Wp/jax/Provinsi Jambi

Jambi

Lambang Jambi
Moto: "Sepucuk Jambi Sembilan Lurah"
Peta lokasi Jambi
Koordinat	2º 45' - 0º 45' LS 101º 0' - 104º 55' BT
Dasar hukum	UU No. 61 tahun 1958
Hari jadi	25 Juni 1958
Ibu kota	Kota Jambi
Gubernur	Dr. Hari Nurcahya Murni, M.Si (Pj)
Luas	50160.05 km²
Penduduk	3624579
Kepadatan	72.26
Kabupaten	9
Kota	2
Kecamatan	141
Kelurahan	163
Suku	Jambi, Kerinci, Anak Dalam, Batin, Kubu, Jawa, Melayu, Minangkabau, Batak, Banjar, Bugis, Sunda, Tionghoa
Agamo	Islam 94,27% Protestan 2,90% Katolik 1,30% Buddha 1,29% Konghucu 0,18% Hindu 0,08%
Baso	Baso Jambi, Baso Minangkabau, Baso Kerinci
Zona waktu	WIB
Lagu kedaerahan
Situs web resmi: jambiprov.go.id
(?)

Jambi (Jawi: جامبي/جمبي) adolah sebuah provinsi di Indonesia nang ado di pesisir timur di bagian tengah Pulau Sumatera. Jambi adolah satu dari tigo provinsi di Indonesia nang ibu kotanyo benamo samo dengan namo provinsinyo, selain Bengkulu dan Gorontalo.

Provinsi Jambi tediri dari pado 9 kabupaten, 2 kota, 141 kecamatan, dan 1.562 kelurahan/kota. Provinsi iko punyo luoh wilayoh 50.160,05 kilometer persegi ngan jumloh penduduk seblambun 3,62 juta pado tahun 2019.

Daeroh terluoh di provinsi iko iyolah Kabupaten Merangin ngan luoh 7.679,00 kilometer persegi. Adopun daeroh ngan kecik wilayohnyo iyolah Kota Jambi ngan luoh wilayoh 205,43 kilometer persegi.

Sejarah

Asal namo

Menurut analisis Groeneveld (1876 M), San-fo- ch'i dalam catatan dinasti Sung adalah Chan-pei (Jambi), tapi menurut Coedès, namo tu ngindikasikan ke Sriwijaya, yang jugo punyo namo lain Shi-li-fo-shi dan Svarnadvipa. Pendapat Pelliot beri penjelasan yang mungkin be kalu sejak zaman dinasti Sung, pusat Sriwijaya lah pindah ke Chan-pei (Jambi) sehinggo Jambi dikenal jugo dengan namo Sriwijaya. Ide ko jadi penjelas catatan Chou Ch'ü-fei (1178 M) yang becakap bahwo pado taun 1079 M kerajaan San-fo-ch'i ngirim utusan Kerajaan Chan-pei ke Cino. Jiko alur pikir ko diterimo mako biso jadi San-fo-ch'i awalnyo adolah namo untuk Sriwijaya yang bepusat di Palembang, tapi bis tu jugo dilekatkan pado Chan-pei (Jambi) disebabkan terjadinyo perubahan pusat pemerintahan dari wilayah Palembang sekarang ke wilayah Jambi.

Zaman Kerajaan

Kerajaan Hindu Buddha

Peta Hindia Belando yang ado nampak Pantai Barat Sumatera, Kepulauan Kelapo, Madura, Bintang, Indragiri, dan Sungai di Jambi.

