ဝၼ်းဢႃးတိတ်ႉ၊ ဢေႃးၵၢတ်ႉ 18၊ 2024
မိူဝ်ႈဝၼ်းဢႃးတိတ်ႉၼၼ်ႉ ယွၼ်ႉဢိတ်ႉသရေးၶဝ် ဢဝ်ႁိူဝ်းမိၼ် ယိုဝ်းသႂ်ႇ တီႈဝဵင်းၵႃႇၸႃႇ တီႈၼိုင်ႈလႄႈ ၵူၼ်းတၢႆ 18 ၵေႃႉဝႃႈၼႆသေ ၼၼ်ႉၵေႃႈ မႅၼ်ႈၽွင်းမိူဝ်ႈ ၽူႈဢုပ်ႇဢူဝ်းၶဝ် မုင်ႈမွင်းဝႃႈ ဢိတ်ႉသရေးလႄႈ ၸုမ်းႁမၢသ်ႉၶဝ် တေၵိုတ်းတိုၵ်းၵၼ်ၼၼ်ႉယဝ်ႉ။ ၵူၼ်းၸိူဝ်းတၢႆၵႂႃႇတင်းမူတ်းၼၼ်ႉ ပဵၼ်ၵူၼ်းမုင်ႉႁိူၼ်းလဵဝ်ၵၼ်။
ၽူႈမီးပုၼ်ႈၽွၼ်း၊ မိူင်းဢမႄႇရိၵၢၼ်ႇ၊ မိူင်းဢီးၵျိပ်ႈ လႄႈ မိူင်းၶႃႇတႃႇၶဝ် လႆႈဢုပ်ႇဢူဝ်းၵၼ်တီႈ ဝဵင်းၻူဝ်ႇႁႃႇ ၼႂ်းၶၢဝ်းတၢင်းသွင်ဝၼ်းၼၼ်ႉ လႆႈမုင်ႈမွင်းဝႆႉဝႃႈ တေ မီးၶေႃႈတူၵ်းလူင်ႈတႃႇၵိုတ်းတိုၵ်း လႄႈ ၵူၼ်းဢိတ်ႇသရေး ၸိူဝ်းၺႃးၺွပ်းၼၼ်ႉၵေႃႈ တေ ၸၢင်ႈလွတ်ႈဢွၵ်ႇမႃးတင်းၼမ်တင်းလၢႆၼႆသေ ပေႃးဝႃႈ ဝူင်ႈၼႃႈတေမႃး လႆႈၶပ်ႉၶိုင်ဝႆႉ တႃႇဢုပ်ႉဢူဝ်းၵၼ်တီႈ ၵၢႆႇရူဝ်ႇ ဢၼ်ပဵၼ် လွင်ႈတၢင်းႁူဝ်ယွႆႈ ၵဵဝ်ႇၵပ်းၵၼ်သၢင်ႈၽႅၼ်ၵိုတ်းတိုၵ်း ၼၼ်ႉၼႆယဝ်ႉ။
သင်ဝႃႈ ၸုမ်းဢီႇရၢၼ်း လႄႈ ၸုမ်းႁိတ်ႉၸပူဝ်းလႃႇ၊ မိူင်းလႄႇပႃႇၼွၼ်ႇၶဝ် တွပ်ႇတႅၼ်းၶိုၼ်း ဢိတ်ႉသရေးၼႆၸိုင် လွင်ႈၶဵင်ႈၶႅင် ၼႂ်းပိုၼ်ႉတီႈၼၼ်ႉ ၸၢင်ႈတိူဝ်းၼမ်မႃးလႄႈ ၼင်ႇႁိုဝ် တေဢမ်ႇပဵၼ်ၸိူင်ႉၼႆၼၼ်ႉ တိုၵ်ႉဢုပ်ႇဢူဝ်းၵၼ်ယူႇ။ မိူဝ်ႈဝၼ်းဢႃးတိတ်ႉၼၼ်ႉ ဢိတ်ႉသရေးၶဝ် ဢဝ်ႁိူဝ်းမိၼ် ယိုဝ်းသႂ်ႇၺႃး ႁိူၼ်းလင်႞ လႄႈ ႁူင်းသိမ်းၶူဝ်းၶွင် ဢၼ်မီးတီႈ တၢင်းၶဝ်ႈဝဵင်း ၸႃႇဝႃႇတႃႇ တီႈဢၼ် ၵူၼ်းပၢႆႈၽေးၶဝ် ယူႇသဝ်းၼၼ်ႉၼႆ ဢၼ်ပဵၼ် ႁူင်းယႃ ဢၼ်တေႃႉသူင်ႇ ၵူၼ်းတၢႆ လႄႈ ၵူၼ်းမၢတ်ႇၸဵပ်း မွၵ်ႇလၢတ်ႈဝႃႈဝႆႉၼင်ႇၼၼ်ယဝ်ႉ။
သိုၵ်းဢိတ်ႉသရေးၶဝ် လၢတ်ႈဝႃႈ လွင်ႈဢၼ်ၶဝ်ယိုဝ်းမၢၵ်ႇၼၼ်ႉ တူၵ်းသႂ်ႇတီႈ ၵူၼ်းၵေႃႇၵၢၼ်ႁၢႆႉၶဝ် ယူႇသဝ်း တီႈၵၢင်ၵႃႇၸႃႇသေ လုၵ်ႉတီႈၼၼ်ႈသေ ၶဝ်ယိုဝ်းမၢၵ်ႇလူင် ၶဝ်ႈၼႂ်းမိူင်းဢိတ်ႉႀရေး မိူဝ်ႈပူၼ်ႉမႃး ဝူင်ႈဝၢင်ႈၼၼ်ႉၼႆယဝ်ႉ။
လိူဝ်ၼၼ်ႉ ဢိတ်ႉသရေးၶဝ်ၵေႃႈ တုၵ်းယွၼ်းၵူၼ်ပိုၼ်ႉတီႈ ႁႂ်ႈယူႇႁၢင်ႇၵႆ ၸုမ်းယိပ်းၵွင်ႈၵၢင်ႇ ဢၼ်မီးတီႈၵၢင် ၵႃႇၸႃႇၼၼ်ႉၼၼ်ႉ ယွၼ်ႉဝႃႈ ၶဝ်တေသိုပ်ႇတိုၵ်းယိုဝ်းယူႇ ၼႆယဝ်ႉ။ ၽူႈမီးပုၼ်ႈၽွၼ်း ၽၢႆႇပၢႆးယူႇလီ တီႈၵႃႇၸႃႇၶဝ် လၢတ်ႈဝႃႈ ၼႂ်းပၢင်တိုၵ်း ဢၼ်ပဵၼ်မႃး ၶၢဝ်းတၢင်း 10 လိူၼ် တီႈၵႃႇၸႃႇၼၼ်ႉ ၵူၼ်းတၢႆ မီးၵႂႃႇ 40,000 ၵေႃႉလိူဝ်ယဝ်ႉ။
ငိူၼ်ႈငဝ်ႈၶၢဝ်ႇ
- WAFAA SHURAFA and SAMY MAGDY. "An Israeli airstrike kills 18 members of a family in Gaza as mediators hope for a cease-fire" — AP News, August 18, 2024
- Wafaa Shurafa and Samy Magdy. "An Israeli airstrike kills 18 members of a family in Gaza as mediators hope for a cease-fire" — Los Angeles Times, August 17, 2024
- The Times of India. "Israeli airstrike in Gaza kills 18 family members amid cease-fire talks" — The Times of India, August 18, 2024
