Wp/isv/Občeevropejska referencijna sistema za jezyky

Občeevropejska referencijna sistema za jezyky: znanje, učenje, ocěnjanje (ang.: Common European Framework of Reference for Languages: Learning, Teaching, Assessment, fr.: Cadre européen commun de référence pour les langues: apprendre, enseigner, évaluer) jest upotrěbjajema v Evropě sistema za oprěděljenje stupnja vladěnja drugym jezykom v oblastah govorjenja, slušanja, čitanja i pisanja. ORSJ byla razrabotana Sovětom Evropy v lětah 1986–1989 kako čest projekta «Učenje jezykov za evropejsko gradžanstvo» (ang.: Language Learning for European Citizenship), a v novembru 2001 g. Sovět Evropejskoj Unije prijela rezoluciju rekomendujuču koristanje ORSJ za stvorjenje narodnyh sistem ocěnjenja jezyčnyh kompetencij, priměnimyh za vse evropejske jezyky. Tuta sistema, nyně široko prijeta kako standard za oprěděljenje něčijego znanja drugogo jezyka, različaje šest uravnjev: tri glavne uravnje označene velikoju bukvoju (A – osnovny upotrěbitelj, B – samostojny upotrěbitelj, C – kompetentny upotrěbitelj), vse poděljene na dva poduravnje označene čislom 1 ili 2.

Kategorije

A: Osnovny upotrěbitelj

A1 – Prolom (ang.: Breakthrough): početočny uravenj

Razuměje i uměje upotrěbiti znajeme vsakodnevne izrazy i velmi osnovne frazy neobhodime za zadovoljenje konkretnyh potrěb.
Uměje prědstaviti sebe i drugyh, a takože postaviti pytanja o privatnym žitju i odgovoriti na take pytanja, napr. o městu, kde žive, o ljudah, ktoryh znaje, i o věčah, ktore imaje.
Uměje vzajemodějati najprostějšim sposobom, pod uslovjem, že subesědnik govori pomalo, izrazno i jest gotovy pomogti.

A2 – Osnova (ang.: Waystage): elementarny uravenj

Razuměje rěčenja i često koristajeme izrazy svezane s oblastami bezposrědnjego značenja žitja (napr. osnovne informacije o sobě i svojej sěmji, pokupkah, městnoj geografiji, rabotě i t.d.).
Uměje komunikovati v prostyh, rutinnyh situacijah, ktore potrěbujut prosty, bezposrědnji obměn informacij o znajemyh vsakodnevnyh temah.
Uměje prostymi slovami opisati aspekty svojego proizhodženja, svojego najblizšej obsrědiny i prědmetov svezanyh s svojimi bezposrědnjimi potrěbami.

B: Samostojny upotrěbitelj

B1 – Prag (ang.: Threshold): nizši srědnji uravenj

Razuměje osnovne ideje izraznyh, standardnyh rěčenij o znajemyh temah, ktore regularno strěčaje se na rabotě, v školě, v svobodnom času i t.d.
Uměje obojdti se v večinstvu situacij, ktore mogut vozniknuti v času putovanja v krajině, kde govori se danym jezykom.
Uměje sostaviti prosty, doslědny tekst na temy, ktore sut znajeme ili odnoset se k osobnym interesam.
Uměje opisati vpečetljenja, sobytja, mečty, naděje i ambicije, kratko opravdyvajuči ili objasnjajuči svoje mněnja i plany.

B2 – Obzor (ang.: Vantage): vysši srědnji uravnej

Razuměje glavne ideje složenyh tekstov na konkretne i abstraktne temy, vključno s tehničnymi diskusijami v oblasti vlastnoj specializacije.
Uměje porazuměvati se natoliko bystro i spontanno, že obyčny razgovor s rodnym govoriteljem danogo jezyka jest možlivy bez napruženja za kojejkoli iz stran.
Uměje stvoriti izrazny, podrobny tekst o širokom obsegu tem i objasniti svoje stanovišče o obgovorimom problemu, prědstavjajuči prědnosti i nedostatky raznyh variantov.

C: Kompetentny upotrěbitelj

C1 – Efektivno operacijno vladěnje (ang.: Advanced): vysoky uravenj

Razuměje obširny obseg složenyh, dolgyh tekstov i razpoznavaje skryto značenje.
Uměje izsloviti se bystro i spontanno, nahodeči prigodne slova i izrazy bez očevidnogo truda.
Uměje gybko i efektivno posluživati se jezykom za socialne, naučne i profesionalne cělje.
Uměje stvoriti jasny, dobro strukturovany i podrobny tekst na složene temy, pokazyvajuči vladěnje organizacijnymi vzorami, sveznikami i objedinjajučimi ukazateljami.

C2 – Vladěnje (ang.: Mastery): uravnej sovršenogo vladěnja

Legko razuměje praktično vse, čto slyši ili čitaje.
Uměje rezumovati informacije iz različnyh ustnyh i pisanyh žrl, tvoreči suvislu prezentaciju na osnově rekonstrukcije prědstavjenyh faktov i argumentov.
Uměje izraziti se spontanno, mnogo svobodno, bystro i točno, različajuči medžu subtilnymi odtěnkami značenij daže v najbolje složenyh situacijah.

Wp/isv/Občeevropejska referencijna sistema za jezyky

Kategorije

A: Osnovny upotrěbitelj

B: Samostojny upotrěbitelj

C: Kompetentny upotrěbitelj

Vněšnje linky

Osnovne

Druge