عاقب بمقابلہ ثمر
دیس پردیس موضوع
عاقب آکھدا اے 1
ہتھ جوڑ کے توہیں بھائیوال دے کولوں پیا ہک ہک بھل بخشیناں
میں جانڑ کے نئ مجبوریاں توں پیا دیگر جھوک لـدیناں
سـوہنڑاں عاقب وقت نبھا آنداۓ ہنڑ یار اجازت لیناں
اللہ حافظ بخت نصیب ہووی میں تاں وطن توں ایہہ پیا ویناں
ثمر جواب دیندا اے 1
پئ اے جبھ تھبکاندی میرے ہونٹ پۓ کمبدن اللہ حافظ آہدیاں واری
میری اکھیں چوں نیندراں کھوہ کے کر لئ توہیں تاں جھب پردیس تیاری
نویں سنگت دے مـانڑ تے ثمر دا چن توں تاں رکھسیں عمر گزاری
میرے بھج گۓ آسـرے پچھلی زندگی میری سیخ تے نبھنڑی ساری
عاقب 2
پریشان نہ ہو میں ہٹ آساں دل ترکڑا رکھ توں رو نئیں
من منت میری مجبور نہ کر راہ ڈک کے یار کھلو نئیں
رکھ ذہن تے قول سیانڑیاں دا انجے جوگ ہنجوآں دی جو نئیں
سوٹا ماریاں عاقب لوہے تے لیک اے پانڑی کدی وی ہوندا دو نئیں
ثمر 2
جھٹ اجھک ٹکا کے ویکھنڑ دے تیرے مکھ اج دور ہو ونجنڑا ایں
تیرے ٹر گیاں ثمر حیاتی دا سارا ختم سرور ہو ونجنڑا ایں
دوئ کائ نئ ڈھول سوچاہیں ہا پۓ ہک فرق ضرور ہو ونجنڑا ایں
دل پتھر دا نئ اے جوں کچ ہویا ترٹ گیا تاں چور ہو ونجنڑا ایں
عاقب 3
مینوں ہسدیاں آکھ چا رب حافظ تیرا بھلساں نئیں احسان ایں
مڑ مڑ مجبوریاں دل دیاں دس کے مینوں ہور نہ کر پریشان ایں
میتھوں پچھ جیویں میں پیا وطن چھوڑیناں میں وی عاقب ہاں انسان ایں
تیتھوں نکھڑ کے مینوں وی ساۓ جہیا گھاٹا اے ہکا تیاں دا نئیں نقصان ایں
ثمر 3
سنج کر کے آپنڑیاں دیساں دی کیندا ونج کہ وطن وساؤں ایں
اودے مکھنڑ تے کائی نئیں پھوڑیاں تے جیہڑے دیس شریف نوں جاؤں ایں
کیوں لطف ونجاؤں ایں زندگی دا کیوں ثمر شریک ہساؤں ایں
ادے دشمن تاڑیاں کان تیار ہن میرے جانڑ کہ اوڈھر لاہوں ایں
عاقب 4
بے وس ھاں تائیں پیا وطن چھوڑیناں میری نیت تاں ماڑی کائ نہیں
میں جانڑ کے آپنڑیاں پیراں تے ماری آپ کوہاڑی کائ نہیں
تیری یاد بغیر میں عاقب دی لاہنڑیں قطعن دیہاڑی کائ نہیں
ھووی شوق تاں مگرے آ نکلیں ایڈی دور پدھاڑی کائ نہیں
ثمر 4
مکھاں پدھاں دیاں ہویاں جدے توں پیا وینائیں او تاں ساۓ جیہا سفر کوٹاھنگا ایئ
وسوں بھن نئ ثمر دے وطناں دی چوکھا وچ پردیس دے بھانگا ایئ
تیری شکل تے میریاں اکھیاں دا مک ونجنڑاں عمر دا سانگا ایئ
پردیس آخر پردیس ہونداۓ اوتھے ملنڑ غریب دا ماہنگا ایئ
عاقب 5
سجیندے دل اچ سک ملاقات دی ہووے نئیں ویہدا دھپ یا چھاں ایں
ٹھل پمدن کچیاں گھڑیاں تے ہووے بےشک تار چناں ایں
