Juoruheinä ili venymäheinä (Linnaea borealis) on kuušainkašvien heimoh kuuluja ainavihrie varpa. Šen korkevuš on 5-15 senttimetrie, ka pituhuš voi olla jopa yli 1 metri. Varši on rento ta luikerehtau šammalen pinnalla. Juoruheinä muuvvoštau mattomaisie kašvuštoja. Lehet ollah pyöriet. Kukka on hento, kellomaini ta haisou liijatenki yöaikah. Juoruheinä kukkiu kešäkuušta heinäkuuh.
Juoruheinä kašvau kylmäššä ilmaštošša. Enin šitä on yli šatavuotisešša mečäššä, onnakko še kašvau kaikkiella, missä on havupuita. Venäjällä juoruheinyä on ennein käytetty seľľakašvina.
Juoruheinä oli "kašvitiijon isän" Carl von Linnén hyvikkikašvi, ta šen tietehellini nimi tulou Linnén šukunimeštä. Lajinimi borealis tarkottau pohjasešša kašvavua.