Wp/isv/Narodna partija za svobodu i demokraciju

Narodna partija za svobodu i demokraciju

Volkspartij voor Vrijheid en Democratie (VVD)

Politična partija v Niderlandah
Ideologija	pravičarsky liberalizm
Vodž	Dilan Yeşilgöz-Zegerius
Prědsědatelj	Eric Wetzels
Založenje	24 januara 1948
Povstala iz fuzije	PvdV, čest VDB
Odščepjenja	PVV
Členstvo	22.473 (1 januara 2024 g.)
Členi v Izbě deputatov	24 (iz 150)
Členi v Senatu	10 (iz 75)
Členi v Evroparlamentu	4 (iz 31)
Medžunarodna organizacija	Liberalny internacional, Partija aliansa liberalov i demokratov za Evropu (ALDE)
Mladežna organizacija	Mladežna organizacija «svobodu i demokracija» (JOVD)
Kolory partije	modry, oranževy
Glavno sědališče	Mauritskade 21, 2514 HD Haga
Služebny vebsajt	vvd.nl

Narodna partija za svobodu i demokraciju (nid.: Volkspartij voor Vrijheid en Democratie, VVD) jest pravičarsko-liberalna politična partija v Niderlandah.

Historija

Poslě okupacije němečskoj podčas Vtoroj vsesvětskoj vojny nastupila v Niderlandah kompletno obnovjenje ustroja političnyh partij, t.zv. «prolom». V 1946 g., na osnově prědvojennoj Liberalnoj državnoj partije (nid.: Liberale Staatspartij, takože znajemoj pod nazvoju Svez svobody (nid.: Vrijheidsbond)), byla založena Partija svobody (nid.: Partij van de Vrijheid, PvdV). V tomže samom godu, prědvojenna lěvičarsko-liberalna partija Liberalno-demokratična svez (nid.: Vrijzinnig-Democratische Bond, VDB) slučila se medžu drugymi s socialdemokratičnoju SDAP v Partiju truda (PvdA). Jednakože po mněnju několikyh byvših členov VDB tuta nova partija byla prěmnogo črvena, i v 1947 g. grupa pod vodstvom byvšego lidera VDB, Pieter Oud, opustila ju. V subotu 24 januara 1948 g. PvdV i byvši členi VDB na sjezdu v Amsterdamu slučili se v novu partiju, Narodna partija za svobodu i demokraciju (VVD). Oud stal liderom tutoj novoj partije.

V prvyh vladah premier-ministra Willem Drees VVD i PvdA vladěli zajedno s dvoma hristijansko-demokratičnymi partijami, ale poslě 1952 g. VVD uže ne učestvovala v koalicijah. Pravičarska VVD i lěvičarska PvdA vse bolje stali diametralno protivnymi sobě polusami, ktore izključali se vzajemno. V lětah 1959–1965, 1967-1972, 1977–1981 i 1982–1989 VVD učestvovala v vladah kako menši partner hristijansko-demokratov. Toliko v 1994 g. došlo ponovno k surabotě s PvdA v t.zv. «purpurnoj koaliciji».

S izključenjem perioda 2007–2010 VVD poslě 1994 goda bezprěryvno učestvovala vo vsih niderlandskyh vladah. V parlamentarnyh izborah 2010-ogo goda VVD prvy raz stala največšeju partijeju, čto dovedlo k četyrem vladam jejnogo lidera Marka Rutte’a. Od julija 2024 g. VVD jest čest vlady bezpartijnogo Dick Schoof, v ktoroj takože učestvuje krajno pravičarska Partija za svobodu (PVV).

Rezultaty v izborah

Rezultaty PvdV (1946) i VVD (od 1948) v parlamentarnyh izborah (čislo izbranyh deputatov v Vtoroj izbě).

Spisok vodžev partije

Lider partije			od / do
		Dirk Stikker (1897–1979) (lider PvdV)	23 marca 1946 – 28 januara 1948
		Pieter Oud (1886–1968)	28 januara 1948 – 16 maja 1963
		Edzo Toxopeus (1918–2009)	16 mei 1963 – 1 oktober 1969
		Molly Geertsema (1918–1991)	1 oktobra 1969 – 1 julija 1971
		Hans Wiegel (1941)	1 julija 1971 – 20 aprilja 1982
		Ed Nijpels (1950)	20 aprilja 1982 – 9 julija 1986
		Rudolf de Korte (1936–2020)	9 julija 1986 – 15 dekembra 1986
		Joris Voorhoeve (1945)	15 dekembra 1986 – 30 aprilja 1990
		Frits Bolkestein (1933)	30 aprilja 1990 – 30 julija 1998
		Hans Dijkstal (1943–2010)	30 julija 1998 – 16 maja 2002
		Gerrit Zalm (1952)	16 maja 2002 – 27 novembra 2004
		Jozias van Aartsen (1947)	27 novembra 2004 – 8 marca 2006
		Mark Rutte (1967)	31 maja 2006 – 14 avgusta 2023
		Dilan Yeşilgöz-Zegerius (1977)	14 avgusta 2023 – dnes