Kue padamaran adolah kue basah yang berasal dari Jambi. Kue iko bebentuk persegi panjang dengan warno ijo yang elok. Padamaran merupokan kue yang jarang ado di Jambi, tapi kalau sedang bulan puaso, Padamaran jadi salah satu kue yang paling dicari samo orang Jambi.[1]
Tekstur dari kue iko adolah lembut kayak bubur sum-sum, jadi wajar kalau banyak orang yang nyebut Padamaran ni kayak bubur sum-sum. Raso dari Padamaran adolah manis yang berasal dari gulo merah di bawah kue itu. Selain manis, jugo ado raso gurih yang didapat dari santan.[2]
Sejarah edit
Dulu, kue padamaran ko cuman biso dimakan samo orang tetentu bae, kayak orang-orang kelas atas, atau lagi ado acara macam nikahan, ado pejabat tibo, atau lainnyo. Tapi kalau sekarang semuo orang udah biso makan Padamaran.[2]
Sayangnyo, dak banyak orang yang jual Padamaran karno kue ko cepat nian basinyo. Makonyo orang-orang banyak milih makan kue kering atau yang lain dan idak gampang basi. Tapi Padamaran masih sering ado di acaro adat atau jugo keagamaan.[1]
Bahan untuk Membuat edit
Bahan-bahan untuk buat Padamaran sebenarnyo dak susah dicari karno udah banyak ado di sekitar masyarakat. Bahan-bahannyo adolah:[3]
- 150 gram tepung beras
- 400 ml santan yang kental
- Kacang ijo yang udah direbus
- Sari pandan
- Gulo aren yang udah disisir
- Gulo pasir
- Garam
- Daun pisang
- Pasta pandan
Cara Membuat edit
Proses pembuatan Padamaran ko dapat dikatoan lamo dibandingkan kue tradisonal lainnyo. Walaupun begitu, kue iko masih jadi primadona. Berikut langkah dalam pembuatannyo:[3]
- Langkah petamo buat dulu wadah Padamaran dari daun pisang. Ambek duo lembar daun pisang terus ditompok dan bentok jadi wadah pesegi panjang.
- Campurin tepung beras, santan, sari pandan, aek, samo garam dikit. Aduk adonan itu sampe adonan jadi caer, lalu tambahin kacang ijo yang udah direbus.
- Masukin gulo aren yang udah disisir ke dalam wadah daun pisang tadi. Lalu masukin jugo ¼ atau ½ sendok teh gulo pasir biak waktu kuenyo masak, gulo yang ado di bawah biso melelh.
- Masukin adonan tepung beras tadi tu ke dalam tapi jangan penuh-penuh.
- Masukin dalam kukusan yang udah dipanasin sebelumnyo. Kukus kue selamo kurang lebih 15 menit sampe matang. Kalau udah matang langsung angkat biak dak ado kerutan-kerutan di atas kue.
- Kue Padamaran siap untuk dimakan.
Daftar Pustaka edit
- ↑ 1.0 1.1 Food Detik. Kue Padamaran dari Jambi yang Hanya Ada di Bulan Ramadan. Diakses pada 7 Mei 2021.
- ↑ 2.0 2.1 Travelingyuk.Padamaran, Kue Tradisional Jambi yang Laris Manis saat Ramadan. Diakses pada 7 Mei 2021.
- ↑ 3.0 3.1 Liputan6. Resep Kue Padamaran Khas Jambi untuk Sambut Ramadan. Diakses pada 7 Mei 2021.