Maahiainen edit
Haltiat ja maahiaiset on hyvin samanlaisia. Ero on kuitekki ette haltiat on useasti punasissa vaatheissa ja on useasti siivomat kun maahiaiset joita pittää vähän pölätä. Jokku kyllä on sekottanheet nämät käsitheet.
Kittilässä meinathaan ette maahiainen saattaa mettässä suostuttaa ihmistä ja viä matkassa. Rovaniemelä tiethään ette on maahiaisten polkuja. Diirivaarassa Erik Älgdahl ja poika näit keskelä kesäpäivää kun maahiaiset, neljä niitä oli, tehit heinää järven rannala. Miehet luulit niitten olevan ihmisiä ja lähit lähemäksi kysymhään jos net on saanheet kallaa järvestä. Net menit sinne, mutta kun tulit lähemäksi ei sielä ollu kethään, eikä kukhaan ollu tehny heinää. Erik Älgdahlin isä oli useasti nähny miehen ja lyhyn pojan kalastavan, ja net olit maahiaisia.
Skaulossa mies meinaa ett maahiasiet on sellaiset sivuolenot matalamassa arvossa kun haltiat. Maahiaiset häirittevät meitä jos paskantaa ja tekkee tarpheita väärässä paikassa. Sillon saapi maahiaiset matkhaan. Nattavaarassa on samanlainen perine, mutta sielä net on taasen haltiat, jokka useasti asuvat navetan laattian alla. Kerranki lehmä katosi yhestä hinkalosta, kuoli eli meni jänkhään. Vanhaa ämmä näki unessa haltian joka sanoi: -Sie häyt siirtää sinun lehmän koska se kussee meän pöyäntuukile. Ei net haltiat tykkää siitta ja siksi lehma kuoli. Toinen emäntä kuuli mutinaa ja pani maata navetanlaattiale ja näki haltian parren raosta joka sano emänäle: -Sie häyt siirtää lehmän koska se kussee meän pöyäle.
Kuusihuornaksessa tavalinen vaimo tavalisissa vaatheissa herätti miestä mettäkämpässä ja sanoi: -Sie olet paskantanu meän pöyäle. Mies nukahti ja vaimo tuli herättämhään ja kolme kertaa selittämhään sen saman asian. Mies oli laskenu kuusen alle. Eikä saanu rauhaa ennen ku kävi korjaamassa paskan, sanoi miehen poika Algot Eriksson. Haltiat häirittevät sillon ku joku on semmosessa paikassa missä se ei saa olla, tiethään Nattavaarassa.
Kittilässä emäntä autto synnyttää maahiaislapsen ja sano lapsele: -Älä koskhaan kiusaa mithään matelevaa tai muuta luontokappaletta. Mie olin se sammakko.
Kattokaa edit
Lissää tietoja: Kansansusko
Lähe edit
Birger Winsa 2007. Manalaisitten kirja - Andarnas bok. Meänkielen förlaaki: Skogås.[[1]]