Puoskari paransi tautia monela tavala, mutta selvästi sen voimat olit heiomat kun noijala. Noita saapi manalaiset liikheele mutta puoskari se ku vain muuten parantaa. Yks ylheinen puoskarin tapa parantaa monta eri tautia oli ette puhaltaa kipehään eli pahhaan, useasti vammoja ja rupia.
Koskemat ja vammat vain on semmosia viholisen puhaluksia. Puhalusmiehet niitä paisheita puhalsit ja pyörytit. Fiinan äitivainaa niitä puoski messinkikammala. Paino, puhalsi, ja sylki ja viskutteli ja parani se kyllä. Ei se luopunu ennenku se märki. Välistä puoskari muuta ku hieroo ja hautheita laittaa. Ekseemin meni parantaa. Lehmiäki paranethiin puhaltamalla.
Palon Oskari Yrttivaarasta vain kattoi poikaa ja rupi alkoi märkimhään ja sitten kuivamhaan ja rupi putos poies. Mutta Oskari sanoi ettei saanu pestä kattottua ennenku puoskiminen oli valmis. Oskari meinasi ette Raamatusta löytää kaikki tiot ja voimat.
Kompelusvaarassa tiethään ette kun on vesi menny haavhaan se otethaan rannalta vesikivi painethaan sanoen: -Vesi vanhin veljeksistä, tuli nuorin tyttäristä, ota okhes veä väkkees kivule kivun vaajale, ihmisen iho vaajan. Terfheeks kolme kertaa. Sillä painethaan sitä haavaa. Rovaniemelä olthaan varmana ette jos joku on eriluontonen se on eri vesilä pesty.
Nilivaarassa oli puoskari joka paransi kaivonveellä. Nouti kupilisen vettä kaivosta ja antoi kipeäle. Paransi kaikkea, reumatismiaki. Oli useasti paljon väkeä sielä hakemassa apua, sanoi Moskojärven puoskari Olov Reinfors. Ylilääkäri Anderssonin huonot jalat hän paransi. Ei ottanu maksoa, mutta lääkäri antoi sille kellon. Ihmiset soitit hälle ja hän sanoi: -Juo kahvikupin kraanavettä niin tullee hyvä. Se auttoi! Puoskari piti ittekin kummalisena ette kraanavesi paransi.
Kun usko hävisi niin katosit kans puoskarit ja kattojat. Usko se paransi, meinasi puoskari Olov Reinfors, Moskojärveltä. Sen parempi ja kuuluisampi usko miehen voimhiin sen paremin se puoski, meinasi muu Skaulon mies joka uskoo ette puoskarit osasit käyttää hypnoosia ja psykolokiita. Kuusihuornaksen typheyttäjä meinasi ette oli vaikein typheyttää lähimäisiä ja hyvin tuttuja.
Ei koskhaan saanu antaa rahhaa puoskarille. Toinen puoskari sanoi: -Ei saa maksaa jos ei ole varoja. Yks lääkäri sai ekseemin paranetuksi puoskarin juomala ja maksoi 3000 kruunua. Harva puoskari haluaa opettaa taitoja muile. Pölkäävät ette voima heikkenee jos sitä levittää muile.
Puoskaria on vieläkin ja muutamat on hyvinki kuuluisia aina eteläruothiin asti.
Kattokaa edit
Lissää tietoja: Kansansusko
Lähteet edit
Katto Kansanusko