Eleanor Schooner tum ilh cnas ilh7aylh, ilh k'cicw ilh alh tu alhqulhuus t'ax. Wic Suncwana wa itnuxalkmciixw wa skwatstas ilh. Qwaxwn ilh alh Margaret Siwallace. Talaws ilh alh Peter Schooner. Clhmnays ilh c ilh Rhonda Sandoval n ta Jamie Schooner.
Smawtsiinaw s7itnuxalkmcaw tu amatalaaxts Suncwana, sqiqtiis. Wic its'ik si7alhnapliwas ilh ala slhk'mstalh ts - Anutsnmis wa stl'yuk' ts kamalh7acwsnicis ts. Tqanliwas ilh sqiqtis, wic its'ik siyuumliwas tsc alh ti s7alh7ayutss ala matl'ap ts.
Ksnmak ts'n tsc alh Acwsalcta, acwsalctutis wa mnmntsilh ts ala sininitsilh ts snuxalkmcilh - wa snknicilh ts. Ays tuu ilh s7akwas ca snuqaqaytiiqw - alhkaltcwmis tuu wa alhqulhaw wa slax wa pisnis ts.
Acwsan tuu ilh ala ixsalh ts - yalctnms ilh. Kamalhkmalclaycs tu kwtmts c tu cancer tx, yalclaycayniclhis tx ca ixsalh ts.
Acwsans tuu ilh alh ti st'qwla - t'qwlatis wa ts'la ts.