ဝၼ်းၸၼ်၊ ဢေႇပရႄႇ 29၊ 2024
.svg)
တီႈၼႂ်းသိုဝ်ႇၶၢဝ်ႇထႆးၶဝ် လၢတ်ႈဝႃႈ ၽွင်းလူင် ၵၢၼ်ၼွၵ်ႈမိူင်းထႆး ပၢၼ်းပရီႇၽႁိတ်ႇထၼုၵ်ႉၶွၼ်ႇ ၼႆႉ ထွၼ်တူဝ်တႃၶုၼ်ၵႂႃႇယဝ်ႉ ဝႃႈၼႆ။ ပၢၼ်းပရီႇၽႁိတ်ႇထၼုၵ်ႉၶွၼ်ႇ ဢၼ်ပဵၼ် ၽွင်းလူင်ၵၢၼ်ၼွၵ်ႈမိူင်းထႆး ၼႆႉ ၵဵဝ်ႇၵပ်းလူၺ်ႈ လိူင်လႅၼ်လိၼ်မိူင်းမၢၼ်ႈသေ ၼႂ်းလိူၼ်ၼႆႉၵူၺ်း မၼ်းလႆႈႁွတ်ႈထိုင် ဝဵင်းမႄႈသွတ်ႇ ဢၼ်ဢိူမ်ႈၵၼ်တင်း မျႃႉဝတီႇၼၼ်ႉ သွင်ပွၵ်ႈယဝ်ႉ။
လွင်ႈတၢင်းမၼ်း ဢမ်ႇပႆႇလႆႈႁူႉၸႅင်ႈလႅင်းသေတႃႉ တီႈလွင်ႈလႅၵ်ႈလၢႆႈ ၸုမ်းလူင်ပွင်ၸိုင်ႈထႆးၼၼ်ႉ ပၢၼ်းပရီႇၼႆႉ လႆႈပွႆႇၽႃႈပႅတ်ႈ ပုၼ်ႈၽွၼ်း ၵႅမ်ၸွမ်ၽွင်းလူင်ယဝ်ႉသေ ၸင်ႇလႆႈမီးၶၢဝ်ႇ ထွၼ်တူဝ်ဢွၵ်ႇတီႈ တႃၶုၼ် ၽွင်းလူင်ၵၢၼ်ၼွၵ်ႈမိူင်းထႆး ၼၼ်ႉယဝ်ႉ။
တီႈၼႂ်းၶေႃႈပိုၼ်ၶၢဝ်ႇ ႁၢင်ႈႁေႃၶုၼ်ႁေႃၶမ်း ဢၼ်ပိုၼ်ဢွၵ်ႇ မိူဝ်ႈဝႃးၼၼ်ႉတႄႉ တီႈၼႂ်းၸုမ်းလူင်ပွင်ၸိုင်ႈမႂ်ႇ ၸွမ်ၽွင်းလူင် သဵတ်ႇထႃ ထဝိသိၼ် ဢၼ်လႆႈ ၶေႃႈယိုၼ်ယၼ် ၵႃႈတီႈ ၶုၼ်ႁေႃၶမ်းၼၼ်ႉ ပၢၼ်းပရီႇၼႆႉ မီးဝႆႉ တီႈယူႇ ၽွင်းလူင်ၵၢၼ်ၼွၵ်ႈမိူင်းၵူၺ်းသေ တီႈယူႇ ၵႅမ်ၸွမ်ၽွင်းလူင်ၼၼ်ႉ ဢမ်ႇလႆႈႁၼ်ပႃးၸိုဝ်ႈမၼ်းမႃး။
ပၢၼ်းပရီႇ တႄႉ လွင်ႈဢၼ်မၼ်းလႆႈ တၢင်ႇလိူၵ်ႈထွၼ်တူဝ်ဢွၵ်ႇၼႆႉ မၼ်းဢမ်ႇၵဵဝ်ႇၵပ်းလူၺ်ႈ လွင်ႈထုၵ်ႇပၢၵ်ႈပႅတ်ႈ ၵႃႈတီႈ ၵႅမ်ၸွမ်ၽွင်းလူင်သေ မၼ်းလႆႈယိၼ်းၸူမ်းၶွပ်ႈၸႂ်ထိုင် ၸွမ်ၽွင်းလူင်ထႆး သဵတ်ႇထႃ ထဝိသိၼ် ဢၼ်လႆႈပၼ်ပုၼ်ၽွၼ်းမၼ်း တႃႇ ၽွင်းလူင်ၵၢၼ်ၼွၵ်ႈမိူင်း ဝႃႈၼႆယဝ်ႉ။
ၽွင်းလူင်ၵၢၼ်ၼွၵ်ႈမိူင်း ပၢၼ်းပရီႇၼႆႉ မၼ်းပဵၼ် ၽူႈဢွၼ်ႁူဝ် တီႈ လၢႆးၵၢၼ် ဢၼ်တေ လုၵ်ႉတီႈမိူင်းထႆးသေ တႃႇဢဝ် တၢင်းၸွႆႈထႅမ် ပၼ် တႃႇၵူၼ်းထူပ်းၽေးတီႈမိူင်းမၢၼ်ႈ ၼၼ်ႉသေ ၵပ်းၵၢႆႇလူၺ်ႈ ပၢင်တိုၵ်းႁၢဝ်ႈႁႅင်းတီႈမျႃႉဝတီႇၼၼ်ႉသေ မိူဝ်ႈပူၼ်ႉမႃးလၢႆလၢႆဝၼ်းၼၼ်ႉ လႆႈၵႂႃႇတီႈ ဝဵင်းမႄႈသွတ်ႇ တီႈလႅၼ်လိၼ် ထႆး-မၢၼ်ႈ ၼၼ်ႉယဝ်ႉ။
ၸွမ်ၽွင်းလူင် သဵတ်ႇထႃ ထဝိသိၼ် လၢတ်ႈဝႃႈတႄႉ မၼ်းမီးတႃႇတၢင်ႇလဝ်ႈ တႃႇပၼ်ပုၼ်ႈၽွၼ်း ၽူႈၶဝ်ႈပႃႇတီႇၽိူဝ်ႉထႆး တႃႇသိုပ်ႇပုတ်ႈ ဢွင်ႈတီႈ ၽွင်းလူင်ၵၢၼ်ၼွၵ်ႈမိူင်း ဢၼ်ပဵၼ် တီႈယူႇ ပၢၼ်းပရီႇ ဢၼ်ထွၼ်တူဝ်ဢွၵ်ႇၵႂႃႇၼၼ်ႉယူႇ ဝႃႈၼႆ။
ငိူၼ်ႈငဝ်ႈတိုၼ်း edit
- Reuters. "Thai foreign minister quits after cabinet reshuffle" — Reuters, April 29, 2024
- AP News. "Thailand’s foreign minister abruptly resigns after being dropped as deputy prime minister" — AP News, April 29, 2024
- Associated Press. "Thailand's foreign minister abruptly resigns after being dropped as deputy prime minister" — The Washington Post, April 29, 2024
- Sebastian Strangio. "Thai Foreign Minister Steps Down, Leaving Myanmar Policy in Limbo" — The Diplomat, April 29, 2024
- Bangkok Post. "Foreign Minister Parnpree quits after major reshuffle" — Bangkok Post, April 28, 2024
