ဝၼ်းၸၼ်၊ မၢတ်ႉၶျ် 4၊ 2024
မိူဝ်ႈဝၼ်းဢႃးတိတ်ႉၼၼ်ႉ ၸိူဝ်းပဵၼ် ပီၼွင်ႉၸိူဝ်ႉၶိူဝ်း ၵူၼ်းဢွၵ်ႇၶၢဝ်းတၢင်း ဢၼ်ပႃးၵႂႃႇၸွမ်းၼိူဝ် MH370 ဢၼ်ပဵၼ်ၶွင် သၢႆၵၢၼ်မိၼ်မလေးသျႃး ဢၼ်လႆႈႁၢႆလၢႆၵႂႃႇၼိူဝ်ၵၢင်ႁၢဝ် မိူဝ်ႈပူၼ်ႉမႃး 10 ပီၼၼ်ႉ ဢွၼ်ၵၼ်တုၵ်းယွၼ်း ႁႂ်ႈၶိုၼ်းႁဵတ်းပၼ် လွင်ႈႁႃႁိူဝ်းမိၼ်ၼၼ်ႉ ထႅင်ႈ ဝႃႈၼႆယဝ်ႉ။ ၸိူဝ်းဢၼ်တုၵ်းယွၼ်းၼၼ်ႉ ပဵၼ်ၸိူဝ်ႉၶိူဝ်း ၸိူဝ်းဢၼ်လႆႈၶီမွင်ယူႇ တေႃႇထိုင်ယၢမ်းမိူဝ်ႈလဵဝ်ၼႆႉသေ ယွၼ်ႉပိူဝ်ႈ ၶဝ်ဢမ်ႇလႆႈႁူႉၸွမ်းလွင်ႈတၢင်း ဢၼ်ႁိူဝ်းမိၼ်လႆႈႁၢႆၵႂႃႇၼၼ်ႉယဝ်ႉ။
ႁိူဝ်းမိၼ် MH370 ဢၼ်ပႃး ၵူၼ်းဢွၵ်ႇၶၢဝ်းတၢင်းၵႂႃႇ 239 ၵေႃႉၼႆႉ မိူဝ်ႈ ပီ 2014၊ လိူၼ်မၢတ်ႉၶျ် ဝၼ်းထိ 8 ၼၼ်ႉ လုၵ်ႉဢဝ်တီႈ ဝဵင်းၵႂႃႇလႃႇလမ်ႇပူႇ၊ မိူင်းမလေႈသျႃးသေ မိၼ်ၵႂႃႇၸူး ဝဵင်းပိူဝ်ႉၵျိင်ႈ၊ မိူင်းၶႄႇၼၼ်ႉ လႆႈႁၢႆလၢႆၵႂႃႇၸွမ်း ပွတ်းတၢင်း ယဝ်ႉ။ ၵၢၼ်ၽူတ်ႇႁႃ ႁိူဝ်းမိၼ် MH370 ၼႆႉ ပေႃးဢဝ်ၼႂ်းပိုၼ်း သၢႆၵၢၼ်မိၼ်ဝႃႈ ပဵၼ်ဢၼ်ယႂ်ႇတီႈသုတ်းသေတႃႉ ႁၢၼ်ႉတေႃႇထိုင်ဝၼ်းမိူဝ်ႈၼႆႉ ဢမ်ႇပႆႇႁႃႁၼ်ၵွၼ်ႇ။
ၸိူဝ်ႉၶိူဝ်း ၵူၼ်းဢွၵ်ႇၶၢဝ်းတၢင်း မွၵ်ႈ 500 ၵေႃႉၼႆႉ ဢွၼ်ၵၼ်ၸူႉတုမ်ၵၼ် တီႈႁိမ်း သႅၼ်ႇတႃႇၵၢတ်ႇလူင်ဢၼ်ၼိုင်ႈ တီႈ ဝဵင်းလူင်ၵႂႃႇလႃႇလမ်ႇပူႇ မိူင်းမလေးသျႃးသေၵေႃႈ ဢွၼ်ၵၼ်ၸတ်းႁဵတ်းပၢင်ၶုၵ်းၶူၼ်ႉၼႆႉယဝ်ႉ။ ၵူၼ်းၸိူဝ်းၶိုၼ်ႈႁွတ်ႈမႃး ၵမ်ႉၼမ်ၼႆႉ ဢွၼ်ၵၼ်လႆႈ တမ်ႇၼွႆႉမွင်ၸႂ် ဝႆႉယူႇ။ ဢွၼ်ၵၼ်တႆးၽႆးတဵၼ်း 239 လႅမ် ၸွမ်းၼင်ႇ ႁူဝ်ၼပ်ႉၵူၼ်း ဢၼ်ပႃးၵႂႃႇၸွမ်း ႁိူဝ်းမိၼ်ၼၼ်ႉယဝ်ႉ။ ၵူၼ်းၸိူဝ်းပႃးၵႂႃႇၼိူဝ်ႁိူဝ်းမိၼ် MH370 တႃႇ သၢမ်ပုၼ်ႈ သွင်ပုၼ်ႈၼႆႉ ပဵၼ်ၵူၼ်းမိူင်းၶႄႇလႄႈ တီႈပၢင်ၶုၵ်းၶူၼ်ႉၼၼ်ႉ ၸိူဝ်းပဵၼ် ပီႈၼွင်ႉၸိူဝ်ႉၶိူဝ်း ဢၼ်လုၵ်ႉမိူင်းၶႄႇမႃးၵေႃႈ ဢွၼ်ၵၼ် ၶိုၼ်ႈႁွတ်ႈၶဝ်ႈပႃးဝႆႉယဝ်ႉ။
ငိူၼ်ႈငဝ်ႈတိုၼ်း
- Agence France-Presse. "Relatives of Malaysia Plane Crash Victims Mark 10 Years Since Disappearance" — VOA News, March 3, 2024
- VOA News. "MH370 လေယာဉ်ပျောက်ဆုံးမှု ၁၀ နှစ်ပြည့် အောက်မေ့ဖွယ်ပြုလုပ်" — VOA News, March 4, 2024
- Malay Mail. "Relatives of Malaysia MH370 plane crash victims mark 10 years since disappearance" — Malay Mail, March 3, 2024