Pekembangan agamo Hindu samo Buddha adolah sejarah penting tuk perkembangan Jambi sebelum Islam. Pado maso ni, Jambi pernah jadi salah sekok wilayah penting tuk penyebaran agamo dunio, khususnyo di Asia. Kesimpulan tentang pentingnyo posisi Jambi pado maso Hindu-Buddha tu terutamo didasarkan pado penelitian-penelitian sejarah samo arkeologi di kawasan Candi Muaro Jambi yang becorak Hindu-Buddha. Bedasarkan apo yang ditemui di sekitar kawasan tu, banyak orang yakin candi ko mulaki dibangun pado abad ke-8-9 secaro betahap. Tapi sejarawan Jambi, Fachruddin Saudagar, yakin pembangunan candi lah dirintis sejak abad ke-4 di daerah yang merupokan daerah garis pantai purba berbentuk teluk benamo Teluk Wen yang menjorok hinggo ke daerah Muaro Tebo dan Sarolangun. Keberadaan candi ko menguatkan pendapat kalu Melayu (Jambi) adolah kerajaan Hindu tertuo di Sumatra yang lah bediri tahun 644 M.

Waktu penyebaran agamo Hindu dan Buddha di Jambi dak biso ditetapkan secaro pasti. Prediksi yang mungkin disusun berdasarkan pekembangan Candi Muaro Jambi yang pado awalnyo dipekirakan berfungsi sebagai tempat pendidikan agamo Buddha di Nusantaro. Dalam perjalanannyo belajar agamo Buddha, I'tsing (Yi Jing) sempat bekunjung duo kali di tanah Mo-lo-yeu untuk memperdalam pengetahuan tentang Buddha yaitu taun 671 dan antaro 689-695 M. Pentingnyo negeri yang juga disebutnya Foshi ko sebagai tempat belajar agamo Buddha, mendorong I'tsing menyarankan para agamawan Buddha untuk belajar dulu 1-2 tahun di siko sebelum berangkat ke India. Selain tu, umumnyo peneliti yakin bahwo Candi Muaro Jambi pernah menjadi pusat Kerajaan Melayu tuo dan Sriwijayo hinggo abad ke-12 dengan rajo terakhirnyo Tun Telanai (1080-1168 M).

Catatan I'tsing tu menjelaskan bahwo waktu kedatangannyo ke tanah Mo-lo-yeu, ajaran Buddha tah bekembang pesat di sano. Bukti penyebaran agama Hindu dan Buddha di sekitar Palembang samo Jambi jugo didasarkan pado isi prasasti-prasasti zaman Sriwijayo yang menerangkan prosesi-prosesi samo sistem keyakinan yang menampakkan nilai-nilai samo tradisi Hindu-Buddha. Setidaknyo ado enam prasasti penting yaitu prasasti Talang Tuo yang ditemukan di sebelah Barat Bukit Siguntang betaun 684 M, prasasti Kedukan Bukit yang ditemukan di sebelah Selatan Bukit Siguntang betaun 682 M, prasasti Sabokingking, prasasti Kota Kapur di daerah Bangka betaun 686 M, prasasti Karang Berahi di daerah Merangin, Jambi, dan prasasti Palas Pasemah di daerah Lampung. Nengok dari catatan I'tsing samo penanggalan prasasti ko mako biso dipahami bahwo ajaran Hindu dan Buddha lah tesebar di Palembang samo Jambi dari awal abad ke-7 atau lebih awal lagi.

Penetapan lokasi dan status Mo-lo-yeu dan Sriwijayo, atau namo lainnyo, serta dinamika hubungan antaro keduonya tetap menjadi lahan analisis yang terbuka hinggo kini, meskipun lah sudah seabad sejak paro ilmuwan mulai melakukan kajian-kajian intensif terkait. Pendapat yang lebih umum adolah Mo-lo-yeu belokasi di Jambi, sedangkan Sriwijayo awalnyo bepusat di Palembang. Catatan I'tsing samo rekam peristiwo beberapo dinasti Cino adolah sumber utamo yang menjelaskan adonyo kerajaan-kerajaan tu dari abad ke-7 M. Telepas dari perdebatan tu, baik Mo-lo-yeu maupun Sriwijayo, merupokan kerajaan betetanggo di bawah pengaruh Buddha, bahkan sempat menjadi salah sekok pusat pendidikan agamo Buddha pado masanyo.

