Tic Wikat ti staltmc alh Ats'aaxlh. Wic Godfrey Tallio wa itts'xlhiixw wa skwatstas. Tic Deaf George ta mans tx, tsics Edith (Syut) ilh stans ilh. Alhtalaws tx ulh Louisa Tallio (Nuximlaycana). Tic ti Qwaxw tc ti skw'alhtntas tx. Wicanaw ta Jim, ta Jerry, ilh Maureen, ilh Mildred, n ta Rob wa mnmntsis ts. Pustutit tuu Kirsten n Cassidy, wa slh7imtss ts. Slaxmitsuts tx n Nuximlaycana ca slh7imtsaw ts n wa slalimtsaw ts.
Tl'aptum Wikat ula skul ts alh Mlq'is.
Ksnmaks Wikat ala apsulhilh ts, alh Q'umk'uts. Ays tx sinuxums wa nuya wa qla ula sulhuks ts. Tic Wikat ti kstcw wa mnmnnta ts alh Stsatsxwan, ala mnmnta ts ulh Numtaaxayc. Ays tx n Nuximlaycana sqwyutsit wa numutstanaw ts ula tsatsluksiilh ts alhtxw siclhsulhaw txw kamalhpaaxulhlas wa tsnlhaw ts. Lhkw'mtim ats c tu nuslax txw. Kamalh lhkw'lcs tx, q'slits'amktsuts ala slhk'mstalh ts, qulhuutsim tx c Nukikliktmacw, was s7acwsalctutis wa acwlh ts ala slhk'mstalh ts. Putl's kw'its'ik ulh Acwsalcta ala tsay wa kp wa winsti ts si7alhpstmacwilh alhtxw, s7itnuxalkmcilh.
Smayusta edit
Alh tu ayk' txw s7ixwams tu imlk tx ula Nusqaps-tum wa anuxum ts[1], alh7ayutsmim tuu ca Tscina.[2] Paaxim ca sWikat alhtxw. Lip'tsuts tx ulh Ats'aaxlh.