کتھے تخت ہزارا تے کتھے جھنگ دے بیلے لمے سفر توں گھابریں ناں ایں
پیروں واہنڑیاں پدھ صحرا دے کریے لجپال بنڑیندا تاں ایں
ثمر 5
تیری خاطر ٹھلنڑ توں نادری کائ نئیں لکھ ہوون تار چناں ایں
اکھیں نوٹ کے مگرے بھجدا اوساں کیئ ویکھنڑی دھپ تے چھاں ایں
تیری خاطر ثمر میں اوجھڑ راہں تے بھاویں رل کے مرساں تھاں ایں
حالات دا سینہ چیر کے لکھساں تاریخ اچ اپنڑاں ناں ایں
عاقب 6
بہوں اوکھا ایئ پدھ پردیساں دا میرے مگر نہ بھج بھائیوال اے
دھنگی پا نئیں عاقب اوجھڑاں نوں نہ جانڑ کے ہو بے حال اے
سدھراں دے پلگھ نیواری تے توں سؤں بے فکری نال اے
میری چنتاں چھوڑ خدا حافظ رکھیں آپنڑا خاص خیال اے
ثمر 6
تیرے باجھ جہان تے جیونڑ اوکھا اے میرا پیار ویسار کے ونج نہیں
رہو آپنڑے دیس تے وسدے گھر نوں انج جندرے مار کے ونج نہیں
توں ایں ضامن اوکھیاں گھڑیاں دا سوکھے وقت گزار کے ونج نہیں
مینوں دے نئیں ساڑ وچھوڑیاں دا ہاں ملکھ دا ٹھار کے ونج نئیں
عاقب 7
آپے منہ مخلوق دے بند ہو ویسن سنگ لگنڑ توں پوند آ ویساں
تیرے دل تے عاقب ہسڑاں دی جنگ لگنڑ توں پوند آ ویساں
تیری تلی اچ پیارکڈھیندیاں ویلے ونگ لگنڑ توں پوند آ ویساں
ہویا رب دا حکم تے جندریاں تے زنگ لگنڑ توں پوند آویساں
ثمر 7
رکھیں چنتاں نسل دے نوکر دی پردیس نہ دیس بنڑا لئیں
جداں خیر دا ھٹ پوویں انگلیاں تے میتھوں ہک ہک دینہہ گنڑوا لئیں
تیرے حکم تے کسنڑ دے کانڑ تیار ھاں جداں دل آکھی ازما لئیں
میری اکھیں دا سمبھول جناب دی دید اے میتھوں ثمر نہ شکل لکا لئیں
عاقب 8
ہنجوں پوجھ تے بس کر روونڑ دی مینوں ہسدیاں ڈھول جدا کر
میرے ٹردیاں قدم رتھاونڑ نئیں میرے دل نوں ہمت عطا کر
تیتھوں کوئ نموں ہور امداداں منگدا کم اتنا عقل دنا کر
خیریں اپڑاں آپنڑی منزل تے میرے حق اچ صرف دعا کر
ثمر 8
میں تاں دوائیں ودا منگناں کنڈ مگروں کیوں آکھاں نیت دی مار ایئ
میں تاں آہنا مرشد کنڈ تے ہیئ نبی سوہاں ثمر دا یار ایئ
متھے سدھ ہیئ میں ہٹکیندا نئیں من دل دیاں اے سردار ایئ
پر پچھلا ملکھ حیاتیاں ہونی کوکاں مارنڑ کانڑ تیار ایئ
عاقب 9
تیتھوں نکھڑ کے وی میں تیاں دا ہاں سارے خدشے ٹال کے سئیں پوہ
سل صبر دی رکھ کے سینے تے جذبات سنبھال کے سئیں پوہ
اللہ پاک ملیسی تے کل مل پونڑاں اے ڈیوا آس دا بال کے سئیں پوہ
او میں جاناں تے جگراتے جانڑن تو نگھیاں ڈھال کے سئیں پوہ
ثمر 9
مینوں دل کوئ اجھکنڑ دیونڑا اے کدے سکھاں دیاں تانڑ کے سونڑا اے