Arca Hindu zaman dulu di Kampung Solok, Jambi, Sumatra. Foto koleksi dari Wereldmuseum Amsterdam

Sepanjang abad ke-7 M hinggo abad ke-14 M, Sriwijayo, temasuk Jambi di dalamnyo, menjadi kerajaan besak yang bepengaruh di jalur pedagangan Selat Malaka. Kerajaan-kerajaan Sumatra cenderung betumbuh di daerah pesisir Timur karno petimbangan penguasaan jalur pedagangan yang memanfaatkan sunge-sunge besak yang bermuaro ke Selat Malaka. Ibu kota kerajaan beperan sebagi "penjago gawang" arus pedagangan di kuala yang umumnyo menjadi kota pelabuhan dagang. Namun, ibu kota kerajaan dak selalu ado di tepi pantai sehinggo sering kali tugas kontrol pelabuhan dagang dilakukan oleh syahbandar, dan patroli laut didukung oleh Orang Laut yang loyal kepado kerajaan. Sementaro di pantai Barat, jalur perdagangan cenderung membentuk garis sisir, yang memungkinkan komunitas lokal mbangun pelabuhan dagang di mana bae. Karno tu pulo, belasan pelabuhan dagang yang bediri di sepanjang pantai Barat, cenderung punyo raso dewek samo meraso setaro.

Meskipun struktur politik Mo-lo-yeu dipekirokan muncul dari abad ke-7 M, dak berarti sebelumnyo dak ktek struktur politik di wilayah yang sekarang disebut Jambi ko. Sumber lain bahkan mencatat bahwo kerajaan Melayu (Moloyou) di Jambi terentang dari maso abad ke-3 M dengan namo Koying, abad ke-4 dengan namo The Hu Pho (Tebo) dan abad ke-5 M dengan namo Kuntala (Kuala Tungkal) dan kemudian memanjang sampai abad ke-13 M dengan namo Melayu yang kemudian runtuh bis tu muncul kerajaan baru becorak Islam di abad ke-16 M. Sejarah Melayu Tua berakhir di tanah Jambi dikaitkan dengan kisah tebunuhnya Tun Telanai yang jadi penguaso terakhir. Naskah Hikayat Negeri Jambi menceritokan bahwo Tun Telanai tebunuh dalam perang melawan anaknyo yang dibuang ke laut saat masih kecik (bayi) bis tu jadi putro mahkota Kerajaan Siam. Keberadaan Tun Telanai sebagai rajo terakhir Jambi periode pra-Islam jugo ditulis dalam naskah ISKJ pasal Silsilah Rajo-rajo Jambi.

Kesultanan Islam

Sejarah awal mulo Kesultanan Melayu Islam Jambi biso diprediksi kurang lebih besamoan dengan penyebaran Islam secaro besak di Sumatra, yoitu pado abad kelimo belas. Naskah ISKJ, pasal Undang Namanyo Hukum Adat bagian keduo pasal 36 menyebutkan bahwo Jambi berubah jadi Islam lebih awal yoitu pado tanggal 1 Muharom 700 H/23 September 1300 M pado zaman Orang Kayo Hitam bin Datuk Paduko Berhalo. Sementaro tu, buku Jambi dalam Sejarah 1500-1942 menyatokan bahwo Islam la bekembang di Jambi pado abad ke-14 M, bersamoan dengan dimulainyo maso Kerajaan Jambi oleh Datuk Paduko Berhalo. Merujuk pado duo referensi terakhir tu, penetapan waktu islamisasi Jambi jadi kurang rasional jiko beradapan pado pekiraan waktu pemerintahan Orang Kayo Hitam sebagai rajo keduo Kesultanan Jambi yang ditulis pado 1500 M dalam referensi-referensi kontemporer. Penetapan waktu ko memberikan jarak ampir 200 taun antaro proses berubah orang Jambi jadi Islam dengan dimulainyo pemerintahan Orang Kayo Hitam. Penggambaran waktu ko jugo dak sesuai jiko merujuk pado pekiraan taun datangnyo Datuk Paduko Berhalo ke Jambi yang tetulis di makamnyo yoitu taun 1440 M dan matinyo pada taun 1480 M.

