粵語，又講“廣東話”或者講“白話”，是漢藏語系漢語語族下頭個一隻言語，講啯種話個人主要住待廣東中西部、廣西中南部、香港、澳門，跟其他有華人定居個國家或地區。緣由是中國個古代講南方叫“百越”，且古代“越”跟“粵”是通假字，於是稱其「粵語」。
到而今，講啯種方言個人有6.6千萬到1.2億。廣州話是其個標準音，但廣東有夥多個人口流動，且香港個經濟跟文化產業夥發達，所以粵語個中心實際早就轉移到噠香港。不過，香港話跟廣州話講起來還是有點丫子區別個。
從語言學分類上頭講，中國北方個學者，跟兩廣或西方學者間有蠻大分歧。待中國國內，幾多個漢語方言研究者把粵語看作漢語方言，其俚講現代漢語是只單一言語；另一部分個國內學者跟西方語言學家則講粵語是只獨立個言語（同地位個還有：湘語、贛語、閩語、客家話、晉語，跟吳語，認為其俚跟官話平級）。其俚各有自家個論據。