Wikimedia Incubator

Wn/shn/ICJ ပၢၵ်ႈပႅတ်ႈ လွင်ႈမၢပ်ႇမႂ် တႃႇႁႂ်ႈၵျႃႇမၼီႇၵိုတ်း လွင်ႈၵမ်ႉထႅမ်ၵၢၼ်သိုၵ်း ဢိတ်ႇသရေး

< Wn | shn
Wn > shn > ICJ ပၢၵ်ႈပႅတ်ႈ လွင်ႈမၢပ်ႇမႂ် တႃႇႁႂ်ႈၵျႃႇမၼီႇၵိုတ်း လွင်ႈၵမ်ႉထႅမ်ၵၢၼ်သိုၵ်း ဢိတ်ႇသရေး

ဝၼ်းပုတ်ႉ၊ မေႇ 1၊ 2024

လိၵ်ႈႁွမ်တွမ် ၸိူဝ်းၵဵဝ်ႇၵပ်း
မိၵ်ႈမၢႆ လွင်ႈငမ်းယဵၼ် ၼႂ်းၵႄႈ ဢိတ်ႇသရေး လႄႈ ပႃးလဵတ်ႈသတၢႆး
ႁူမ်ႈသၢင်ႈ!
ၵႃးတင်ႉ ဢိတ်ႇသရေး

လုၵ်ႉတီႈ လုမ်းတတ်းသိၼ်ၵူႈမိူင်းမိူင်း ဢၢႆႇၸီႇၵျေႇ လႆႈပၢၵ်ႈပႅတ်ႈ လွင်ႈဢၼ် မိူင်းၼီႇၵႃႇရႃႇၵႂႃႇ လႆႈမၢပ်ႇမႂ် ၼိူဝ် မိူင်းၵျႃႇမၼီႇ တႃႇႁႂ်ႈၵိုတ်း လွင်ႈၸွႆႈထႅမ်ၵၢၼ်သိုၵ်း ဢၼ်ပၼ် ဢိတ်ႇသရေးယူႇၼၼ်ႉ ၼႆယဝ်ႉ။ ၽူႈတတ်းသိၼ်ဢၢႆႇၸီႇၵျေႇၶဝ် လႆႈတႅပ်းတတ်း မိူဝ်ႈဝၼ်းဢင်းၵၢၼ်းၼၼ်ႉဝႃႈ တႃႇလုၵ်ႉတီႈ လုမ်းတတ်းသိၼ် တေ တမ်းဝၢင်ႈၶေႃႈတႅပ်းတတ်းတြႃး ဢၼ်ၼႆႉ ၵဵဝ်ႇၵပ်းလူၺ်ႈၵူတ်းမၢႆ ဢမ်ႇမီးလွင်ႈမၼ်ႈၵႅၼ်ႇ ဝႃႈၼႆယဝ်ႉ။

လုၵ်ႉတီႈ လုမ်းတတ်းသိၼ် လႆႈငိၼ်းထွမ်ႇ လွင်ႈပၼ်တၢင်းၸွႆႈထႅမ် ၵၢၼ်သိုၵ်း ဢိတ်ႇသရေး တီႈလွင်ႈသုၵ်ႉယုင်ႈၵႃႇၸႃႇၼၼ်ႉ ၵျႃႇမၼီႇၼႆႉ ၸွင်ႇမၼ်းၶဝ်ႈပႃး ၼႂ်း လွင်ႈၶႃႈမူၺ်ႉၶိူဝ်းၵူၼ်း ဢၼ်ဝႃႈၼၼ်ႉယဝ်ႉ။ မိူင်းၼီႇၵႃႇရႃႇၵႂႃႇ လႆႈမၢပ်ႇမႂ် ၵျႃႇမၼီႇဝႃႈ လွင်ႈဢဝ်ၶိူင်ႈလၢၵ်ႈၼၢၵ်ႈ သူင်ႇပၼ် ဢိတ်ႇသရေးၼႆႉ မၼ်းပဵၼ် လွင်ႈပူၼ်ႉပႅၼ် ၶေႃႈၽွမ်ႉၸႂ်ၵူႈမိူင်းမိူင်း တႃႇၵႅတ်ႇၵင်ႈလွင်ႈၶႃႈမူၺ်ႉၶိူဝ်းၵူၼ်း 1948 ၼၼ်ႉ ဝႃႈၼႆယဝ်ႉ။

လွင်ႈဢၼ်လႆႈမၢပ်ႇမႂ်ၸိူင်ႉၼႆၼႆႉၵေႃႈ မၼ်းဢိင်ၼိူဝ် လွင်ႈဢၼ် ဢၢႆႇၸီႇၵျေႇ ၶဝ် လႆႈႁၼ်ဝႃႈ တီႈၵႃႇၸႃႇၼၼ်ႉ လႆႈႁၼ်ၽၢင်ႁၢင်ႈ ဢိတ်ႇသရေးၶဝ် ႁဵတ်းလွင်ႈၶႃႈမူၺ်ႉၶိူဝ်းၵူၼ်း ၼႆၼၼ်ႉယဝ်ႉ။ ၸွမ်ၽွင်းလူင် ဢိတ်ႇသရေး ၼႄႇတၼ်ႇယႃႇႁု လၢတ်ႈမိူဝ်ႈ ဝၼ်းဢင်းၵၢၼ်းၼၼ်ႉဝႃႈ ပေႃးသွၼ်ႇဝႃႈ လွင်ႈတိုၵ်းတေႃး ႁႃးမၢတ်ႉသ် တီႈၵႃႇၸႃႇၼႆႉ မၼ်းပဵၼ် လွင်ႈႁဵတ်းၵၢၼ်ၽိတ်းၽိင်ႈၼႆသေ သင်ၸိူဝ်ႉဝႃႈ လုၵ်ႉတီႈ လုမ်းတတ်းသိၼ်ၵူႈမိူင်းမိူင်း ဢၢႆႇၸီႇၸီႇသေ လႆႈပိုၼ်ဢွၵ်ႇဝရၢၼ်းတႃႇတိၺွပ်း ၽူႈမီးပုၼ်ႈၽွၼ်း ဢိတ်ႇသရေးၶဝ် ၼႆၸိုင် ၼႆႉ မၼ်းတေ ပဵၼ် လွင်ႈႁဵတ်းသၢင်ႈဢၼ်ယႃႉသလေႇ ၵိုၵ်းပိုၼ်းၵႂႃႇ ဝႃႈၼႆယဝ်ႉ။ ၵပ်းၵၢႆႇလူၺ်ႈ ပၢင်တိုၵ်းၵႃႇၸႃႇသေ လုၵ်ႉတီႈ ဢၢႆႇၸီႇၸီႇ တိုၵ်ႉၸွပ်ႇထတ်း ဢိတ်ႇသရေး လႄႈ ၸုမ်းႁႃးမၢတ်ႉသ်ၶဝ်ယူႇ။


ငိူၼ်ႈငဝ်ႈတိုၼ်း

Retrieved from "https://incubator.wikimedia.org/w/index.php?title=Wn/shn/ICJ_ပၢၵ်ႈပႅတ်ႈ_လွင်ႈမၢပ်ႇမႂ်_တႃႇႁႂ်ႈၵျႃႇမၼီႇၵိုတ်း_လွင်ႈၵမ်ႉထႅမ်ၵၢၼ်သိုၵ်း_ဢိတ်ႇသရေး&oldid=6279080"