Wp/krl/Arhippaini Miihkali

Arhippaini Miihkali ili Miihkali Perttunen (1815 — 3. šyyškuuta 1899) oli tunnettu vienankarjalaini runonlaulaja.

Arhippaini Miihkali, Vienan Karjalan šuurimman runonlaulajan Arhippa Perttusen poika, oli šyntyn kirikönkirjojen mukah Valtasenvuaran Arhipan talošša, Latvajärven kyläššä, Vuokkiniemen piirissä vuotena 1815. Ei ole tarkkah šelvitetty, mi oli hänen tovellini šynnyntäaika, koška perintehellisen tavan mukah lapšella šuatettih ilmottua viärä šynnyntäaika verotukšellisista šyistä.

Miihkali oli šokie, šentäh häntä kučuttih Šokie-Miihkaliksi. Häntä laulatettih äijät ristikanšat — šekä runonkeryäjät jotta matkamiehet. Šanottih, jotta Miihkali mielelläh pajatti jokahisella kuuntelijalla.

Miihkalin akan Palakan sisär Okahvie Mäkeläini oli niise hyvä runonlaulaja, ta Miihkalilta runontaito šiirty Anni Tenisovalla. Onnakko niken Miihkalin omista lapšista ei taituo perinyn.

Joensuun Ilosaarešša, Karjalantalon ieššä on vuotena 1973 pissytetty Miihkali Arhippaisen statuja, kumpasen on veštän Alpo Sailo I.K.Inhan fotokuvan pohjalta. Vuotena 1991 Arhippa Perttusen fonda pissytti Vuokkiniemeh aijemman statujan kopien.