Wp/fit/Somalia

< Wp‎ | fitWp > fit > Somalia
Flag of Somalia.svg
LocationSomalia.svg

Somalia (somaliksi Soomaaliya, arab. ‏الصومال‎, al-Ṣūmāl) on maa Aafriikan sarvessa, Itä-Aafriikassa. Maan pinta-ala on noin 638 000 kvatraattikilometriä ja väkiluku noin yheksän miljoonaa. Somalian suuriin väestöporukka on somalit. Somalian tasavalta (somaliksi Jamhuuriyadda Soomaaliya, arab. ‏جمهورية الصومال‎, Jumhūriyyat al-Ṣūmāl) perustethiin vuona 1960. Aluksi se tunnethiin paimentolaistemukratiina, aina siihen asti kun Siad Barre kaappasi vallan vuona 1969 ja perusti Somalian temukraattisen tasavallan, joka hajosi 1977 puhjenheen kapinoinin ja 1980-luvun lopula alkanheen sisälissoan seurauksena vuona 1991.

Valta on maan eteläosassa Yhistyneitten kansakuntien (FN) tunnustaman väliaikaishallituksen ja pohjoisosassa tunnustamattomitten Somalimaan, Galmudugin, Puntmaan ja Maakhirin käsissä. Väkivalta on lissäintyny väliaikasen hallituksen kukistettua islamilaisitten tuomioistuimitten vallan Etiopian joukoitten avula vuoen 2006 lopula. Kaikki armeat saavat toimheentulonsa ryöstelylä ja huume­kaupala. Rosvojoukot vaivaava maaseutua.

Somalia kuuluu mailman köyhimphiin maihin, ja se on kans turvattomimpia. Maata vaivaa kans luonnonkatastrofit ja kuivuus. Pohjois-Somaliassa on kuivaa tunturimettää, etelässä puolikuivaa savannia. Somalian rannikon pittuus on yli 3 000 kilometriä. Rannikon pittuuen vuoks vuoen 2004 tsunami aiheutti Aafriikan maista suuriinta vahinkoa Somaliassa. Sekasortoisen tilan vuoks rannikole on tuottu kaatopaikkajätettä ja merheen prupleemijätheitä. Ulkomaisitten troolareitten salakalastus on pääosin loppunu Puntmaan alueela toimivitten merirosvoitten vuoks.