Wn/shn/ၸဝ်ႈၸွမ်ၸိုင်ႈ ရတ်ႈသျႃး ပၼ်ၵႂၢမ်းမၼ်ႈ တႃႇယုၵ်ႉသုင် လွင်ႈသိူၵ်ႈသမ်ႇၵၼ်တင်း မိူင်းၶႄႇ

ဝၼ်းသုၵ်း၊ မေႇ 17၊ 2024 

ၸဝ်ႈၸွမ်ၸိုင်ႈၶႄႇ သျီးၸိၼ်းပိင်ႇ လႄႈ ၸဝ်ႈၸွမ်ၸိုင်ႈရတ်ႈသျႃး ဝလႃႇၻီႇမီႇရ် ပူႇထိၼ်ႇ ႁူပ်ႉထူပ်းၵၼ်

ၸဝ်ႈၸွမ်ၸိုင်ႈၶႄႇ သျီးၸိၼ်းပိင်ႇ ဢၼ်ႁပ်ႉႁူပ်ႉထူပ်း ၸဝ်ႈၸွမ်ၸိုင်ႈရတ်ႈသျႃး ဝလႃႇၻီႇမီႇရ် ပူႇထိၼ်ႇ ၵႃႈတီႈ ဝဵင်းပေႇၸိၼ်းၼၼ်ႉ လႆႈယွင်ႈယေႃးၼိူဝ် လွင်ႈၵပ်းသိုပ်ႇသိူၵ်ႈသမ်ႇ ၶႄႇ-ရတ်ႈသျႃးသေ မၼ်းလၢတ်ႈဝႃႈ တေသိုပ်ႇႁဵတ်းသၢင်ႈၵႂႃႇ တႃႇႁႂ်ႈ လွင်ႈသိူၵ်ႈသမ်ႇ တိူဝ်းလိုၵ်ႉလမ်ႇ ဝႃႈၼႆယဝ်ႉ။

ၸဝ်ႈၸွမ်ၸိုင်ႈရတ်ႈသျႃးပူႇထိၼ်ႇ ဢၼ်ႁွတ်ႈထိုင်မိူင်းၶႄႇ ၶၢဝ်းတၢင်းသွင်ဝၼ်းၼၼ်ႉ မၼ်းလၢတ်ႈဝႃႈ လွင်ႈၵပ်းသိုပ်ႇပဵၼ်ၵူၺ်းၵၼ်ၼႆႉ မၼ်းႁဵတ်းႁႂ်ႈ ၵမ်ႇၽႃႇလူင်ၼိမ်မၼ်ႈ ဝႃႈၼႆႉယဝ်ႉ။ လွင်ႈၵပ်းသိုပ်ႇသိူၵ်ႈသမ်ႇ ၶႄႇ-ရတ်ႈသျႃးၼႆႉ ဢမ်ႇမီးလွင်ႈလႆႈသၢၼ်ၶတ်းၽႂ် ၵမ်းသိုဝ်ႈ ၼႆ ႁွင်ႈၵၢၼ်ၶၢဝ်ႇ ၸိုင်ႈမိူင်းရတ်ႈသျႃး RIA Novosti လႆႈလၢတ်ႈၵႂႃႇဝႃႈၼၼ်ယဝ်ႉ။ ၸဝ်ႈၸွမ်ၸိုင်ႈပူႇထိၼ်ႇ မွၵ်ႇလၢတ်ႈဝႃး မၼ်းလႆႈ ယိၼ်းၸူမ်းၼိူဝ် လွင်ႈမိူင်းၶႄႇ ၶတ်းၸႂ် တႃႇၵႄႈလိတ်ႈၼိူဝ် သၢႆငၢႆယူႇၶရဵၼ်း ဝႃႈၼႆသေ ၵပ်းၵၢႆလူၺ်ႈ သၢႆငၢႆလွင်ႈၶိုပ်ႈၼႃႈ လိုၼ်းသုတ်းၼၼ်ႉ တေမွၵ်ႇလၢတ်ႈ ၸဝ်ႈၸွမ်ၸိုင်ႈသျီးၵႂႃႇ ႁႂ်ႈႁူႉၸွမ်းယူႇ ဝႃႈၼႆယဝ်ႉ။