انڑساہندا بھار وچھوڑیاں دا کدے ثمر غریب توں چونڑا اے
جیہڑا ہٹکیاں اج پیا نؤں راہندا توئیں کداں کائ واپس بھونڑا اے
تیرے ذہن اچ محض تسلیاں ہن جوں پچھوں کملیاں اودر پونڑا اے
عاقب 10
انجے کجھ دیہنہ دل نوں آسرے لا جھل اودر دے دریا نوں
میتھوں پچھ جیویں چھوڑ کے ٹریا وینا میں وطن تے توئیں تنہا نوں
لڑھ گئے حالات چاں وکھریاں کیتا اے کجھ انجے ہا منظور خدا نوں
وس لگدیاں عاقب کونڑ چھڑیندا اے تیرے ورگے سجنڑ دانا نوں
ثمر 10
ستے رزق ہن وطن تے تھوڑ تاں کائ نائ میری زندگی دا بھائیوال اے
تیرے صدق تے روزی لبھدی رے ہا توں راہندا موڈھیاں نال اے
اجے نکھڑکے پہر وی نیں ہویا ہنڑے رنگ اکھیاں دا لال اے
بندہ سیانڑا ایں آپ اندازہ کر کیویں نکھڑ کے نبھنڑا سال اے
عاقب 11
پتہ وقت گزردیاں کوئی نئیں لگدا میری عاقب تاہنگ لہائیں نئیں
میں سر پر وطن تے ہٹ آونڑائیں میرا دل چوں پیار بھولائیں نئیں
پچھے سنگت دے بدل اصول ناں چھوڑیں میرے حال تے ملکھ ہسائیں نئیں
کلہا بیہ کے رو لئیں گھر آپنڑیں بندا کوئی ہمراز بنڑائیں نئیں
ثمر 11
کسے کول وی ثمر ہلاونڑیں کائی نئیں تیرے پیار دی رام کہانڑی
مک ویسی کلیاں رو رو کے آپے اکھ مجبور دا پانڑی
رکھ ہاں تے ستیاں نیندر آ ویسی محفوظ اے کول نشانڑی
میرے کول ہے دل مجبور دا دارو تیری ہک تصویر پرانڑی
عاقب 12
رکھیں خاص خیال وراگاں دی جاگیر سنبھال کے رکھیں
ساری زندگی ساجھیاں خواباں دی تعبیر سنبھال کے رکھیں
میرے دل دیاں سچیاں جذبیاں نوں دلگیر سنبھال رکھیں
او تیرے روح نوں آسرے لائ رکھسی تصویر سنبھال کے رکھیں
ثمر 12
جیہڑی رل کے نبھی اے ہک دیہنہ دس کدی گھتیا اے فرق ایمان اچ
ہائے ثمر افسوس اے پرکھ جوں کائ نائ توئیں لاپرواہ انسان اچ
ساری زندگی رل کے وسنڑ دی حسرت گئ رل کے مر زندان اچ
میں ہر ارمان نوں دفن چاں کیتا اے ہنڑ دل دے قبرستان اچ
عاقب 13
رکھیں یاد امید تے دنیا قائم اے نہ آس دا دامن چھوڑ اے
گھبرا نئیں امدے رۓ ویندن زندگی وچ مشکل موڑ اے
تیری رنجگی آپنڑی تھاہر تے ٹھیک اے جوں میری قسمت نال اجوڑ اے
میرے عاقب ڈنگ پرتی گۓ تاں تینوں آنڑ منیساں توڑ اے
ثمر 13
اللہ وارث اے نکھڑ کے نبھدی راسی توں جانڑ کے ہیں مجبور اے
اودوں اوسیں جدنڑ غریباں دا گیا مک اکھیاں دا نور اے
انجے وانگ جے ثمر جدائیاں دے رئے بلدے اندر تندور اے
کدیں سیک جدای دا ساڑ چھڑیسی میرے ساہنہ دا آخری پور اے
عاقب 14
مجبور دیاں مجبوریاں نوں توں جانڑیں یا نہ جانڑیں
