ဝၼ်းဢင်းၵၢၼ်း၊ ၾႅပ်ႇဝႃႇရီႇ 6၊ 2024
.svg)
.jpg)
ၶုၼ်ႁေႃၶမ်းလူင် မိူင်းပရိတ်ႈတဵၼ်ႇ ဢၼ်ပဵၼ် ၶျႃးလ်သ် ထူၼ်ႈသၢမ်ၼၼ်ႉ လႆႈၵူတ်ႇထတ်းႁူႉႁၼ်ဝႃႈ ပဵၼ်တၢင်းပဵၼ် ၶႅၼ်ႇသႃႇမဵဝ်းၼိုင်ႈ ၼႆသေ လႆႈတႄႇၶၢမ်ႇဢဝ်တၢင်းယူတ်းယႃႇယူႇ ၼႆ လုၵ်ႉတီႈႁၢင်ႈႁေႃပႃၵိင်းႁႅမ်ႇသေ လႆႈပိုၼ်ၽၢဝ်ႇ မိူဝ်ႈ ၾႅပ်ႇဝႃႇရီႇ ဝၼ်းထိ 5 ၼၼ်ႉယဝ်ႉ။
ၶႅၼ်ႇသႃႇဢၼ်ၼႆႉ မၼ်းဢမ်ႇၵဵဝ်ႇၵပ်းၵၼ်တင်း လွင်ႈယူတ်းယႃပူမ်ထူင်ၼမ်ႉၸိူဝ်ႉ ၶုၼ်ႁေႃၶမ်းၶျႃးလ်သ် ဢၼ်တိုၵ်ႉႁႃၵူတ်ႇမႃးဝူင်ႈဝၢင်ႈၼၼ်ႉဝႃႈၼႆယဝ်ႉ။ ၶႅၼ်ႇသႃႇ ဢၼ်လႆႈႁၼ်တီႈ ၶုၼ်ႁေႃၶမ်းၼၼ်ႉ မၼ်းပဵၼ်မဵဝ်းလႂ်ဢၼ်ဝႃႈၼၼ်ႉတႄႉ ဢမ်ႇမွၵ်ႇလၢတ်ႈၼင်ႇၵဝ်ႇ။ လုၵ်ႉတီႈ ႁေႃၶမ်းပႃၵိင်းႁႅမ်ႇ မွၵ်ႇလၢတ်ႈဝႃႈ မိူဝ်ႈလိူၼ်ပူၼ်ႉၼၼ်ႉၵေႃႈ ယွၼ်ႉပိူဝ်ႈ ပူမ်ထူင်ၼမ်ႉၸိူဝ်ႉ ၶုၼ်ႁေႃၶမ်း လႆႈၵႂ်ႈလႄႈ ပဵၼ်ဝႆႉသၢႆငၢႆ ဢၼ်လူဝ်ႇလႆႈၵူတ်ႇထတ်းလႄႈ လႆႈၵူတ်ႇထတ်းသေ ၸင်ႇလႆႈႁၼ် တၢင်းပဵၼ်ၶႅၼ်ႇသႃႇမႃးၸိူင်ႉၼႆယဝ်ႉ။
တေလႆႈ ၶၢမ်ႇတၢင်းယူတ်းယႃၵႂႃႇလႄႈ ၽွင်းမိူဝ်ႈၶၢမ်တၢင်းယူတ်းယႃယူႇၼၼ်ႉတႄႉ မေႃယႃၶဝ်သင်ႇလၢတ်ႈ တႃႇႁႂ်ႈၵိုတ်းဝႆႉ လွင်ႈႁူပ်ႉထူပ်းၵၼ်တင်း ၵူၼ်းမိူင်း ၼႆယဝ်ႉ။
ၵဵဝ်ႇၵပ်းလူၺ်ႈ ၵၢၼ်မိူင်း၊ ၵၢၼ်ငၢၼ်းပုၼ်ႈၽွင်း ဢၼ်ၵဵဝ်ႇၵပ်းလူၺ်ႈ ၽိုၼ်လိၵ်ႈၽိုၼ်လၢႆး ၸိူဝ်းၼၼ်ႉတႄႉ တေသိုပ်ႇႁဵတ်းၵႂႃႇၼင်ႇ ပၵ်းၵဝ်ႇပိူင်ၵဝ်ႇၼႆ ၽၢႆႇႁၢင်ႈႁေႃ လႆႈပိုၼ်ၶၢဝ်ႇဝႆႉၼင်ႇၼၼ်။ ၼႂ်းၶေႃႈပိုၼ်ၽၢဝ်ႇ ႁေႃၶမ်းၼၼ်ႉဝႃႈဝႆႉတႄႉ ၶုၼ်ႁေႃၶမ်းလူင် ဢၼ်မီးဢႃႇယု 75 ပီၼၼ်ႉ ထၢတ်ႈၸႂ်မၼ်းၸဝ်ႈတႄႉ တိုၵ်ႉႁႅင်းယူႇသေ ပေႃးၶၢမ်ႇတၢင်းယူတ်းယႃယဝ်ႉ မၼ်းမီးၵၢင်ၸႂ် တႃႇၶိုၼ်းႁၢပ်ႇၵၢၼ် ပုၼ်ၽွၼ်းၶုၼ်ႁေႃၶမ်းယူႇၼႆ။
