ဝၼ်းဢင်းၵၢၼ်း၊ ဢေႃးၵၢတ်ႉ 13၊ 2024
.svg)
ၾႆးမႆႈပႃႇထိူၼ်ႇ ႁၢဝ်ႈႁႅင်း ဢၼ်ႁွတ်ႈၽႅဝ်ထိုင် ၶႅပ်ႇဝဵင်းလူင်ဢေႇတိၼ်ႇ၊ မိူင်းၵရိတ်ႈ ၼၼ်ႉ မိူဝ်ႈဝၼ်းၸၼ်ၼၼ်ႉ လၢမ်းၽႄႈမႃးထိုင် ၼွၵ်ႈဝဵင်းယဝ်ႉ။ ႁိူၼ်းယေး လူတ်ႉၵႃးၵေႃႈ ၾႆးမႆႈသေ သဵၼ်ႈတႃႈသၢႆတၢင်းၵေႃႈ ၵွၼ်းၾႆးလမ် လႄႈ ၽုၼ်ႇထၢတ်ႈ ႁူမ်ႇငမ်းဝႆႉလႄႈ ၵူၼ်းမိူင်းၼပ်ႉႁူဝ်ပၢၵ်ႇ လႆႈပၢႆႈဢွၵ်ႇမႃး ဝႃႈၼႆယဝ်ႉ။
လူင်ပွင်ၸိုင်ႈမိူင်းၵရိတ်ႈၵေႃႈ ယွၼ်းတၢင်းၸွႆႈထႅမ်တီႈ ၸိုင်ႈမိူင်းၽူႈၶဝ်ႈၸုမ်း EU တႃႇတေၶႄၾႆးမႆႈထိူၼ်ႇ ဢၼ်ဢမ်ႇၸၢင်ႈၵုမ်းၵမ်လႆႈ ယွၼ်ႉလူမ်းလႅင်ႉလူင် ဢၼ်လုၵ်ႉတီႈလွႆ ၽၢႆႇႁွင်ႇဝဵင်းဢေႇတိၼ်ႇ ၽတ်ႉမႃးၼၼ်ႉ ၼႆယဝ်ႉ။ ၸုမ်းၶႄၾႆးၶဝ်ၵေႃႈလၢတ်ႈဝႃႈ ၼႂ်းၶၢဝ်းတၢင်းသိပ်းပီလိူဝ်ၼႆႉ ၾႆးမႆႈပႃႇ ဢၼ်ၽႄႈၸွတ်ႇၵႂႃႇ ၼႂ်းဝဵင်း ဢွၼ်တၢင်းသုတ်းၼၼ်ႉ ယွတ်ႈၽႆးမၼ်း လႆႈလၢမ်းဢိူမ်ႈၸမ်မႃးၸူး တိူၵ်ႈၵူၼ်းယူႇ၊ ႁူင်းႁဵၼ်းလႄႈ ႁူင်းၵၢၼ်ၸိူဝ်းၼႆႉယဝ်ႉ ဝႃႈၼႆ။
တေႃႇထိုင်ၵၢင်ၶမ်ႈၵေႃႈ ဢမ်ႇႁၼ်တၢင်း တႃႇယွတ်ႈၾႆးတေ တူၵ်း။ ၵူၼ်းၶႄၾႆး လူၺ်ႈၸေႇတၼႃႇ 700 ၵေႃႉလိူဝ်၊ ၵႃးၶႄၾႆး 199 လမ်း လႄႈ ႁိူဝ်းမိၼ်ၽူႇၼမ်ႉ 35 လမ်း ႁူမ်ႈၵၼ်ၶႄၾႆး ဢၼ်တႄႇမႆႈ တီႈႁွင်ႇဝဵင်းဢေႇတိၼ်ႇ မွၵ်ႈ 20 လၵ်း မိူဝ်ႈဝၼ်းဢႃးတိတ်ႉ ယၢမ်းဝၢႆးဝၼ်း မွၵ်ႈ 3:00 မူင်းၼၼ်ႉယဝ်ႉ။ တွၼ်ႈတႃႇၸွႆႈၶႄ ၾႆးပႃႇထိူၼ်ႇတီႈ မိူင်းၵရိတ်ႈၼၼ်ႉ ၸိူဝ်းပဵၼ် မိူင်းၾရၢင်ႇသဵတ်ႈ၊ မိူင်းၶျႅၵ်ႉ၊ မိူင်းသႃးဝီးယႃး လႄႈ မိူင်းတိူဝ်ႇၵီႇ ၸိူဝ်းၼႆႉ တေ သူင်ႇၵူၼ်းၶႄၾႆး လႄႈ ႁိူဝ်းမိၼ် ၸိူဝ်းၼႆႉၵႂႃႇ ဝႃႈၼႆယဝ်ႉ။
တီႈမိူင်းၵရိတ်ႈၼႆႉ ၶၢဝ်းမႆႈၼႆႉ မႆႈလိူဝ်လႄႈ ၾႆးမႆႈထိူၼ်ႇၵေႃႈ ၵႆႉပဵၼ်ယူႇသေတႃႉ ယွၼ်ႉၾိင်ႈၾႃႉရႃႇသီႇ လႅၵ်ႈလၢႆႈလႄႈ ၾႆးမႆႈပႃႇထိူၼ်ႇ ႁၢဝ်ႈႁႅင်းမႃးလိူဝ်ၵဝ်ႇသေ ၾႆးမႆႈပႃႇထိူၼ်ႇ ၵႆႉၵႆႉပဵၼ်ၼမ်မႃး ၼႆယဝ်ႉ။ ယွၼ်ႉလူမ်းမႆႈႁႅင်းၼႃႇလႄႈ တီႈမိူင်းသပဵၼ်ႇ လႄႈ ထုင်ႉပႃႇလၵႅၼ်ႇ ၵေႃႈ ၾႆးမႆႈပႃႇထိူၼ်ႇလူင် မႃးၼင်ႇၵဝ်ႇယဝ်ႉ။
ငိူၼ်ႈငဝ်ႈၶၢဝ်ႇ
- Nikos Papanikolaou, Hafsa Khalil. "Thousands evacuated as wildfires reach Athens" — BBC News, August 13, 2024
- Chris Liakos, Alex Stambaugh and Caitlin Danaher, CNN. "Evacuations ordered near Athens as Greek authorities try to contain wildfires" — CNN, August 12, 2024
- Rich Booth, Jabed Ahmed, Stuti Mishra. "Greece wildfires - latest: One dead and thousands evacuated as flames spread through Athens suburbs" — The Independent, August 12, 2024
- Stelios Misinas and Angelos Tsatsis. "Wildfire fanned by gales menaces Athens suburbs as residents flee" — Reuters, August 13, 2024
- Stelios Misinas and Angelos Tsatsis. "Greek officials evacuate residents as wildfire moves ‘like lightning’" — Helena Smith, August 12, 2024
- Sky News. "Massive wildfire with 25 metre-high flames rages out of control in Greek capital" — Sky News, August 12, 2024