میری طرفوں مڑ وی ڈھول دعا ہیئ ودا وطن تے جوبن مانڑیں
ڈھلے جدنڑ پچھاواں بختاں دا میہنڑے پمدن ملکھ دے ساہنڑے
اوہ ڈنگ نئیں ریہ جے عاقب تے ایہوی بیلیا کوئ نئوں راہنڑے
ثمر 14
بھلا سجنڑ نہ گھاٹیاں کانڑ ھوندن مینوں لا کے کس توں نکھڑ گئیوں
میری ثمر نمانڑی اکھیاں جد گئیاں ہو بے وس توں نکھڑ گئیوں
توئیں ویکھے خواب امیر ھوونڑ دے نہ بھکھ نہ تس توں نکھڑ گئیوں
سکھاں نال جہان تے وسیے ہا ہنڑ آئ ہائی چس توں نکھڑ گئیوں
عاقب 15
چساں آوسن وطن تے وسن دیاں بهیں پوسنڑ ڈنگ گھبرا نئیں
میرے مگروں اوڑک لہہ ونجنڑاں اے اس بهک تے ننگ گهبرا نئیں
ترٹ ویسی آخر ہجر دی کوٹهی رل ویسن سنگ گهبرا نئیں
بیلے اجڑے مڑ آباد ہو ویسن وس پوسی جهنگ گهبرا نئیں
ثمر 15
توئیں تاں ثمر چڑا لئیاں شوق دیاں اودے رل گئیوں پھردے سنگ اچ
پچھوں کیئ جرنیل مری گئے نی ہسڑاں دی چھڑی ہوئی جنگ اچ
لاغرض جواھریا رنگ دی بازی تویں پرتی اے خود بدرنگ اچ
بھنی آپ ایئ کھیڈ وراگاں دی ہنڑ جھنگ نیہوں اگلے رنگ اچ
عاقب 16
اللہ مڑ چا جھنگ نوں رنگ لیسی تینوں سگویں دینہہ پرتا دیساں
جنگ لڑ کے نال غریبی دے تیرا عاقب لیکھ جگا دیساں
تیہاں مگر ودا پردیس کٹینداں تیری ہر ہک ریجھ لہا دیساں
توں کدے کوئ لائق ہیں جھگیاں دے تینوں تاج محل بنڑوا دیساں
ثمر 16
میں تاج محل نوں کی کرنائیں شالا بھاگ جگا کے آویں
لائیں بیشک اپنڑیاں لوڑاں تے جیہڑے لال کما کے آویں
ایہہ لاہم اجاڑ کے ٹریا ہاؤں اوہ لاہم وسا کے آویں
دسیں مڑ پردیس چوں ہیریاں دے اٹھ جدنڑ لدا کے آویں
عاقب 17
مک ویسن دور اداسیاں دے نہ ہسڑ میرا بھائیوال اے
بھئیں اوسن دیہنہ خوشحالیاں دے ویسیں کنڈ چوں نکل زوال اے
کجھ سمجھیا کر مجبوریاں نوں ہکلاگ نہ بنڑ ہمتال اے
اس عید تے اپڑن نئیں ہوندا بکرعید کریساں نال اے
ثمر 17
ادوں آویں جدنڑ رئیس ہو کے لئیں بنگلے ثمر خرید اے
تینوں ہر ویلے عیداں ہن ڈھول بیشک ادے ودا رہو سال مزید اے
کرچھوڑی اے صبر دی قبر دے وچ تیرے ہٹنڑ دی دفن امید اے
ایدے ہوسن ماتم سدھراں دے اودے ملکھ منیسیں عید اے
عاقب 18
سک وطن دی کلیاں بھون چھڈیائے مچھی وانگ ہاؤں روز تلیندا
اورے مکدی اے قید وچھوڑیاں دی اسے آس تے وتناؤں جیندا
آپوں عاقب ترانڑ تاں سئے مارے ان توڑے عید تے ٹکر پویندا
تیری سؤں پردیس دے پنجرے چوں میتھوں نہیں پیا نکل سگیندا
ثمر 18
ہنڑ گل دا مطلب سمجھ اچ آیا اے ہیں قید کسے دے پیار اچ
نت پیش جناب نوں ہوونڑا پوندا اے آپوں ڈاڈھیاں دے دربار اچ
