Wp/isv/Znakovy jezyk

Znakovy jezyk ili gestovy jezyk (ang.: sign language) jest jezyk, ktory koristaje nagledno-ručne srědstva, da by prědavati informaciju medžu ljudami. Znakove jezyky koristajut ručnu artikulaciju razom s neručnymi elementami. Oni sut polno prirodne i imajut vlastnu gramatiku i leksikon. Znakove jezyky ne sut vsesvětne i ne imajut vzajemnoj razumlivosti medžu soboju, hot medžu znakovymi jezykami i sut neobyčne podobnosti.

Dva muža i žena, ktori molvet na amerikanskom znakovom jezyku.

Jezykoznavci mnet kako ustno, tako i znakovo sporazuměvańje tipami prirodnyh jezykov, že znači, že obadva zarodili se črěz abstraktny dolgy proces i razvivali se bez podrobnogo planovańja. Vsekde, kde jestvujut občiny gluhyh ljudij, oni razvivali znakove jezyky kako koristny sposob sporazuměvańja, i one sut osnova městnyh kultur gluhyh. Hot znakove jezyky i koristajut glavno gluhi i slabo slyšeči ljudi, jih takože mogut koristati ljudi so sluhom, napriklad ktori ne mogut fizično govoriti, ktori imajut problemy s ustnymi jezykami za nepolnomožnost ili hvorobu, i ktori imajut gluhyh členov sěmji i prijateljev, osoblivo "děti gluhyh vozrastlyh".

Nemaje točnoj informacije, koliko vsego znakovyh jezykov jestvuje v světu. Vsaky kraj generalno imaje rodny znakovy jezyk, a poněktore imajut veče jednogo. Žurnal "Etnolog" v 2021 roku imal 150 znakovyh jezykov. Poněktore znakove jezyky imajut zakonno poznańje kako služebne jezyky držav.

Klasifikacija

Hot znakove jezyky i zarodili se prirodno v občinah gluhyh, ktore byli medžu ustnymi jezykami, oni ne imajut odnošeńja k njim i imajut iny gramatičny ustroj v osnově.

Rodiny znakovyh jezykov na kartě světa

Hot klasifikovati znakove jezyky i trudno, uděljajut poněktore rodiny znakovyh jezykov:

• rodina francuzskogo znakovogo jezyka
  • rodina russkogo znakovogo jezyka
  • rodina češskogo znakovogo jezyka
• rodina amerikanskogo znakovogo jezyka
• rodina danskogo znakovogo jezyka
• rodina švedskogo znakovogo jezyka
• rodina němečskogo znakovogo jezyka
• vietnamske znakove jezyky
• arabska rodina znakovyh jezykov
• indopakistansky znakovy jezyk
• kitajsky znakovy jezyk
• rodina japonskogo znakovogo jezyka
• britansky, avstralijsky i novozelandsky znakovy jezyk
• južnoafrikansky znakovy jezyk
• izolovane znakove jezyky

Vněšnje linky

• Tutoj članok imaje prěvod iz članka "Sign language" v Vikipediji na anglijskom (spis avtorov; dozvoljeńje CC BY-SA 4.0).