ပီ 2022 လိူၼ်ၾႅပ်ႇဝႃႇရီႇၼၼ်ႉ ယွၼ်ႉပိူဝ််ႈ ရတ်ႈသျႃးၶဝ် လႆႈၶဝ်ႈတိုၵ်း ယူႇၶရဵၼ်းလႄႈ ၵူႈမိူင်းမိူင်း လႆႈသႄႉသွမ်းမႃးသေ ၸိူဝ်းပဵၼ် မိူင်းဝၼ်းတူၵ်းၼၼ်ႉတႄႉ ၼင်ႇႁိုဝ်တေပဵၼ် ႁႅင်းဢီး တႃႇႁႂ်ႈ တပ်ႉရတ်ႈသျႃးၶဝ် ပေႃးတေထွႆလင်ၵႂႃႇၼၼ်ႉ လႆႈတမ်းဝၢင်း တၢမ်ႇဢိုတ်းႁႄႉ မႃးယဝ်ႉ။ ဢေႇၵျႅၼ်ႇသီႇ ၶၢဝ်ႇသိၼ်ႇႁႂႃႇ ၶွင်လူင်ပွင်ၸိုင်ႈၶႄႇ လႆႈဢၢင်ႈဢိင်ၼိူဝ် ၶေႃႈမွၵ်ႇလၢတ်ႈ ပူႇထိၼ်ႇ ဢၼ်မွၵ်ႇလၢတ်ႈ မိူဝ်ႈဝၼ်းပုတ်ႉၼၼ်ႉသေ လၢတ်ႈဝႆႉဝႃႈ ၵဵဝ်ႇၵပ်းလူၺ်ႈ တႃႇႁႃၶေႃႈၵႄႈၶႆ လွင်ႈသုၵ်ႉယုင်ႈၼႆႉသေ ၽၢႆႇရတ်ႈသျႃးၼႆႉ ဢမ်ႇလႆႈထဵင်မႃး လွင်ႈတႃႇငူပ်ႉငိၵၼ် သေပွၵ်ႈ၊? ယဝ်ႉၵေႃႈ တိုၵ်ႉၶတ်းၸႂ် တႃႇဢဝ်လွၵ်းလၢႆးငမ်းယဵၼ် ဢၼ်မီးလွင်ႈၵႅၼ်ႇၶၢဝ်းယၢဝ်းသေ ၵႄႈၶႆၵႂႃႇ ဝႃႈၼႆယဝ်ႉ။

ၸဝ်ႈၸွမ်ၸိုင်ႈ ဝူဝ်ႇလူဝ်ႇၻီႇမီႇရ် ၸႄႇလႅၼ်ႇသၵီး လႆႈတၢင်ႇလၢတ်ႈဝႆႉ လၢႆးငၢၼ်းလွင်ႈငမ်းယဵၼ်သေ မိူင်းသဝိတ်ႉၸႃႇလႅၼ်ႇၵေႃႈ လႆႈႁပ်ႉပဵၼ်ၸဝ်ႈႁိူၼ်း တႃႇႁဵတ်း ပၢင်ဢုပ်ႇဢူဝ်းလွင်ႈငမ်းယဵၼ် ၼႂ်းလိူၼ်တေမႃးသေတႃႉ ဢမ်ႇလႆႈၽိတ်ႈမွၵ်ႇပႃး ရတ်ႈသျႃးၼင်ႇၵဝ်ႇ။

ငိူၼ်ႈငဝ်ႈတိုၼ်း

• VOA News. "Xi, Putin pledge to deepen strategic ties at Beijing talks" — VOA News, May 16, 2024
• Amy Hawkins. "Putin and Xi announce plans to strengthen military ties in Beijing" — The Guardian, May 16, 2024
• Jennifer Jett, Larissa Gao and Mithil Aggarwal. "Putin and Xi vow to deepen 'no limits' partnership as Russia advances in Ukraine" — NBC News, May 16, 2024