ဝၼ်းသဝ်၊ သႅပ်ႇထႅမ်ႇပႃႇ 14၊ 2024
ႁိူဝ်းသိုၵ်း ၵျႃႇမၼီႇ သွင်လမ်း ၶၢမ်ႈပၢင်ႇလၢႆႇၶႄႇၸၢၼ်းသေ လုၵ်ႉတီႈ ၵၢဝ်းလီၸၢၼ်း မုင်ႈၼႃႈၵႂႃႇ မိူင်းၾီလိပ်ႈပိၼ်း ဢၼ်ၼႄဝႃႈ ၵျႃႇမၼီႇ မီးၸႂ်ၶႂ်ႈၵႄႈလိတ်ႈ လွင်ႈၶႄႇ လွၵ်ႇငိူတ်ႈ ၼႂ်းပိုၼ်ႉတီႈၼၼ်ႉသေ ၽူႈထတ်းသၢင်ၶဝ် ယုမ်ႇယမ်ဝႃႈ လွင်ႈၼႆႉ ၶႂၢၵ်ႈၵႂႃႇထိုင် မိူင်းယူးရူပ်ႉ ၼႆယဝ်ႉ။
တပ်ႉၼမ်ႉ ၵၢဝ်းလီၸၢၼ်း လၢတ်ႈဝႃႈ မိူဝ်ႈဝၼ်းဢႃးတိတ်ႉၼၼ်ႉ ႁိူဝ်းသိုၵ်းၵျႃႇမၼီႇ သွင်လမ်း လုၵ်ႉတီႈ ဝဵင်းတႃႈႁိူဝ်း ဢိၼ်းၸဵင်ႇ ၵၢဝ်းလီၸၢၼ်းသေ ၵႂႃႇၸူး ဝဵင်းမၼီႇလႃႇ မိူင်းၾီလိပ်ႈပိၼ်း မိူဝ်ႈဝၼ်းဢႃးတိတ်ႉၼၼ်ႉ ၼႆယဝ်ႉ။ သိုဝ်ႇၶၢဝ်ႇ Reuters ဢွၵ်ႇဝႆႉဝႃႈ ႁိူဝ်းၸိူဝ်းၼၼ်ႉ တေလတ်းၶၢမ်ႈ သၢႆၼမ်ႉထၢႆႇဝၢၼ်း ၵွၼ်ႇၸင်ႇတေၵိုတ်းတီႈ ဝဵင်းမၼီႇလႃႇ ၼႆယဝ်ႉ။
ၽူႈမီးပုၼ်ႈၽွၼ်း ၽၢႆႇၵႅတ်ႇၵင်ႈ မိူင်းၵျႃႇမၼီႇ ယိုၼ်ယၼ်ပၼ် ႁွင်ႈၵၢၼ်ၶၢဝ်ႇဝီႇဢူဝ်ႇဢေႇ မိူဝ်ႈဝၼ်းသုၵ်းၼၼ်ႉဝႃႈ ႁိူဝ်းၸိူဝ်းၼႆႉ တေမႃးသိူၵ်ႈတီႈ ဝဵင်းမၼီႇလႃႇ ၼႂ်းလိူၼ်သႅပ်ႇထႅမ်ႇပႃႇ 16 ဝၼ်း ၼႆယဝ်ႉ။ လွင်ႈၼႆႉ မၼ်းၸွမ်းၼင်ႇ ပၵ်းပိူင် ၵၢၼ်ၼမ်ႉ ဢၼ်ၸၢတ်ႈၸိုင်ႈလုမ်ႈၾႃႉ မီးဝႆႉၼၼ်ႉသေ ယွၼ်ႉလွင်ႈႁူမ်ႇလူမ်ႈလႄႈ လွင်ႈႁိူဝ်းတေၵႂႃႇမႃးၼၼ်ႉ တေဢမ်ႇပိုၼ်ၽၢဝ်ႇ ႁူဝ်ယွႆႈမၼ်း ဢွၼ်တၢင်း ၼႆယဝ်ႉ။
တႄႇဢဝ် လိူၼ်ဢေႃးၵၢတ်ႉ 2021 တေႃႇထိုင် လိူၼ်ၾႅပ်ႇဝႃႇရီႇ 2022 ၼၼ်ႉ ႁိူဝ်းယႃႉ ၵျႃႇမၼီႇ ဢၼ်ပဵၼ် Bayern ၼၼ်ႉ လႆႈပၵ်းသဝ်းဝႆႉ တီႈပၢင်ႇလၢႆႇၶႄႇၸၢၼ်း တႃႇၵႅတ်ႇၶႄ လွင်ႈလွတ်ႈလႅဝ်း သၢႆၵၢၼ်ၼမ်ႉ ၼိူဝ်ၼမ်ႉ ယဝ်ႉသေ ၼႆႉ ပဵၼ်ပွၵ်ႈဢွၼ်တၢင်းသုတ်း ဢၼ်ၶိုတ်း လတ်းၶၢဝ်းတၢင်းၵႂႃႇ ၼႆယဝ်ႉ။
မိူဝ်ႈၼၼ်ႉ ၸုမ်းပႄးယႃႇလႅၼ်ႇ လုၵ်ႉတီႈ ၵၢဝ်းလီၸၢၼ်း ၵႂႃႇၸူး သိင်ႇၵႃႇပူဝ်ႇသေ ဢမ်ႇၶၢမ်ႈ သၢႆၼမ်ႉထၢႆႇဝၢၼ်း။ သင်ဝႃႈ ၶဝ်ၶၢမ်ႈပူၼ်ႉ သၢႆၼမ်ႉပၢင်ႇလၢႆႇၼၼ်ႉတႄႉတႄႉၼႆၸိုင် ၼႂ်းၶၢဝ်းတၢင်း 22 ပီၼႆႉ တေပဵၼ်ပွၵ်ႈဢွၼ်တၢင်းသုတ်း ဢၼ်ႁိူဝ်းသိုၵ်း ၵျႃႇမၼီႇ ၶၢမ်ႈပူၼ်ႉၵႂႃႇၼၼ်ႉယဝ်ႉ။ ဢမႄႇရိၵၢၼ်ႇလႄႈ ၶႅၼ်ႇၼေႇတႃႇၶဝ် ၼႄႁိူဝ်းသိုၵ်းၶဝ် ဢၼ်လတ်းၽၢၼ်ႇ သၢႆၼမ်ႉပၢင်ႇလၢႆႇၼၼ်ႉ တႃႇၼႄ လွင်ႈလွတ်ႈလႅဝ်း လွင်ႈၵႂႃႇမႃး ၼႆယဝ်ႉ။
ငိူၼ်ႈငဝ်ႈၶၢဝ်ႇ
- Reuters. "China condemns German navy's transit of Taiwan Strait" — VOA News, September 14, 2024
- David Rising. "Germany sails two warships through Taiwan Strait for the first time in two decades" — AP News, September 13, 2024
- Xinlu Liang. "PLA slams Germany for sailing ships through Taiwan Strait, citing ‘security risks’" — South China Morning Post, September 14, 2024
- News Wires. "China accuses Germany of raising 'security risks' by sending military ships through Taiwan strait" — france24, September 14, 2024
