Wikimedia Incubator

Wn/shn/ႁႃးမၢတ်ႉသ် သွၼ်ႇလွင်ႈလီသေ လဵပ်ႈႁဵၼ်း ၶေႃႈတၢင်ႇၼႄ လွင်ႈငမ်းယဵၼ် ဢိတ်ႇသရေး

< Wn | shn
Wn > shn > ႁႃးမၢတ်ႉသ် သွၼ်ႇလွင်ႈလီသေ လဵပ်ႈႁဵၼ်း ၶေႃႈတၢင်ႇၼႄ လွင်ႈငမ်းယဵၼ် ဢိတ်ႇသရေး

ဝၼ်းသဝ်၊ မေႇ 4၊ 2024

လိၵ်ႈႁွမ်တွမ် ၸိူဝ်းၵဵဝ်ႇၵပ်း
မိၵ်ႈမၢႆ လွင်ႈငမ်းယဵၼ် ၼႂ်းၵႄႈ ဢိတ်ႇသရေး လႄႈ ပႃးလဵတ်ႈသတၢႆး
ႁူမ်ႈသၢင်ႈ!
ၽူႈဢွၼ်ႁူဝ် ႁႃးမၢတ်ႉသ် Ismail Haniyeh

ၽွင်းမိူဝ်ႈပဵၼ် သၢႆငၢႆ ဢိတ်ႇသရေးၶဝ် တေႁၢင်ႈသိုၵ်းလေႃႇတိုၵ်း ဝဵင်းရႃႇၾႃႇ တီႈ ၵႃႇၸႃႇပွတ်းၸၢၼ်းၼၼ်ႉ ၽူႈယႂ်ႇႁႃးမၢတ်ႉသ် Ismail Haniyeh မွၵ်ႇလၢတ်ႈဝႃႈ တႃႇတေ ငူပ်ႉငိလွင်ႈၵိုတ်းတိုၵ်း ဢၼ်ယဝ်ႉတူဝ်ႈၼၼ်ႉ ဢမ်ႇႁိုင်ဢမ်ႇၼၢၼ်း တေပွႆႇ ၸုမ်းတၢင်တူဝ်ၵႂႃႇ ဢီးၵျိပ်ႈ ဝႃႈၼႆ။

မိူဝ်ႈဝၼ်းၽတ်းၼၼ်ႉ ၽူႈဢွၼ်ႁူဝ် ၸုမ်းႁႃးမၢတ်ႉသ် Haniyeh မွၵ်ႇလၢတ်ႈ ၽူႈငူပ်ႉငိ ဢီးၵျိပ်ႈ လႄႈ ၶႃႇတႃႇဝႃႈ မၼ်းသွၼ်ႇလွင်ႈလီသေ တိုၵ်ႉထတ်းသၢင်လဵပ်ႈႁဵၼ်းၼိူဝ် ၶေႃႈတၢင်ႇၼႄ လွင်ႈငမ်းယဵၼ် ဢၼ်ၽၢႆႇဢိတ်ႇသရေးၶဝ် တၢင်ႇၼႄမႃးလိုၼ်းသုတ်းၼၼ်ႉယူႇ ဝႃႈၼႆယဝ်ႉ။ ပၢင်တိုၵ်း ဢိတ်ႇသရေး လႄႈ ႁႃးမၢတ်ႉသ် ဢၼ်ႁိုင်မႃး 7 လိူၼ်ယဝ်ႉၼၼ်ႉ ၼင်ႇႁိုဝ် ပေႃးတေလႆႈၶေႃႈၽွမ်ႉၸႂ် တႃႇၵိုတ်းတိုၵ်းၼၼ်ႉ ဢီးၵျိပ်ႈ၊ ၶႃႇတႃႇ လႄႈ ဢမႄႇရိၵၢၼ်ႇၶဝ် တိုၵ်ႉၶဝ်ႈၵႄႈသေ ငူပ်ႉငိပၼ်ယူႇၼၼ်ႉယဝ်ႉ။

မိူဝ်ႈဝၼ်းသုၵ်းၼၼ်ႉ ဢၼ်ပဵၼ် ၽူႈယႂ်ႇ ၽၢႆႇၵၢၼ်ၸွပ်ႇ ဢမႄႇရိၵၢၼ်ႇ William Burns ၵေႃႈ တွၼ်ႈတႃႇ ဢုပ်ႇဢူဝ်း လွင်ႈၵႃႇၸႃႇသေ လႆႈႁွတ်ႈထိုင် ၵၢႆႇရူဝ်ႇ မိူင်းဢီးၵျိပ်ႈၼႆ ဢၢင်ႈဢိင်ၼိူဝ် ၽူႈမီးပုၼ်ႈၽွၼ်း တႃႈႁိူဝ်းမိၼ် ၵၢႆႇလူဝ်ႇၶဝ် လၢတ်ႈသေ တီႈ သိုဝ်ႇၶၢဝ်ႇရၢႆႉတႃႇ လၢတ်ႈဝႆႉဝႃႈၼၼ်။ ၽွင်းလူင် ၵၢၼ်ၼွၵ်ႈမိူင်း ဢမႄႇရိၵၢၼ်ႇ Anthony Blinken လၢတ်ႈမႃးဝႃႈတႄႉ လွင်ႈၵၢႆႇၵႂၢမ်း ဢိတ်ႇသရေး တွၼ်ႈတႃႇ လွင်ႈၵိုတ်းတိုၵ်းၼၼ်ႉ လႆႈႁၼ်မီးလွင်ႈယွၼ်ႇယွမ်းပၼ်တႄႉသေ လႆႈတိုၵ်းသူၼ်း ၽၢႆႇႁႃးမၢတ်ႉသ်ၶဝ် ႁႂ်ႈယွမ်းႁပ်ႉ ၶေႃႈတၢင်ႇၼႄ ၼႆႉၵႂႃႇ ဝႃႈၼႆယဝ်ႉ။

