Gajah Sumatra (Elephas maximus sumatranus) adolah subspesies dari gajah asia yang hanyo idop di Pulau Sumatra.[1] Gajah ko ado di hutan dataran rendah Sumatra yang ado di Provinsi Riau, Sumatra Barat, Aceh, Jambi, Sumatra Utara, Bengkulu, Sumatra Selatan dan jugo Lampung. Selain tigo tempat ko, gajah sumatra jugo ado di luar kawasan hutan lindung.[2]
Diketahui kalau berat dari gajah ko mulai dari 2,25 ton dan biso sampe 5,5 ton. Gajah iko merupakan hewan mamalia yang harus dilestarikan karno menurut IUCN di tahun 2012, status dari gajah ko adolah kritis yang awalnyo genting. Hal iko karano populasi dari gajah ko menurun lebih dari 69% dalam 25 tahun terakhir. Total populasinyo hanyo sekitar 2400-2800 bae.[2][3]
Kondisi ko tejadi sebenarnyo karno beberapo faktor, yaitu habitatnyo yang mulai bekurang, konflik samo manusia, peburuan ilegal, dan jugo ilangnyo kemampuan genetik karno bentuknyo yang kecik dan jugo teisolasi.[2] Tinggi gajah ko hanyo sekitar 1,7-2,6 meter bae dan dinilai lebih kecik dibandingkan Gajah Afrika.[3]
Ciri-ciri
editCiri-ciri dari gajah sumatra adolah:[1]
- Beratnyo cuman sekitar 3-5 ton dan tingginyo idak lebih dari 3 meter.
- Koletnyo lebih terang dibandingkan gajah asia lainnyo, dan di kopengnyo sering ado depigmentasi yang kayak flek poteh kemerahan.
- Gajah yang punyo gading panjang cuman jantan, sedangkan betinonyo punyo gading pendek bahkan idak nampak.
- Di bagian atas kepalaknyo ado duo tonjolan.
- Kopengnyo lebih kecik dari ukuran kopeng gajah biasonyo dan jugo bentuknyo kayak segitigo.
- Ado 5 kuku di kaki depannyo dan 4 kuku di kaki belakangnyo.
Reproduksi
editAdo periode musth pado gajah jantan yang menandakan kalau maso itu adolah maso produksi hormon testosteron. Ketika gajah jantan masok ke dalam maso iko, artinyo gajah jantan tu siap ontok kawen. Biasonyo gajah jantan dalam maso iko beomor sekitar 12-15 tahon. Salah satu hal yang bebeda ketiko masok ke maso iko adolah adonyo perubahan perilaku, nafsu makannyo yang toron, gerakannyo lebih agresif, samo lebih sering ngendus-ngendus belalainyo. Tedapat pulo perubahan fisik yang tejadi, kayak sering ngeluarin urin, penisnyo sering keluar dan dari dahinyo keluar kelenjar dengan bauk yang nyengat.[1]
Sedangkan kalau untuk gajah betino, dio biso ngelahirin anak kalau umurnyo udah di atas 9-10 tahun. Usia kehamilan dari gajah ko adolah 22 bulan dan ketiko bayi gajah tu laher, beratnyo biso sekitar 40 -80 kg dan tingginyo 75-100 cm. Dalam sekali hamil, bayi yang dikandung sikok, tapi idak jarang jugo ado duo di dalam perot gajah. Bayi gajah tu bakalan diurusin samo induknyo sampe dio beumur 18 bulan.[1]