ဝၼ်းသဝ်၊ သႅပ်ႇထႅမ်ႇပႃႇ 7၊ 2024
လူမ်းလႅင်ႉလူင် Yagi ဢၼ်ႁႅင်းယႂ်ႇၼၼ်ႉ ၽတ်ႉၶဝ်ႈမႃး မိူဝ်ႈၶမ်ႈဝႃး တီႈၵုၼ်ႁၢႆႇၼၢၼ်ႇ မိူင်းၶႄႇ ပွတ်းႁွင်ႇဝၼ်းဢွၵ်ႇ တီႈ ဝဵင်း Wenchang သေ လူမ်းလႅင်ႉလူင် ၼိုင်ႈၸူဝ်ႈမူင်းတေႃႇ ႁႅင်းလိူဝ် 145 လၵ်း ၼႆယဝ်ႉ။
လူမ်းလႅင်ႉလူင် Super Typhoon Yagi ၼႆႉ ပဵၼ်လူမ်းလႅင်ႉလူင် ဢၼ်ႁႅင်းလိူဝ်ပိူၼ်ႈ ဝၢႆးသေ လူမ်းလႅင်ႉလူင် Rammasun ၽတ်ႉၶဝ်ႈမႃး တီႈၵုၼ်ႁၢႆႇၼၢၼ်ႇ မိူဝ်ႈပီ 2014 ဢၼ် ၵူၼ်းတၢႆ 46 ၵေႃႉ ၼၼ်ႉယဝ်ႉ။
တီႈၵုၼ်ႁၢႆႇၼၢၼ်ႇ လႄႈ တိူင်းၵႂၢင်းၸူဝ်း ၸိူဝ်းၼႆႉၵေႃႈ ပိုၼ်ၽၢဝ်ႇပၼ်ၽၢင်ႉၶိုၵ်ႉၶၵ်ႉသေ ၸဝ်ႈၼႃႈတီႈၶဝ် လႆႈဢဝ်ၵူၼ်းမိူင်း 4 သႅၼ်လိူဝ် ၶၢႆႉပၢႆႈဢွၵ်ႇၵႂႃႇ ၼႆယဝ်ႉ။ လူမ်းလႅင်ႉလူင်ပွၵ်ႈၵမ်းၼႆႉ ၼပ်ႉသွၼ်ႇဝႃႈ ပဵၼ်လူမ်းလႅင်ႉလူင်ဢၼ်ႁႅင်းလိူဝ်ပိူၼ်ႈ ၼႂ်းၶၢဝ်းတၢင်းသိပ်းပီပူၼ်ႉမႃး ဝႃႈၼႆယဝ်ႉ။
လူမ်းလႅင်ႉလူင် ယႃႇၵီႇ ၽတ်ႉၶဝ်ႈၼႂ်းမိူင်းၶႄႇပွတ်းႁွင်ႇသေ မိူဝ်ႈဝၼ်းသဝ်ၼၼ်ႉ လၢမ်းၶၢတ်ႈဝႃႈ တေၽတ်ႉၶဝ်ႈမႃးတီႈ Halong Bay ဢၼ်ပဵၼ်ဢွင်ႈတီႈၵိုၵ်းပိုၼ်း ၾိင်ႈငႄႈၾိင်ႈထုင်း ၼႂ်းမိူင်းဝႅတ်ႉၼၢမ်းၼၼ်ႉ ၼႆယဝ်ႉ။
တီႈမိူင်းႁွင်ႇၵွင်ႇတႄႉ ယွၼ်ႉလူမ်းလႅင်ႉၽတ်ႉလႄႈ ၵၢတ်ႇၵႃႉၶၢႆလွၵ်းၵၢတ်ႇသျႄႇယႃႇၵေႃႈ လႆႈဢိုတ်းဝႆႉ မိူဝ်ႈဝၼ်းသုၵ်းၼၼ်ႉသေ ႁူင်းႁဵၼ်း၊ လုမ်းၸိူဝ်းၼႆႉၵေႃႈ ဢိုတ်းဝႆႉ။
လူမ်းလႅင်ႉလူင် ယႃႇၵီႇ ႁဵတ်းႁႂ်ႈၼမ်ႉထူမ်ႈ တီႈမိူင်းၾီလိပ်ႉပိၼ်း မိူဝ်ႈႁူဝ်ဝူင်ႈၼႆႉ။ လိၼ်ၵူၼ်ႇပင်းသေ လူႉတၢႆၵႂႃႇ ဢမ်ႇယွမ်း 13 ၵေႃႉ ဝႃႈၼႆ။ တီႈမိူင်းႁိမ်းႁွမ်း ဝႅတ်ႉၼၢမ်းၼၼ်ႉၵေႃႈ ၵူၼ်းမိူင်းၼပ်ႉႁူဝ်သႅၼ် လႆႈၶၢႆႉပၢႆႈမႃး။
ငိူၼ်ႈငဝ်ႈၶၢဝ်ႇ
- Jane Caii. "Super Typhoon Yagi pummels China’s Hainan, killing 2 and injuring 92" — South China Morning Post, September 7, 2024
- VOA News. "Super Typhoon Yagi head to Vietnam, 2 reported dead in China's Hainan" — VOA News, September 7, 2024
- Minh Nguyen and Thinh Nguyen. "Super Typhoon Yagi hits Vietnam after casualties in China's Hainan" — Reuters, September 7, 2024
- Kelly Ng and Joel Guinto. "Strongest typhoon in a decade hits 'China's Hawaii'" — BBC News, September 7, 2024
- Reuters. "Super Typhoon Yagi hits China’s Hainan, killing two people and forcing 1 million to leave their homes" — The Guardian, September 7, 2024
