Wikimedia-Inkubator jest projekt Fundacije Wikimedia, ktory služi kako testno město za potencialnyh novyh jezyčnyh versij projektov Vikipedija, Vikislovnik, Vikinoviny i Vikicitatnik.[1] Pozvaljaje koristnikam odnositeljno prostym sposobom tvoriti testne viki na jezykah, ktore ješče ne imajut svoje vlastne viki, s cěljem, že potom budut prěobračene v samostojne projekty v ramkah Wikimedije. Tute testne viki mogut byti upotrěbjane obyčno kako vsaky drugy Wikimedia-projekt.
Ačekoli ohrana ogroženyh jezykov s maloju kolikostju govoriteljev ne jest oficialny cělj fundacije, davanje občedostupnoj, bezplatnoj informacije vsim ljudam na světu, nezavisno od jihnogo jezyka, tym bolje. V slučaju takyh točno jezykov često jest tako, že Vikipedija jest jediny izvor informacije onlajn, poněkogda daže jedina enciklopedija.[2]
Da by projekt kvalifikoval se za samostojnu jezyčnu versiju jednogo iz povyših Wikimedia-projektov, trěba, že izpolnjaje dva uslovja. Prvo, dany jezyk imaje aktualny kod ISO 639. Vtoro, trěba dokazati, že projekt na danom jezyku jest žitjesposobny. K tomu minimalno tri do peti govoriteljev togo jezyka imajut v tečenju několikyh měsecev regularno rabotati nad projektom v inkubatoru.[3] Tako zvany Jezyčny komitet (Language Committee, Langcom) prijmaje rěšenje na osnově zajavky na Meta-viki, bude li zaisto započety projekt v inkubatoru.[4] Ako aktivnost v inkubatoru jest dostatočna i značna čest viki-interfejsa jest prěvedena na dany jezyk, tojže sam Jezyčny Komitet može rěšiti, že sodržanje na danom jezyku bude prěneseno iz inkubatora v vlastnu viki.[5] Takym sposobom byli založene vsego 226 projektov medžu 2006 godom i julijem 2004 goda.[6]
Wikimedia-Inkubator byl založeny v dnju 2 junija 2006 g. Pričina byla, že někoje uže raněje započete projekty na malyh jezykah ledva ili sovsim ne funkcionovali, a često byli mety spama i vandalizma. Medžučasno razne iz tutyh versij uže sut zatvorjene i uměščene v inkubatoru s možnostju, že pozdněje smogut byti obnovjene kako samostojne projekty.
Inkubator ne može byti upotrěbjeny za nove jezyčne versije Vikiizvornika i Vikiversiteta: k tomu služet, poslědovateljno: Old Wikisource[7] i Beta Wikiversity[8]. Za jezyky, ktore ne imajut kod ISO 639 jestvuje tako zvany Inkubator Plus.[9]
Referencije
edit- ↑ Ayers i dr., str. 444.
- ↑ Mushiba i dr., str. 10–11.
- ↑ Mushiba i dr., str. 10–11.
- ↑ Ayers, str. 410–411
- ↑ Gredel, str. 49.
- ↑ Incubator: site creation log. Data dostupa: 17 julija 2024 g.
- ↑ Wikisource
- ↑ Beta Wikiversity
- ↑ Incubator Plus 2.0.
Izvory
edit- Phoebe Ayers, Charles Matthews, Ben Yates (2008). How Wikipedia works : and how you can be a part of it. San Francisco: No Starch Press.
- Eva Gredel (2018). Digitale Diskurse und Wikipedia. Wie das Social Web Interaktion im digitalen Zeitalter verwandelt. Germany: Narr Francke Attempto Verlag.
- Mark Mushiba i dr. (2016). "On Persuading an OvaHerero Community to Join the Wikipedia Community", v: Culture, Technology, Communication. Common World, Different Futures: 10th IFIP WG 13.8 International Conference, CaTaC 2016, London, UK, June 15-17, 2016, Revised Selected Papers. Germany, Springer International Publishing.
Vněšnje linky
edit