Wikimedia Incubator

Wn/shn/ဢိၼ်းတီးယႃး ၺွပ်းၵူၼ်းထၢင်ႇထိူမ် သီႇၵေႃႉ ၸိူဝ်းႁူၺ်းၵူၼ်းပၼ် တပ်ႉရတ်ႈသျႃး

< Wn‎ | shn
Wn > shn > ဢိၼ်းတီးယႃး ၺွပ်းၵူၼ်းထၢင်ႇထိူမ် သီႇၵေႃႉ ၸိူဝ်းႁူၺ်းၵူၼ်းပၼ် တပ်ႉရတ်ႈသျႃး

ဝၼ်းၽတ်း၊ မေႇ 9၊ 2024

လိၵ်ႈႁွမ်တွမ် ၸိူဝ်းၵဵဝ်ႇၵပ်း
ဢွင်ႈတီႈ မိူင်းဢိၼ်းတီးယႃး
ႁူမ်ႈသၢင်ႈ!
Wn/shn/ဢိၼ်းတီးယႃး
Wn/shn/ဢိၼ်းတီးယႃး
ပၢင်သွၼ်ၵၢၼ်သိုၵ်း ရတ်ႈသျႃး

ၸဝ်ႈၼႃႈတီႈ ဢိၼ်းတီးယႃးၶဝ် တိၺွပ်းၵူၼ်းသီႇၵေႃႉ လူၺ်ႈလိူင်ႈၵႃႉၵူၼ်း ဢၼ်ၵဵပ်းႁွမ်ၵူၼ်းပၼ် တႃႇၶဝ်ႈတိုၵ်းသိုၵ်းၽၢႆႇတပ်ႉရတ်ႈသျႃး တီႈ ယူႇၶရဵၼ်းၼၼ်ႉ ဝႃႈၼႆယဝ်ႉ။ တီႈပၢင်တိုၵ်းယူႇၶရဵၼ်း ဢၼ်ႁိုင်မႃး မီး သွင်ပီပၢႆယဝ်ႉၼၼ်ႉ ၵူၼ်းသိုၵ်းရတ်ႈသျႃး လႆႈတၢႆမႃးႁူဝ်မိုၼ်ႇမၼ်းယဝ်ႉသေ လူင်ပွင်ၸိုင်ႈရတ်ႈသျႃးၼႆႉ လႆႈလႄႇႁႃၵဵပ်းႁွမ်တွမ် ၵူၼ်းၸိူဝ်းဢၼ်တေယူႇၽၢႆႇမၼ်းသေ ၸွႆႈတိုၵ်းသိုၵ်းပၼ်ၼၼ်ႉယူႇ။

ၽူႈၸိူဝ်းဢၼ်ထုၵ်ႇႁူၺ်းၵႂႃႇၼၼ်ႉ လႆႈမွၵ်ႇ ႁွင်ႈၵၢၼ် ဢေႇဢႅၾ်ႉပီႇဝႃႈ တီႈၼႂ်းပၢင်တိုၵ်းၼၼ်ႉ ၵူၼ်းသိုၵ်းတပ်ႉဢိၼ်းတီးယႃး ဢၼ်လႆႈတၢႆၵႂႃႇ မီးယူႇ ဢမ်ႇယွမ်း သွင်ၵေႃႉ ဝႃႈၼႆယဝ်ႉ။ ၶဝ်လၢတ်ႈလႅၼ်ဝႃႈ ပေႃးတေၵႂႃႇၸွႆႈတိုၵ်းပၼ်သိုၵ်းၼႆ ငိုၼ်းလိူၼ်ၵေႃႈ တေလႆႈၼမ်၊ ယဝ်ႉၵေႃႈ တေလႆႈယိပ်း မႂ်ၶၢမ်ႈမိူင်းရတ်ႈသျႃး ဝႃႈၼႆသေ ပွႆၵႂႃႇၼႃႈသိုၵ်း ဝႃႈၼႆယဝ်ႉ။