Merujuk pado penjelasan dalam naskah tu, islamisasi Jambi baru mulai sekitar abad ke-15-16 lewat jalur Turki. Tapi, dak ktek bukti arkeologis atopun kajian pendukung lainnyo yang mendukung teori ko. Pado abad ke-17, beberapo orang Arab diketahui lah bediam di Jambi, termasuk dari golongan sayyid. Sayyid Husin bin Ahmad Baraghbah tecatat datang ke Jambi taun 1626 M, dan menurut informasi lidah masyarakat di sekitar makamnyo di Seberang, Sayyid Husin merupokan tetuo margo Baraghbah di Indonesia. Namun, penyebaran Islam biso jadi lah belangsung lamo lebih awal bahkan sejak abad ke-7 M sebagaimano pendapat sebagian sejarawan tentang waktu mulainyo penyebaran Islam di Sumatra. Pendapat ko mungkin be dari rute pelayaran dagang Arab ke Cino yang harus lewat perairan Nusantaro sejak jalur darat yang digunokan sepanjang maso Dinasti Umayyah teputus karno perang. Belaboh di pesisir Jambi dan Palembang adolah hal yang mungkin bae digawein samo pelaut muslim pada maso tu apolagi daerah tu merupokan pelabuhan dagang penting pado maso Sriwijayo.

Adonyo negeri Melayu dan Sriwijayo jugo lah muncul dalam catatan bangso Arab dan Persia sejak petengahan abad ke-9 dengan nyebut daerah Zabaj, Zabaq, atau Sribuja, walau beberapo ahli ngirokan bahwo daerah yang dimaksud tediri dari Sumatra bagian Selatan sampai ke Jawo. Korespondensi yang dilakukansamo rajo Sriwijayo pada khalifah Muawiyah dan Umar bin Abdul Aziz yang antaro lain mintak dikirimnyo ulama ke Sriwijayo nguatin argumen ko. Fakta-fakta tu nunjukkan kemungkinan penyebaran Islam di Jambi, bersamo Palembang, lah mulai pado abad ke-7 M, tapi proses islamisasi dalam bentuk kesatuan politik baru tejadi sekitar abad ke-14-15 M yang ditandoi bedirinyo cikal bakal Kesultanan Jambi becorak Melayu-Islam.

Jiko merujuk pado keterangan di atas tu, Kesultanan Jambi dapat dikatokan sebagai kesultanan Islam awal di Sumatra Tegah. Kerajoan Jambi lah jadi Kerajaan Islam sejak maso pemerintahan Orang Kayo Hitam (1500 M), walaupun kemudian baru menggunokan istilah kesultanan, dan sultan sebagai penguasonyo, pado maso pemerintahan Abdul Kahar bin Panembahan Kota Baru (1615-1643 M). Sementaro tu, Kesultanan Palembang baru jadi kesultanan Islam, sekaligus menjadi titik awal memisahkan diri dari Mataram, pado taun 1659 M dengan sultan pertamonya Ki Mas Hindi begelar Sultan Abd al-Rahman Khalifah al-Mukminin Sayidul Imam. Tapi, kesimpulan yang cuman bedasar pado hikayat macam ni tentu lemah nian akurasinyo. Masih butuh kajian lebih dalam tantang hal tu.