တီႈၼႂ်းၶေႃႈပိုၼ်ၽၢဝ်ႇႁူဝ်ယွႆႈ ပရိတ်ႈတဵၼ်ႇ ၼၼ်ႉ ၼႄဝႆႉဝႃႈ တီႈၼႂ်း ၶေႃႈတၢင်ႇၼႄ လွင်ႈၵိုတ်းတိုၵ်းၼႆႉ ၶဝ်ႈပႃး တႃႇၵိုတ်းယင်ႉ လွင်ႈပိုတ်းယိုဝ်း တႃႇ ၶၢဝ်းတၢင်း 40 ဝၼ်းၼၼ်ႉ လူဝ်ႇလႆႈဢဝ် ၵူၼ်းဢိတ်ႇသရေး ၸိူဝ်းႁႃးမၢတ်ႉသ်ၶဝ် တိၺွပ်းၵႂႃႇၼၼ်ႉ လႅၵ်ႈလၢႆႈၵၼ်တင်း ပႃးလဵတ်ႈသတၢႆး ဢၼ်ထုၵ်ႇၺွပ်းဝႆႉ ႁူဝ်ႁဵင်မၼ်းၼၼ်ႉ ဝႃႈၼႆယဝ်ႉ။

မၼ်းၵေႃႈ မႅၼ်ႈၽွင်း ၵူၼ်းမိူင်းဢိတ်ႇသရေး တိုၵ်ႉၼႄၵၢင်ၸႂ် တုၵ်းယွၼ်းလူင်ပွင်ၸိုင်ႈ တွၼ်ႈတႃႇ ၵူၼ်းဢိတ်ႇသရေး ၸိူဝ်းထုၵ်ႇၺွပ်းၵႂႃႇၼၼ်ႉ ၼင်ႇႁိုဝ်ၶဝ် တေ လွတ်ႈဢွၵ်ႇမႃးၼၼ်ႉ ႁႂ်ႈငူပ်ႉငိၵၼ်ၼႆသေ ၽၢႆႇႁႃးမၢတ်ႉသ်ၶဝ်ၵေႃႈ တိုၵ်ႉဝူၼ်ႉၼိူဝ် ၶေႃႈတၢင်ႇၼႄ ဢိတ်ႇသရေး ၶဝ်ယူႇ။

ဢိတ်ႇသရေးၶဝ် ပၼ်ၽၢင်ႉယူႇတိၵ်းတိၵ်းဝႃႈ ၶဝ်တိုၵ်ႉၶပ်ႉၶိုင် တႃႇတိုၵ်းတေႃး ႁႃးမၢတ်ႉသ်ၶဝ် ၸိူဝ်းဢၼ်မီးယူႇတီႈ ဝဵင်းရႃႇၾႃႇ တီႈ ၵႃႇၸႃႇပွတ်းႁွင်ႇၼၼ်ႉယဝ်ႉ။ တီႈရႃႇၾႃႇၼႆႉ မီးဝႆႉ ပႃးလဵတ်ႈသတၢႆး လၢၼ်ႉပၢႆ ၸိူဝ်းဢၼ် လုၵ်ႉတီႈ ၵႃႇၸႃႇပၢႆႇမႃး ယွၼ်ႉ ဢိတ်ႇသရေးၶဝ် ၶဝ်ႈတိုၵ်းၵႃႇၸႃႇၼၼ်ႉလႄႈ ၸင်ႇလႆႈဢွၼ်ၵၼ် ပၢႆႈမႃးသေႃႉယူႇတီႈ ဝဵင်းရႃႇၾႃႇၼႆႉသေ ၸုမ်း UNOCHA ၸုမ်းၸၢတ်ႈၸိုင်ႈလုမ်ႈၾႃႉ မွၵ်ႇလၢတ်ႈတီႈ ပၢင်ၸႅင်ႈၶၢဝ်ႇ တီႈ ၵျီႇၼီႇဝႃႇၼၼ်ႉဝႃႈ သင်ၸိူဝ်ႉဝႃႈ ဢိတ်ႇသရေး လေႃႇတိုၵ်းရႃႇၾႃႇၼႆႉ ၵူၼ်းမိူင်းပိုၼ်ႉတီႈ တေလႆႈလုတၢႆတင်းၼမ်သေဢမ်ႇၵႃး လွင်ႈဢၼ်ပၼ်တၢင်းၸွႆႈထႅမ် တႃႇတီႈၵႃႇၸႃႇတင်းသဵင်ႈၼၼ်ႉၵေႃႈ တေ မီးလွင်ႈတိူဝ်ႉၶိူၵ်ႈတႄႉတႄႉ ဝႃႈၼႆယဝ်ႉ။


ငိူၼ်ႈငဝ်ႈတိုၼ်း

Retrieved from "https://incubator.wikimedia.org/w/index.php?title=Wn/shn/ႁႃးမၢတ်ႉသ်_သွၼ်ႇလွင်ႈလီသေ_လဵပ်ႈႁဵၼ်း_ၶေႃႈတၢင်ႇၼႄ_လွင်ႈငမ်းယဵၼ်_ဢိတ်ႇသရေး&oldid=6280770"