گھٹ مل توں وکیا ایں ایہ ارمان اے لالچ دے گرم بازار وچ
تائیں نکی نکی پیڑ جتیندا راہناں ایہے زخم ان دل بیمار اچ
عاقب 19
تھوڑا ہوندا ایئ دل پردیسیاں دا الزام غریب تے لا نئیں
تیرا کم ایں ڈھول دلاسے دیونڑ میرا الٹا زخم ڈوکھا نئیں
لیسا اس توں ہور نیہاں کوئ نئیں انجے عاقب ساجھ مکا نئیں
تیرے کانڑ جے نیت وٹائ ہووۓ دیوے قبر دی تھار خدا نئیں
ثمر 19
رکھی آپ ہائیا شوق توں سانگیاں دی بنیاد وسار نہ چھوڑیں
بختاں دی گھوک اچ نبھیاں دی روداد وسار نہ چھوڑیں
تے ارمان توں کمدیاں ہوٹھاں دی فریاد وسار نہ چھوڑیں
پردیسیا پیار غریباں دا رکھیں یاد وسار نہ چھوڑیں
عاقب 20
تیرے نقشے اکھیں اگوں ہٹدے ای نئیں تینوں یار بھلا نموں سگدا
دوروں ویکھ کے آکھنڑاں بسم اللہ تیرے ٹھار بھلا نموں سگدا
جیویں ٹردیاں عاقب لۓ ہانی ڈسکار بھلا نموں سگدا
توں سجنڑ تاں دل دی دھڑکن ہویوں تیرا پیار بھلا نموں سگدا
ثمر 20
میرے سنج ہوۓ وطن دی سر تے بانہہ ہیئ ہٹ بلدی دا بھائیوال اے
اوداں آسیں جدنڑ غریباں نوں کر چھوڑیا ہجر حلال اے
کدھوں پار وی چن پردیس ہوندائ وڈیاں دی ٹھیک مثال اے
دریا وی اوڑک چڑھ چڑھ کے مڑ واہندن منڑیاں نال اے
عاقب 21
کی بنڑیائیں خواب اچ ای نئوں ملدا تیرے نوکر مردے پۓ نی
لڑھ لڑھ کے کملیاں اکھیاں چوں سارے خواب کھلردے پۓ نی
تیری یاد دے کھپرے کنڑبر وچ ہتھوں ڈھیر مچھردے پۓ نی
دس وطن تے نکھڑ کے عاقب توں کیویں وقت گزردے پۓ نی
ثمر 21
بس قیدیاں وانگ گزردی پئ اے اودر دے تنگ زندان اچ
راہ ویدھیاں ابھر کے لئے وینداۓ تنہائ دے تھل ویران اچ
تیتھے جنگ اخبار اپڑدی ہوسیں نفرت دے ہندوستان اچ
اتھے روز دھماکے ہجر کریندائی میرے دل دے پاکستان اچ
عاقب 22
تیرے دل دے پاکستان اچ اج کل جیہڑے دہشت گرد آباد ہن
نئیں عاقب امن دا جیونڑ دیندے گھتی رکھدے روز فساد ہن
نفرت دے خود کش حملہ آور ہک دو نئیں لا تعداد ہن
اناں پیار دے ویریاں کر چھوڑے کیئ وسدے گھر برباد ہن
ثمر 22
دس گھلیں ہا کیویں پئ نبھدی ہیئ پردیس آولیاں جائیں تے
باہیں میریاں باجھ نہ سونڑ عادی اوتھے سمنائیں کیہندیاں باہیں تے
تے ودا رئیں ہا آپنڑیاں دیساں تے چائ وتاں ہا روز نگاہیں تے
ساری زندگی ثمر گزار چھوڑیندم توئیں چن دیاں نیک صلاحیں تے
عاقب 23
بہوں اوکھے ہن ڈنگ تنہائیاں دے میتھوں نبھیاں دے حالات نہ پچھ
لتھے اوبھرے ہوندی اے اکھیاں چوں جیویں ہنجواں دی برسات نہ پچھ
جیوں عاقب چڑھدن سولی تے سونجے دل دے کل جزبات نہ پچھ