Sumber-sumber tetulis yang ado mulai cerito lahirnyo Kerajoan Jambi dengan merujuk pado tokoh Datuk Paduko Berhalo (Ahmad Barus II), pangeran dari Turki anak dari Zain al-'Abidin. Sumber lokal yang nyatat sejarah dan silsilah rajo-rajo Jambi adolah naskah Hikayat Negeri Jambi dengan versi lainnyo Hikaijat Toean Telani, serto naskah UUPJ dan ISKJ yang dirujuk hampir persis samo dalam buku Jambi dalam Sejarah 1500-1942 dengan menyertokan taun bekuaso sekok-sekok rajo. Kalu sumber Eropa, ado beberapo tulisan dalam laporan-laporan pejabat Belando maupun laporan-laporan ekspedisi yang njelasin silsilah rajo-rajo Jambi, di antaronyo adolah "Stamboom van het Vorstenhuis (Keraton) van Djambi" dan "Djambi Rapport Aug. '02 door Prof. dr. Snouck Hurgronje aan A. F. Folkersma" Selain tu, tulisan Tideman dan Sigar, Barbara Watson Andaya, Elsbeth Locher-Scholten dan terakhir disertasi Annabel Teh Gallop adolah sumber paling penting tentang namo-namo sultan samo maso pemerintahannyo.

Jadi secaro de jure, wilayah Jambi dikuasai Kerajaan Jambi yang jadi cikal bakalnyo didirikan oleh Datuk Paduko Berhalo pado akhir abad ke-15 M. Kerajaan Jambi mulai becorak Islam pado awal abad ke-17 M dengan rajo pertamo yang menggunakan gelar sultan adolah Pangeran Kedah gelar Sultan Abdul Kahar. Paro sultan betahta di Tanah Pilih, sekitar Masjid Al-Falah Kota Jambi sekarang ko, dan memerintah daerah Jambi dengan tingkat naknyo yang lemah sebagaimano umum ditemukan pado kerajaan-kerajaan di Sumatera dan Asia Tenggaro lainnyo. Daerah-daerah memiliki otonomi yang cukup besak terutamo di daerah uluan yang jadi pusat produksi barang-barang perdagangan macam hasil utan, lado, samo dompeng emas.

Hubungan antaro penguaso lokal dan kerajoan adolah hubungan redistribusi, di mano penguaso lokal nyediokan barang-barang yang didapek dari masyarakat untuk kerajoan dengan imbal balik peran serta dan bantuan dalam masalah-masalah yang dihadapi daerah seperti bencano alam, serangan orang luar, termasuk dalam penyelesaian konflik yang dak biso tuntas di daerah. Dengan kato lain, hubungan daerah dengan kesultanan sebagai pusat kekuasoan nggambarkan hubungan mutualisme yang jiko semakin jauh wilayahnyo mako semakin kendor pulo ikatannyo. Selain fakta geografis yang misahkan wilayah ibu kota dengan dusun, kemampuan ngontrol daerah jugo dipengaruhi oleh lemahnyo struktur politik-pemerintahan kesultanan.

Zaman Hindia Belando

Pado maso Belando masih menjajah wilayah Nusantaro, Jambi masih dalam bentuk kesultanan. Kesultanan Jambi masuk maso jayo ekonomi pado abad ke-17 M. Pada maso tu Jambi telibat dalam perdagangan internasional di jalur Selat Malaka dengan negaro-negaro kawasan, imperium Cino, India, Timur Tengah, sampe Eropa. Kelompok-kelompok Arab la mulai menetap di Jambi dan kemudian hari jadi kelompok paling bepengaruh dalam kesultanan terutamo setelah masuk abad ke-19 M. Kesultanan Jambi jugo la mulai jalin hubungan samo bangso Eropa melalui perusahaan dagang Belando Vereenigde Oostindische Compagnie (VOC) yang masuk ke Jambi pado taun 1615 M. Walau, didasari motif utamo kepentingan ekonomi, VOC jugo telibat dalam urusan politik kesultanan sejak maso-maso awal kedatangannyo. Struktur politik-pemerintahan tradisional di Kesultanan Jambi yang lah ado berabad-abad pelan-pelan ngalami deviasi dsamo kewenangan yang sebagian mulo beralih kepado Belando dari kontrak-kontrak yang lah dibuat sejak awal abad ke-17. VOC ninggalin Jambi pado akhir abad ke-18 dan sejak maso tu Jambi dak lagi punyo hubungan resmi dengan Belando.

