Wp/isv/Joškar-Ola

Joškar-Ola (russky i lugomarijsky: Йошка́р-Ола́ «Črveny grad»; gornomarijsky: Якшар-Хала; raněje: lugomarijsky Чарла, gornomarijsky Цӓрлӓ) jest glavny grad Republiky Marij El v Rosijskoj Federaciji. Kromě togo, Joškar-Ola jest jedin iz glavnyh centrov kultury ugrofinskyh narodov. Naseljenje grada sostoji se iz 285 042 ljudij (2024 g.).^[1] Največše narodnosti sut Rusi (69,90%), Marijci (23,60%) i Tatari (3,31%).^[2]

Joškar-Ola jest jediny grad v Rosiji s imenem načinajučim se od bukvy «Й».^[3]

Historija

Grad byl založeny v 1584 godu na zemjah Čeremisov (ustarěla nazva Marijcev) kako vojenna tvrdža v času tretjej čeremisskoj vojny v svezi s pokorjenjem russkoju državoju Kazanskogo hanata i drugyh odščepkov byvšej Zlatoj Ordy. Do 1919 g. nazyval se Carevokokšajsk (rus.: Царевококшайск), potom od 1919 do 1928 g. Krasnokokšajsk (rus.: Краснококшайск), a od januara 1928 g. Joškar-Ola. V Sovětskoj erě, osoblivo poslě Vtoroj vsesvětskoj vojny, grad byl regionalno srědišče promysla i transporta, rastuči do dnešnjih razměrov. Jednakože iz pričiny razpadu Sovětskogo Sojuza umětny podpor za neefektivne državne kompanije odpadl i večinstvo produkcijnoj dějateljnosti izčeznul. Poslědovateljno čest naseljenja prěselila se v večših gradov Rosije.

Vslěd novogo zabudovanja gradskogo centra za vodstva Leonida Markelova (prezident republiky 2001–2015, glava republiky 2015–2017), grad harakterizuje se dost neobyčnoju arhitekturoju, inspirovanoju niderlandskym i italijanskym vozrodženjem. Hvala tomu Joškar-Ola nazyvaje se «Evropoju v centru Rosije», a takože «Venecija Markelova», i privlěkaje mnogo turistov.^[4]^[3]