Wp/blc/ItNuxalkmc

< Wp‎ | blc
Wp > blc > ItNuxalkmc

Kamalh alh7alhtsimnu ala slhk'mstanaw wa Nuxalkmc ts, tsutaw s7itNuxalkmcnu. Smatmctmacws wa slhk'mstanaw wa itNuxalkmc ts ala slhk'mstanaw wa Ats'aaxlhmc ts, wa Istamc ts, n wa Nutl'lmc ts. Tsutsutakw' alh ti suncwt s7itNuxalkmcaw wa csuuts wa tl'msta ts, tcamatlhhaw wiclhtu csuuts tu amat t'axw.

Wayclh t'ayc stl'yuk's - alh tu ayk' txw, tsutaw s7itNuxalkmcaw wa Nuxalkmc ts - wa tanapsulh ts alh Nuxalk. Kamalh Talyumcnu, tsutakw' s7itTalyumclhnu.

Kamalh lhk'mnu ala slhk'msta ats, tsutaw wa acwlh ts s7isNuxalkmcnu [1], sNuxalkmcutsnu [2][3], s7itSawasnu[4].

nitsmnicilh tuts' wa slhk'mstalh ts edit

Alh7ay its'ik alh Nuxalk, snanicikmilh ts'n wa slhk'mstalh ts. Aylhaw ti kapmnt tc n wa an7aq'uliikw ts s7ip'tulht ula skulaw ats, wa alh7ayutsmim "residential" wa skul ts. Sculhlamtulht ska itSaawasilh alhtxw - isq'isaakmtulht ka aylh. Tic ti si7aytutim tu lhikw'lcaaxtalh ti si7axw anaykaw ska acwsalctumulht ala slhk'mstalh ts - paaxunaw tsk ska isq'isaakmtinilh tuu c tu s7alh7aytutim ats alhtxw.

i7axw ts' atmnlstilh ca csuuts wa nuxalkmcutsaylayc wa tl'mstnuksilh ts - numusiinaw mits'ik.

Axkuks yalhkaycis skmas ti slq'ilh tc, wics alhnapilh sksnmakilh sinitsmnicilh wa slhk'mstalh ts. lhk'maylaycaw wa acwlh ts ala apsulhilh ts alh ti suncwt - acwsalctutim ska lhk'maw s7anats'ktulhaw. Aytutim tuu wa mnmntsii ts s7acwsalctimutaw ala slhk'mstalh ts alh Acwsalcta.

Qulhuutsim tuu wa slhk'mstalh ts - ts'xmaycs slaxs tu kslhtut wa nuslax wa tl'msta situulwamktsutaw wa putl'lt ts ska acwsalctimutaw tuts' ska itNuxalkmcaw. Anustsayanmlh ula lhikw'lcaaxtalh ts s7alhtsimaw alh Nuxalk Radio - Acwsnictilh tuu wa tsatsluksii ts, wa siksnmak alh tu radio tx, s7itnuxalkmcaw.

Smaw ti sl'qilh tc ala kstulh - s7aytulh sinitsmtum wa slhk'mstalh ts. Way

  1. Amos Tallio
  2. Amos Tallio
  3. Arthur Pootlass
  4. Arthur Pootlass