ဝၼ်းသုၵ်း၊ ဢေႇပရႄႇ 19၊ 2024
တီႈပၢင်ၵုမ် ၽွင်းလူင်ၵၢၼ်ၼွၵ်ႈမိူင်း ၸုမ်း 7 (G7) ဢၼ်ပဵၼ် မိူင်းပၢႆးမၢၵ်ႈမီးဢဵၼ်ႇႁႅင်းယႂ်ႇ 7 မိူင်း ဢၼ်ၸတ်းႁဵတ်းတီႈ ၵုၼ်ၶႃႇပရီႇ မိူင်းဢီႇတႃႇလီႇၼၼ်ႉ လႆႈဢွၼ်ၵၼ်တႅပ်းတတ်းမႃးဝႃႈ တေထႅမ်ႁႅင်းပၼ် လွင်ႈၵႅတ်ႇၵင်ႈၽေးၵၢင်ႁၢဝ် ယူႇၶရဵၼ်း ဝႃႈၼႆယဝ်ႉ။ တီႈၼႂ်းၶေႃႈႁူမ်ႈၵၼ်ပိုၼ်ၽၢဝ်ႇ ၽွင်းလူင်ၵၢၼ်ၼွၵ်ႈမိူင်း ဝၢႆးသေ ပၢင်ၵုမ်ၸုမ်း 7 ယဝ်ႉတူဝ်ႈၼၼ်ႉ လၢတ်ႈဝႆႉဝႃႈ ၼင်ႇႁိုဝ် တေၵႅတ်ႇၵင်ႈလႆႈ ဢသၢၵ်ႈၵူၼ်း လႄႈ တွၼ်ႈတႃႇၵႅတ်ႇၵင်ႈလႆႈ ယူင်ႉသၢင်ႈပိုၼ်ႉထၢၼ် ဢၼ်လမ်ႇလွင်ႈၼၼ်ႉ တေၸွႆႈထႅမ် တႃႇႁႂ်ႈၼမ်ႉၵတ်ႉ လွင်ႈၵႅတ်ႇၵင်ႈၽေးၵၢင်ႁၢဝ်ႇ ယူႇၶရဵၼ်း ပေႃးတေ ၵႅၼ်ႇၶႅင်မႃးၼၼ်ႉ ဝႃႈၼႆယဝ်ႉ။
တွၼ်ႈတႃႇႁဵတ်းသၢင်ႈလႆႈၼင်ႇၼႆၼႆႉ တေၵပ်းသိုပ်ႇ ႁူမ်ႈသၢင်ႈၵၼ်ၵႂႃႇတင်း မိူင်းဢူၺ်းလီၶဝ် ဝႃႈၼႆယဝ်ႉ။ ဢၼ်မိူင်းၵျႃႇမၼီႇတၢင်ႇလၢတ်ႈဝႃႈ လွင်ႈႁဵတ်းသၢင်ႈ တႃႇပၼ်လႆႈ လွင်ႈၵႅတ်ႇၵင်ႈၽေးၵၢင်ႁၢဝ် ၵမ်းလဵဝ်ၼၼ်ႉၵေႃႈ ၽွင်းလူင်ၵၢၼ်ၼွၵ်ႈမိူင်း G7 ၶဝ်လႆႈႁပ်ႉယိုၼ်မႃးယူႇ။ ၵျႃႇမၼီႇ ဢၼ်ပဵၼ် ၽူႈၶဝ်ႈၸုမ်း G7 ၼၼ်ႉ မိူဝ်ႈပူၼ်ႉမႃး လၢႆဝၼ်းၼၼ်ႉ မၼ်းလႆႈ ၵပ်းသိုပ်ႇတုၵ်းယွၼ်း ၸိူဝ်းပဵၼ် မိူင်းဢူၺ်းလီမၼ်း တႃႇႁႂ်ႈပၼ် လွင်ႈၸွႆႈထႅမ် လွင်ႈၵႅတ်ႇၵင်ႈၽေးၵၢင်ႁၢဝ်ႇ တွၼ်ႈတႃႇယူႇၶရဵၼ်း ၼႆယဝ်ႉ။
တီႈပၢင်ၵုမ် ဢၼ်ၸတ်းႁဵတ်း တီႈ ၵုၼ်ၶႃႇပရီႇ ၼႂ်းၶၢဝ်းတၢင်းသၢမ်ဝၼ်းၼၼ်ႉ လႆႈဢုပ်ႇဢူဝ်းပိူင်လူင် ဢၼ်ပဵၼ်လွင်ႈ တႃႇၵမ်ႉထႅမ်လွင်ႈၸွႆႈထႅမ် တႃႇ ယူႇၶရဵၼ်း လႄႈ လွင်ႈၶဵင်ႈၶႅင်သိုၵ်း ၼႂ်းၵႄႈ ဢိတ်ႇသရေး လႄႈ ဢီႇရၢၼ်းၼၼ်ႉယဝ်ႉ။ တီႈၼႂ်း ၶေႃႈပိုၼ်ၽၢဝ်ႇ ၽွင်းလူင်ၵၢၼ်ၼွၵ်ႈမိူင်း G7 ၼၼ်ႉ ၶဝ်လႆႈပၼ် ၵႂၢမ်းမၼ်ႈၸႂ် တေ ႁူမ်ႈႁွမ်းၵၼ်တင်း မိူင်းဢူၺ်းလီသေ တႃႇသိုပ်ႇပၼ်တၢင်းၸွႆႈထႅမ် မိူင်းယူႇၶရဵၼ်းလႄႈ ၵူၼ်းမိူင်းယူႇၶရဵၼ်း ၸိူဝ်းပဵၼ် ၵၢၼ်သိုၵ်း၊ ၵၢၼ်ငိုၼ်းတွင်း၊ ၵၢၼ်ပၢႆးမိူင်း၊ ၵၢၼ်ပၢႆးမၢၵ်ႈမီး လႄႈ လွင်ႈၵူၼ်း လွင်ႈႁုၼ်ႈမုၼ်းၶိုၼ်ႈယႂ်ႇ ၸၸိူဝ်းၼႆႉယဝ်ႉ။
ၽွင်းလူင်ၵၢၼ်ၼွၵ်ႈမိူင်း ဢမႄႇရိၵၢၼ်ႇ Antony Blinken လႆႈမွၵ်ႇလၢတ်ႈတီႈပၢင်ၸႅင်ႈၶၢဝ်ႇ ဢၼ်ၸတ်းႁဵတ်း ဝၢႆးပၢင်ၵုမ် G7 ယဝ်ႉတူဝ်ႈၼၼ်ႉ မၼ်းလၢတ်ႈဝႃႈ တွၼ်ႈတႃႇဢမႄႇရိၵၢၼ်ႇ ပေႃးတေ ၸွႆႈထႅမ်ၵၢၼ်သိုၵ်း ယူႇၶရဵၼ်း လႆႈၼၼ်ႉ လူဝ်ႇလႆႈယိုၼ်ယၼ်ပၼ် ပိူင်ယုၵ်းယၢင်ႇၵၢၼ်ၸႂ်ႉၸၢႆႇငိုၼ်း ၵႃႈတီႈ သၽႃးဢမႄႇရိၵၢၼ်ႇ ၶၼ်ၶၼ်ၽႂ်းၽႂ်း ဝႃႈၼႆယဝ်ႉ။ မၼ်းလၢတ်ႈဝႃႈ ၶိူင်းၸိူဝ်းဢၼ်လူဝ်ႇ တႃႇရတ်ႈသျႃးၶဝ် ႁဵတ်ႈဢွၵ်ႇလႆႈ ၶိူင်ႈလၢၵ်ႈၼၢၵ်ႈၼၼ်ႉ ပဵၼ်ၶႄႇၶဝ် ၵေႃႉပၼ်ပိူင်လူင် ဝႃႈၼႆယဝ်ႉ။ ၽွင်းလူင်ၵၢၼ်ၼွၵ်ႈမိူင်း ဢမႄႇရိၵၢၼ်ႇ Antony Blinken လႆႈမွၵ်ႇလၢတ်ႈ တီႈ ပၢင်ၸႅင်ႈၶၢဝ်ႇဝႃႈ ၶႄႇၶဝ် လႆႈၵမ်ႉထႅမ်ရတ်ႈသျႃး ၸိူဝ်းပဵၼ် ၶိူင်ႈၸၢၵ်ႈ၊ သႄႇမီးၶွၼ်ႇတႅၵ်ႇတႃႇ၊ ၶိူင်ႈၶူဝ်း ၸိူဝ်းၸႂ်ႉလႆႈ တီႈၽၢႆႇသိုၵ်း ၽၢႆႇၵူၼ်းမိူင်း ၸိူဝ်းၼႆဝႃႈၼႆႉယဝ်ႉ။
ငိူၼ်ႈငဝ်ႈတိုၼ်း
- Nike Ching. "G7 reaffirms support for Ukraine’s defense, financial needs" — Voice of America, April 18, 2024
- Voice of America. "G7 နိုင်ငံတွေ ယူကရိန်း လေကြောင်းရန်ကာကွယ်ရေးအတွက် ကူညီမည်" — Voice of America, April 19, 2024
