ဝၼ်းၽတ်း၊ မၢတ်ႉၶျ် 14၊ 2024
ဝၢႆးသေ သၽႃးတႂ်ႈ ဢမႄႇရိၵၢၼ်ႇ လႆႈမၵ်းမၼ်ႈ ၵူတ်းမၢႆယုၵ်းယၢင်ႇ တႃႇႁႄႉႁၢမ်ႈ သိုဝ်ႇသၢၼ်တူင်ႇၵူင်း ဢႅပ်ႉ TikTok ဢၼ်ပဵၼ် ၶွင် ၶွမ်ႇပၼီႇၶႄႇ ၼၼ်ႉ တီႈ ပတ်ႉပိုၼ်ႉ ဢမႄႇရိၵၢၼ်ႇ ၼၼ်ႉသေ ၽၢႆႇမိူင်းၶႄႇ လႆႈတုၵ်းယွၼ်း ႁႂ်ႈၶႄႉၶဵင်ႇပၢႆးမၢၵ်ႈမီးၵၼ် ၽဵင်ႇၽဵင်ႇပဵင်းပဵင်း ဝႃႈၼႆယဝ်ႉ။ ဢႅပ်ႉတိၵ်ႉတွၵ်ႉၼႆႉ မၼ်းပဵၼ် လွင်ႈဢၼ်လီလႆႈမႆႈၸႂ် တွၼ်ႈတႃႇ ပၢႆးႁူမ်ႇလူမ်ႈၸိုင်ႈမိူင်း ၼႆသေ တီႈ သၽႃးတႂ်း ဢမႄႇရိၵၢၼ်ႇၼႆႉ ၵဵပ်းၶႅပ်းၵၢင်ၸႂ်သေ ၶႅပ်းၵၢင်ၸႂ် ဢၼ်ၵမ်ႉထႅမ် လႆႈ 352 ၶႅပ်း ၶႅပ်းၵၢင်ၸႂ် ဢၼ်သၢၼ်ၶတ်း လႆႈ 65 ၶႅပ်းသေ လႆႈမၵ်းမၼ်ႈမႃးမိူဝ်ႈဝၼ်းပုတ်ႉၼၼ်ႉယဝ်ႉ။ မိူဝ်ႈၼႆႉတႄႉ ၽူႈမီးသုၼ်ႇလၢတ်ႈ ၽၢႆႇထၢၼ်ၽွင်းလူင်ၵၢၼ်ၵႃႉၶၢႆ မိူင်းၶႄႇ လႆႈၶိုၼ်းမွၵ်ႇလၢတ်ႈ တွပ်ႇၶိုၼ်းမႃးၼင်ႇၼၼ်ယဝ်ႉ။
ၽူႈမီးသုၼ်ႇလၢတ်ႈ ၽၢႆႇထၢၼ်ၽွင်းလူင်ၵၢၼ်ၵႃႉၶၢႆ မိူင်းၶႄႇ He Yadong မွၵ်ႇလၢတ်ႈဝႃႈ " ၵပ်းၵၢႆႇလူၺ်ႈ ၵူတ်းမၢႆ လွင်ႈၶႄႉၶဵင်ႇပၢႆးမၢၵ်ႈမီး ၽဵင်ႇၽဵင်ႇပဵင်းပဵင်း လႄႈ ပၢႆးမၢၵ်ႈမီးလွၵ်းၵၢတ်ႇၼၼ်ႉ မိူင်းႁူမ်ႈတုမ် ဢမႄႇရိၵၢၼ်ႇၶဝ် ထုၵ်ႇလီ ၼပ်ႉယမ်ယူႇ။ လွင်ႈတဵၵ်းတဵင် ၶွမ်ႇပၼီႇ တၢင်ႇမိူင်း ဢၼ်ဢမ်ႇမီးလွင်ႈမီးတၢင်းမၼ်းၼၼ်ႉ လူဝ်ႇလႆႈ ၵိုတ်းယဝ်ႉ။ တႃႇႁႂ်ႈ ၵၢၼ်ငၢၼ်းပၢႆးမၢၵ်ႈမီးတၢင်ႇမိူင်း ႁႂ်ႈပေႃး ပၼ်ႇၵၢၼ်မၼ်းလႆႈ တီႈ မိူင်းဢမႄႇရိၵၢၼ်ႇ ၼၼ်ႉ လူဝ်ႇႁဵတ်းပၼ် သိုင်ႇဝႅတ်ႉလွမ်ႉပၢႆးမၢၵ်ႈမီး ဢၼ်လွတ်ႈလႅဝ်း၊ ဢၼ်ဢမ်ႇမီး လွင်ႈၶီႇၼဵၵ်းတဵၵ်းတဵင်ၵၼ်ၼၼ်ႉယဝ်ႉ" ဝႃႈၼႆ။
