuurini keškuš "Karjalaini Pirtti". Vuosina 2011 ta 2016 oli pietty Talkoja Tuhkapatunalla.