Wp/isv/Dick Schoof

Dick Schoof, polno ime: Hendrikus Wilhelmus Maria Schoof (Santpoort, obč. Velsen, 8 marca 1957 g.) jest niderlandsky politik i byvši činovnik, ktory od 2-ogo julija 2024 g. jest premier-ministr Niderlandov.

Dick Schoof v 2024 g.

Kariera kako činovnik

Dick Schoof (izgovor: Dyk Shouf) studioval planologiju na Katoličskom universitetu v gradu Nijmegen v lětah 1975-1982. Potom nastupila dolga kariera kako činovnik, medžy drugymi v Asociaciji niderlandskyh občin (VNG) i v Ministerstvu obrazovanja, kultury i nauk. V lětah 1996-1999 byl zastupnik generalnogo sekretara (vtory najvysši činovnik) v Ministerstvu Spravědlivosti, v lětah 1999-2003 byl glavny direktor Služby za imigraciju i naturalizaciju (IND), v lětah 2003-2010 generalny direktor za publičny poredok i bezpečnost v Ministerstvu vnutrišnjih děl, a v lětah 2010-2013 generalny direktor za policiju v novom Ministerstvu bezpečnosti i spravědlivosti.

V lětah 2013-2018 Schoof izpolnil funkciju Narodnogo koordinatora borby s terorizmom i bezpečnosti (NCTV), poslě čego stal generalny direktor Občej služby razvědky i bezpečnosti (AIVD). Nakonec, v 2020-om godu stal generalny sekretar v niderlandskom Ministerstvu spravědlivosti i bezpečnosti.

Premier-minister

Parlamentarne izbory v novembru 2023 neočekyvano izigrala krajno pravičarska Partija za svobodu (PVV) Geerta Wildersa. Druge pravičarske partije, ktore prědže izključali vsekako surabotničstvo s PVV, tutčas byli prinudžene k surabotě ili s lěviceju, ili s PVV. V koncu tri partije izbrali vtoru opciju i suglasili se na stvorjenje koalicije s PVV: liberalna Narodna partija za svobodu i demokraciju (VVD), partija Novy socialny kontrakt (NSC, odščepjenje od hristijansko-demokratičnogo CDA) i Zemjedělsko-gradžansko dviženje (BBB). Jednakože uslovje bylo, že Wilders ne stane premier-ministr, i vodži vsih četyreh partij ostanut v parlamentu. Togda načela se dolgo iskanje kandidata na premier-ministra, podčas ktorogo razni kandidati odpadli ili odkazali. V dnju 28-ogo maja 2024 g. bezpartijny Schoof byl prědstavjeny kako obči kandidat na premier-ministra, a 2-ogo julija togože goda jegova nova vlada byla zaprisežena.