ထၢၼ်ၽွင်းလူင် ၵၢၼ်ၼွၵ်ႈမိူင်းၶႄႇၵေႃႈ မွၵ်ႇလၢတ်ႈဝႃႈ ဢဝ်လွင်ႈတၢင်းဝႃႈ ပၢႆးႁူမ်ႇလူမ်ႈၸိုင်ႈမိူင်းၼႆသေ လွင်ႈဢၼ်ဢၢၼ်းတဵၵ်းတဵင် ႁူင်းၵၢၼ်တၢင်ႇမိူင်း ဢၼ်ပၢႆးမၢၵ်ႈမီး တိူဝ်းၶႅမ်ႉလိူဝ်ၼၼ်ႉ မၼ်းဢမ်ႇၸႂ်ႈ လွင်ႈႁဵတ်းသၢင်ႈ ဢၼ်ၽဵင်ႇပဵင်း ဝႃႈၼႆယဝ်ႉ။ ၵူၼ်းၸႂ်ႉ ဢႅပ်ႉထိၵ်ႉတွၵ်ႉ ဢၼ်ပဵၼ် ၶွင် ၶွမ်ႇပၼီႇပၢႆးၸၢင်ႈၶႄႇ ByteDance ၼႆႉ တီႈဢမႄႇရိၵၢၼ်ႇ မီးယူႇ ဢမ်ႇယွမ်း 150 လၢၼ်ႉ ဝႃႈၼႆယဝ်ႉ။
တႅၼ်းၽွင်းသၽႃးဢမႄႇရိၵၢၼ်ၶဝ် ၸီႉၼႄလွင်ႈဢၼ်ဝႃႈ ၸွမ်းလူၺ်ႈ ၵူတ်းမၢႆပၢႆးႁူမ်ႇလူမ်ႈမိူင်းၶႄႇသေ သင်ၸိူဝ်ႉဝႃႈ လူင်ပွင်ၸိုင်ႈၶႄႇ တုၵ်းယွၼ်း ၶေႃႈမုၼ်း ၽူႈၸႂ်ႉတိုဝ်း တိၵ်ႉတွၵ်ႉဢမႄႇရိၵၢၼ်ႇမႃးၸိုင်ႈ ၽၢႆႇႁူင်းၵၢၼ် ByteDance ၶဝ် တိုၼ်းတေလႆႈပၼ် ဢၼ်ဝႃႈၼၼ်ႉသေ ၸင်ႇလႆႈၶတ်းၸႂ် တႃႇႁႄႉႁၢမ်ႇတိၵ်ႉတွၵ်ႉ တီႈ ပတ်ႉပိုၼ်ႉမိူင်းၼၼ်ႉယဝ်ႉ။ တီႈသၽႃးၼိူဝ်တႄႉ ပႆႇလႆႈမၵ်းမၼ်ႈ ပိူင်ယုၵ်းယၢင်ႇဢၼ်ၼႆႉ ၼင်ႇၵဝ်ႇ။ ၽူႈဢွၼ်ႁူဝ်သၽႃးၼိူဝ် ဝႃႈတႄႉၵေႃႈ လွင်ႈဢၼ်ၼႆႉ တေၶိုၼ်းထတ်းသၢင်တူၺ်းလီလီၵွၼ်ႇ ဝႃႈၼႆ။
ၽၢႆႇၶွမ်ႇပၼီႇ တိၵ်ႉတွၵ်ႉ လႆႈမွၵ်ႇလၢတ်ႈဝႆႉဝႃႈတႄႉ ၶဝ်ဢမ်ႇတွၼ်ႉယၢမ်ႈဢဝ် ၶေႃႈမုၼ်း ၽူႈၸႂ်ႉတိုဝ်း တိၵ်ႉတွၵ်ႉ ဢမႄႇရိၵၢၼ်ႇၶဝ် ပၼ်လူင်ပွင်ၸိုင်ႈၶႄႇမႃးသေပွၵ်ႈသေ သင်ၸိူဝ်ႉဝႃႈ ယွၼ်းမႃးၵေႃႈ ၶဝ်တေဢမ်ႇပၼ် ဝႃႈၼႆယဝ်ႉ။ ၽၢႆႇလူင်ပွင်ၸိုင်ႈ ဢမႄႇရိၵၢၼ်တႄႇ ႁၢၼ်ႉတေႃႇထိုင်ယၢမ်းလဵဝ် ဢမ်ႇပႆႇႁၼ်မွၵ်ႇလၢတ်ႈ လၵ်းထၢၼ် ဢၼ်ဝႃႈ တိၵ်ႉတွၵ်ႉ ဢဝ်ၶေႃႈမုၼ်းမၼ်း ၽႄႈပၼ် လူင်ပွင်ၸိုင်ႈၶႄႇ ဢၼ်ဝႃႈၼၼ်ႉ။ ၸိူဝ်းပဵၼ်ၵူၼ်းလႆႈပိုင်ႈဢိိင် တိၵ်ႉတွၵ်ႉသေ ႁဵတ်း ၵၢၼ်ငၢၼ်းပၢႆးမၢၵ်ႈမီးၼၼ်ႉၵေႃႈ တိုၵ်ႉဢွၼ်ၵၼ် သၢၼ်ၶတ်း လွင်ဢၼ်တေ မၵ်းမၼ်ႈၵူတ်းမၢႆသေ ႁႄႉႁၢမ်ႈတိၵ်ႉတွၵ်ႉၼႆႉယူႇ။
ငိူၼ်ႈငဝ်ႈတိုၼ်း
- Agence France-Presse. "China Says US TikTok Vote Follows 'Logic of a Bandit'" — VOA News, March 14, 2024
- VOA News. "TikTok တားမြစ်ရေး ကန်ဥပဒေကြမ်း တရုတ်ကန့်ကွက်" — VOA News, March 14, 2024