တီႈၶေႃႈပိုၼ်ၽၢဝ်ႇ ဢၼ်လုၵ်ႉတီႈ ငဝ်ႈငုၼ်းပျူဝ်ႇရူဝ်ႇၵၢၼ်ၸွပ်ႇ ဢိၼ်းတီးယႃး CBI ၼၼ်ႉ လၢတ်ႈဝႆႉဝႃႈ ၼႂ်းၵႃႈၵူၼ်းၸိူဝ်းထုၵ်ႇၺွပ်းၼၼ်ႉ တႃႇၵေႃႉၼိုင်ႈၼႆႉ ပဵၼ် ၵူၼ်းႁဵတ်းၵၢၼ်ပိၼ်ႇၽႃႇသႃႇပၼ် တွၼ်ႈတႃႇ ၵွင်ႉသၢၼ် ဢၼ်ႁွမ်ပၼ် ၵူၼ်းသိုၵ်းဢိၼ်းတီးယႃး ဝႃႈၼႆယဝ်ႉ။ ယၢမ်းလဵဝ်ၼႆႉ တိုၵ်ႉၵူတ်ႇထတ်း ၸိူဝ်းၵဵဝ်ႇၵပ်းလူၺ်ႈ ၵွင်ႉသၢၼ် ၵႃႉၵူၼ်း ၵူႈမိူင်းမိူင်းယူႇ ဝႃႈၼႆယဝ်ႉ။ လႆႈၶဝ်သွၵ်ႈႁႃ ဢွင်ႈတီႈ သိပ်းသၢမ်တီႈ တီႈၼႂ်းမိူင်းဢိၼ်းတီးယႃးသေ လႆႈထတ်းထၢမ် ၵူၼ်းတင်းၼမ်ယဝ်ႉ ႁိုင် သွင်လိူၼ် ၸင်ႇတိၺွပ်းလႆႈ ၵူၼ်းသီႇၵေႃႉၼႆႉယဝ်ႉ။

ငဝ်ႈငုၼ်းပျူဝ်ႇရူဝ်ႇၵၢၼ်ၸွပ်ႇ ဢိၼ်းတီးယႃး လၢတ်ႈဝႃႈ ဢၼ်ဢဝ် ၵူၼ်းမိူင်းဢိၼ်းတီးယႃး သူင်ႇၸူးရတ်ႈသျႃးၼႆႉ မီးယူႇ ဢမ်ႇယွမ်း 35 ပွၵ်ႈ ဝႃႈၼႆယဝ်ႉ။ ထၢၼ်ၽွင်းလူင် ၵၢၼ်ၼွၵ်ႈမိူင်း ဢိၼ်းတီးယႃး လၢတ်ႈဝႆႉဝႃႈ တိုၵ်ႉႁဵတ်းလွင်ႈငူပ်ႉငိ တႃႇဢဝ် ၵူၼ်းမိူင်းဢိၼ်းတီးယႃး မွၵ်ႈ 20 ၵေႃႉပၢႆ ဢၼ်မီးယူႇတီႈၼႂ်း တပ်ႉရတ်ႈသျႃးၼၼ်ႉ သူင်ႇပၼ် မိူင်းဢိၼ်းတီးယႃးၶိုၼ်း ဝႃႈၼႆယဝ်ႉ။ ႁူမ်ႈဝႃႈ ၽူႈမီးပုၼ်ႈၽွၼ်း တပ်ႉရတ်ႈသျႃးၶဝ်လၢတ်ႈဝႃႈ ၵူၼ်းမိူင်းဢိၼ်းတီးယႃး ၸိူဝ်းထုၵ်ႇႁူၺ်းမႃးႁၢပ်ႇၵၢၼ်သိုၵ်း တႃႇရတ်ႈသျႃးၼၼ်ႉ ၶဝ်ၵူၺ်းတေလႆႈႁၢပ်ႇၵၢၼ်တေႃႉသူင်ႇ တီႈၼႃႈသိုၵ်း ယူႇၶရဵၼ်း ၼႆသေတႃႉ ဝၢႆးလင်မိူင်း မိူဝ််ႈပႆႇသူင်ႇၶဝ်ၵႂႃႇၼႃႈသိုၵ်းၼၼ်ႉ ၶဝ်လႆႈၶိုၵ်ႈပၢင်သွၼ် ၸႂ်ႉၶိူင်ႈလၢၵ်ႈၼၢၵ်ႈဢွၼ်ႇ၊ လၢၵ်ႈၼၢၵ်ႈလူင် ဝႃႈၼႆယဝ်ႉ။

မိူင်းဢိၼ်းတီးယႃးၼႆႉ ပဵၼ်မိူင်းဢူၺ်းလီၵၼ်တင်း မိူင်းရတ်ႈသျႃးမႃး ပီယၢဝ်းၶၢဝ်းႁိုင်ယဝ်ႉသေ တီႈလူင်ယူႇၶရဵၼ်းၼၼ်ႉၵေႃႈ ဢမ်ႇမီးလွင်ႈထတ်းသၢင်ၸႅင်ႈလႅင်းၼိူဝ် ရတ်ႈသျႃး မႃးသေပွၵ်ႈ။


ငိူၼ်ႈငဝ်ႈတိုၼ်း edit

Retrieved from "https://incubator.wikimedia.org/w/index.php?title=Wn/shn/ဢိၼ်းတီးယႃး_ၺွပ်းၵူၼ်းထၢင်ႇထိူမ်_သီႇၵေႃႉ_ၸိူဝ်းႁူၺ်းၵူၼ်းပၼ်_တပ်ႉရတ်ႈသျႃး&oldid=6283588"