جٹکی وسوں تے فن۔۔۔
جٹکی وسوں جنہوں کدیں وی میڈیا تے آدر ناہی ڈھہی جٹکی بولی نوں ہمیشاں ہاسے مذاق تے طنز دی نظر نال ویکھیا جاندا ہاہ۔
پہلی واری پنجابی فلم "ٹھاہ" اچ جھنگ دے جگ مشہور اداکار افضال احمد شاہ جٹکی بولی اچ ڈائیلاگ بولے تے گجگاہ پئے گئی پر جٹکی بولی نوں جانگلی آکھ کے مخول دی حد تائیں ورتیا گیا۔
ویلے دے نال نال بہوں سارے فنکاراں جٹکی بولی نوں اپنایا تے ناں کمایا۔
اج کل سوشل میڈیا دا دور اے جٹکے وسیب دے بہوں سارے یو ٹیوب چینل ہن تے اپنی بولی تے کم کر کے ناں تے پیسہ دوہنویں کمیندے پئے ہن۔
نویں فنکاراں دے نال نال پُرانے تھیٹر دے فنکار وی ویکھن نوں ملدے پئے ہن جہڑے میلیاں تے ساری ساری رات لائیو کھیل کریندے ہن۔
جنہاں دے وچ منظور کرلو بابا ہیلمنٹ ٬ کِرلی تے بشیر گھوٹو ورگے اداکار ہن جہڑے اپنے دور دے بادشاہ ہن۔
ہاسہ مذاق حیاتی دا حصہ اے تے اج دے پریشان دور اچ ویلے دی لوڑ اے پر مزاحیہ خاکیاں دے نال نال سیریس کم وی ضروری اے جوں بندیاں نوں پتہ لگے ایہہ بولی صرف ہاسے مخول دی حد تک نہیں ایہدے وچ حیاتی دا ہر انگ اے۔
پرانیاں گلاں لوک داستاناں تے راٹھاں دے قصے وی کیمرہ بند کیتے جاون۔
لکھاری نویاں نویاں اصلاحی ثقافتی ادبی کہانیاں لکھ کے شُوٹ کراون خاص کر یو ٹیوب چینلز دے ہدایت کار اس گل دا خاص خیال رکھن۔
ہر چینل دی با قائدہ ہک ٹیم ہووے تے مکمل پلاننگ نال کم کیتا جاوے۔
میں اس کم دا مُڈھ اپنے چینل پنجابی پلس تے بنھدا پیاں مینوں آس اے باقی سجن وی میری عرض تے سوچیسن۔
جٹکی بولی دی ہک نویکلی بنتر اے جہڑی بہوں اثر رکھدی اے۔
اس احساس کمتری چوں نکلو جوں ساڈی بولی ہاسے مخول تائیں اے۔
ساڈے فنکار کسے توں گھٹ نہیں اوکھے توں اوکھا کردار نبھا سگدن۔
اپنی وسوں دے فنکاراں نوں سیریس کم کرن دا موقع دیو۔
کہانی کار سجن حیاتی دے سارے موہیڑ ورت کے کہانی لکھن تاں چس آ جاوے۔
مزاح دے نال نال اصلاح وی ہووے توڑا بولی دا سُنڑہپ لوکائی تک اپڑے۔
بہوں مہربانی