Potret besamo Sultan Thaha Saifuddin di Jambi dan pengikutnyo (1904)

Awal abad ke-19, Belando balik lagi berusaho bangun hubungan samo Jambi. Pada maso ko, Kesultanan Jambi ado dalam situasi krisis ekonomi dan krisis legitimasi yang micu pergolakan internal. Sejak kemunduran ekonomi mulai pado akhir abad ke-17, ekonomi Kesultanan Jambi dak pernah bangkit lagi. Krisis legitimasi karno persoalan moral micu perang sodaro pado taun 1811 M pado maso pemerintahan Sultan Mahmud Muhyiddin. Meskipun sultan berhasil mertahankan takhta dengan bantuan sepupunyo, Raden Rangga, konflik di dalam kesultanan tetap belangsung hinggo dekade ketigo abad ke-19. Dalam kondisi konflik dalam yang bekepanjangan ko, upayo negosiasi dengan Belando belangsung pasang-surut. Kesultanan bahkan telibat konflik tebuko dengan Belando yang berakhir dengan ditandatanganinyo kontrak taun 1833 M, dari kontrak yang dibuat di Sungai Baung, sehinggo disebut Piagam Sungai Baung, Kesultanan Jambi ngakui kedaulatan Belando di Jambi. Sejak tu lah, Belando balik ngontrol perdagangan Jambi. Kontrak ditandatangani pado tanggal 14 November tu beisi dengan inti perjanjian cam ko.

1. Sultan Jambi nyerahkan diri dan negerinyo kepado kebijakan dan pemerintahan Belando.
2. Belando terus beri kehidupan yang pantas kepado sultan.
3. Belando bekedudukan di benteng Kumpeh dan kagek membangun benteng lain kalu dibutuhkan.
4. Belando dak ikut campur samo urusan pemerintahan, dak jugo mengubah adat yang belaku, dan dak ngatur urusan pajak.
5. Belando ngendalikan bea-cukai perdagangan ke luar Jambi.
6. Belanda samo kesultanan akan tolong-menolong dalam menghadapi musuh macam konflik di Padang dan lainnyo.
7. Pengembalian orang-orang pelarian ke asalnyo.

Zaman Kemerdekaan Indonesia

Sebelum dan sesudah Proklamasi Kemerdekaan 17 Agustus 1945, daerah Jambi secaro struktural merupokan daerah keresidenan, bagian dari Provinsi Sumatra. Bis tu waktu Sumatra tebagi jadi tigo provinsi yaitu Provinsi Sumatra Utara, Provinsi Sumatra Tengah samo Provinsi Sumatra Selatan, mako Keresidenan Jambi yang terdiri dari Kabupaten Merangin, Kabupaten Batanghari, dan Kotapraja Jambi masuk ke dalam provinsi Sumatra Tengah. Tapi dengan adanyo Undang-undang No. 61 Tahun 1958, mako Provinsi Sumatra Tengah berubah jadi tigo provinsi yaitu: Provinsi Sumatra Barat, Provinsi Riau samo Provinsi Jambi). Tepatnyo sejak tanggal 6 Januari 1957, daerah Jambi jadi Daerah Tingkat I yang tediri dari sekok Kotamadya dan limo Kabupaten yaitu:

1. Kotamadya Jambi
2. Kabupaten Batanghari
3. Kabupaten Tanjung Jabung
4. Kabupaten Bungo Tebo
5. Kabupaten Sarolangun Bangko
6. Kabupaten Kerinci.

Geografis

Secaro geografis, Provinsi Jambi ko bebateh dengon Provinsi Riau di sebelah utara dan bebateh ngan Provinsi Sumatera Selatan di sebelah selatan. Selanjutnya, Jambi bebateh ngan Provinsi Bengkulu dan Provinsi Sumatera Barat di sebelah barat dan bebateh ngan Selat Berhala di sebelah timur ko.

Provinsi Jambi punyo empat taman nasional, iyolah Taman Nasional Kerinci Sebelat (TNKS), Taman Nasional Berbak (TNB), Taman Nasional Bukit Tigapuluh (TNBT), dan Taman Nasional Bukit Duabelas (TNBD).