باہیں آپنڑیاں آپنڑے گل پا کے کیویں نبھدی اے ہک ہک رات نہ پچھ
ثمر 23
تینوں پئے گئے حول غریبیاں دے تینوں ڈر لگ گئے توں نکھڑ گیوں
تینوں سنگت دی پگ بنویندیاں واری کئ سر لگ گئے توں نکھڑ گیوں
تیرا لگا جوں کجھ ناہ سانگیاں تے ساڈے گھر لگ گئے توں نکھڑ گیوں
تینوں بھل گیا شاخ تے چوگ وٹاونڑ جداں پر لگ گۓ توں نکھڑ گیوں
عاقب 24
تیرا یاد اے لوڈ توں باہیں تے سوونڑاں چوگاں منہ چوں چگیاں یاد ہن
پیا کدی ناہی کھوٹ وراگ دے وچ ساجھاں ہان نروگیاں یاد ہن
اوہا منڑ دریا دی تے اوہے ریت دے کوٹھے جاہیں اجنڑ وی لگیاں یاد ہن
او جتھے عاقب رل کے کھیڈدے ہاسے او ککھاں دیاں جھگیاں یاد ہن
ثمر 24
میرے دل مجبور دے تاج محل دی وسنڑیک رہیا ایں جیہڑا چھوڑ گیا ایں
تو آپنڑیں مستقبل دے نقشے نویں لیک رہیا ایں جیہڑا چھوڑ گیا ایں
ہویوں واقف کل کمزوریاں توں جوں نزدیک رہیا ایں جیہڑا چھوڑ گیا ایں
ہنڑ واقعی لوڑ دے کجھ ناسے توں ٹھیک رہیا ایں جیہڑا چھوڑ گیا ایں
عاقب 25
میہنڑیں دے نئیں وانگ شریکاں دے کیتے قول نبھیندا وتناں
گھر بار وسار کے کے جاتا ہیئ دھکے شوق توں لیندا وتناں
تیری بھکھ نائی میدھروں ویکھ سگیندی تیرے بھار بنڑیندہ وتناں
اوکھا ہو کے وچ پردیساں دے تیرے مگر کمیندہ وتناں
ثمر 25
تینوں کہڑے بندے آکھیا اے وطن نوں چھڈ کے پردیس چوں کھٹیاں کھٹ آ
مینوں کائ نہوں لوڑ کمائیاں نوں پراں واہندی نئیں وچ سٹ آ
ساری زندگی ونجنڑ دا ناں ناں لئیں پویوںں ڈھول ٹکانڑا پٹ آ
تیری تانگ اچ زندگی مک ناں جاوے میرے جیندیاں جیندیاں ہٹ آ
عاقب 26
اجے ہنڑ تاں بخت دے مڈھ ودے بجھدن نہ ہٹنڑ تے کر مجبور اے
کیتی کرتی عاقب گل ہو ویسیں سارے خواب ہو ویسن چور اے
دینہہ ڈھیر جے ملیاں ہو جاونڑ آ ویندی مونجھ ضرور اے
رل وسنڑ پیار اچ لازمی نئیں شالا دل نہ ہوونڑ دور اے
ثمر 26
تیری زیارت جدنڑ نصیب ہو گئ ودھ ویسی نور اکھیاں دا
دیدار دا ہدیہ دگنا لۓ لۓ آ رکھ ونج بھرم نگاہاں دا
ہکلاگ مقدر کھل ویسیں بڑی مدت توں سکدیاں جاہاں دا
میرا اودر منڑکا بھندی پئ ایئ کدے رجھ گیا ایں ضامن ساہاں دا
ثمر
بھلا سجنڑ ناں گھٹیاں کانڑ ھوندن مینوں لا کے کس توں نکھڑ گئیوں
میری ثمر نیمانڑیاں اکھیاں جد گئیاں ھو بے وس توں نکھڑ گئیوں
توہیں ویکھے خاب امیر ھوونڑ دے کائ بھکھ ناں تس توں نکھڑ گئیوں
سکھاں نال جہان تے وسیۓ ھاہ ھنڑ آئ ہاہ چس توں نکھڑ گئیوں
اس دی باقی ویڈیو ملی نئیں اے
اگر کسے دوست کول ہے تاں سینڈ کرے تا کہ باقی دوہڑے وی ٹائپ کیتے جا سگن