Wp/jax/Gunung Talang

Gunung Talang atau jugo dikenal dengan namo Salasi atau Sulasi adolah gunung yang letaknyo ado di Kabupaten Solok, Provinsi Sumatra Barat, Indonesia. Gunung ko adolah gunung merapi yang masih bestatus aktif namun meletos terakhir di tahun 2007. Gunung yang berado 9 km dari ibu kota kabupaten Solok, Arosuka ko mempunyoi ketinggian sekitar 2.597 meter di atas permukaan laut.

Gunung Talang temasok ke dalam gunung stratavolcano dengan status aktif. Salah sikok kawah yang ado di gunung ko menjadi danau dengan namo yang samo, yaitu Danau Talang. Berdasarkan sejarah, gunung iko sudah meletus berkali-kali sejak tahun 1833 dan sampai artikel ini dibuat meletus terakhir di tahun 2007.

Jalur Pendakian

Ado setidaknyo tigo jalur pendakian ke Gunung Talang ko, Aie Batumbuk, Batu Bajanjang atau Bukuk Bulek, dan jugo Seroja. Dari ketigo jalur tesebot, yang paling populer adolah Aie Batumbuk karno jalurnya lebih panjang sehinggo lebih menantang. Tapi walaupun lebih menantang, pemandangannyo lebih indah dibandingkan dengan duo jalur lainnyo. Pemandangan yang dimaksud adolah pemandangan tigo danau yaitu Danau Talang di Kecamatan Danau Kembar, Danau Di Atas di Kecamatan Lembah Gumanti, dan jugo Danau di Bawah yang ado di Kecamatan Lembang Jaya. Kalau naik lewat jalur Aie Batumbuk, pendaki biso menikmati pemandangan danau ko dari Rambu 46 (R46), sedangkan kalau lewat jalur pendakian lain harus sampe puncak dulu baru biso nengok.

Gunung Talang disebot sebagai gunung yang cocok untuk pendaki pemula karno walaupun jalur pendakian licin dan bebatu, tapi waktu untuk sampai ke puncak idak terlalu lamo, cuman sekitar 4 jam bae. Apolagi kalau yang udah tebiaso nanjak, biso sampai puncak cuman 2 jam 30 menit bae. Selain waktu perjalanan yang biso dikatokan singkat, warga sekitar Gunung Talang pun menyediokan jasa ojek dari R0 ke R6 sehinggo pendaki idak kelelahan di awal pendakian.