ဝၢႆးသေ ၶေႃႈပိုၼ်ၽၢဝ်ႇဝႃႈ တီႈ ၶုၼ်ႁေႃၶမ်းပရိတ်ႈတဵၼ်ႇ ၶျႃးလ်သ် ထူၼ်ႈသၢမ် ၼၼ်ႉ လႆႈႁၼ်မီးတၢင်းပဵၼ် ၶႅၼ်ႇသႃႇ ဝႃႈၼႆယဝ်ႉ ဢမ်ႇပေႃးႁိုင် တီႈၵူႈမိူင်းမိူင်းၵေႃႈ လႆႈမီးလွင်ႈမွၵ်ႇလၢတ်ႈ ၵဵဝ်ႇၵပ်းလွင်ႈမႆႈၸႂ်ၸွမ်းယူႇယဝ်ႉ။ ၸုမ်းလူင်ပွင်ၸိုင်ႈဢမႄႇရိၵၢၼ်ႇ ၸွမ်ပွင်ၸိုင်ႈပၢႆႇတႅၼ်ႇ ၵေႃႈ ပဵၼ်ဢၼ်လႆႈမႆႈၸႂ်ၸွမ်း မုင်ႉႁေႃႁိူၼ်းၼႆ ၵႅမ်ၽူႈမီးသုၼ်ႇလၢႆႈ ထၢၼ်ၽွင်းလူင်ၵၢၼ်ၼွၵ်ႈမိူင်း ဝီးတႅၼ်ႉပလႄးလ် လႆႈမွၵ်ႇလၢတ်ႈဝႃႈၼၼ်ႉယဝ်ႉ။ “လႆႈမႆႈၸႂ်ၸွမ်း ၶုၼ်ႁေႃၶမ်းလႄႈ မုင်ႉႁေႃႁိူၼ်းယူႇ။ ၼႆႉ ပဵၼ်ၶၢဝ်ႇ ဢၼ်လႆႈၸႂ်ဢမ်ႇလီၸွမ်းတႄႉတႄႉ“ ၼႆ ထၢၼ်ၽွင်းလူင်ၵၢၼ်ၼွၵ်ႈမိူင်း လႆႈမွၵ်ႇလၢတ်ႈ ၽူႈဢဝ်ၶၢဝ်ႇၶဝ် တီႈ ပၢင်ၸႅင်ႈၶၢဝ်ႇၵူႈဝၼ်း ၼၼ်ႉယူႇ။
ၶုၼ်ႁေႃၶမ်း လႄႈ ၼၢင်းႁေႃၶမ်း ၶဝ် လႆႈမီးၶပ်ႉမၢႆ တႃႇဢႅဝ်ႇလႄႇ ၶႅၼ်ႇၼေႇတႃႇ တီႈၼႂ်း လိူၼ်မေႇ၊ လႄႈ တေၵႂႃႇ ဢေႃႉသထရေးလီးယႃး၊ ၼိဝ်းၸီႇလႅၼ်ႇ လႄႈ သႃႇမူဝ်းဝႃႇ တွၼ်ႈတႃႇ ပၢင်ၵုမ် ၽူႈၼမ်းလူင်ပွင်ၸိုင်ႈ မိူင်းပၢႆးမၢၵ်ႈမီးႁူမ်ႈၵၼ် ဢၼ်တေၸတ်းႁဵတ်းတီႈၼႂ်း လိူၼ်ဢွၵ်ႇထူဝ်ႇပႃႇၼၼ်ႉယဝ်ႉ။
ၽၢႆႇႁၢင်ႈႁေႃတႄႉ ပႆႇလႆႈယိုၼ်ယၼ်ဝႃႈ ၶၢဝ်းတၢင်းၼၼ်ႉ တေပဵၼ်ႁိုဝ် ဢမ်ႇပဵၼ် ၼႆသေ တွၼ်ႈတႃႇ ၶုၼ်ႁေႃၶမ်း တေၶိုၼ်းႁၢပ်ႇၼႃႈၵၢၼ်ပုၼ်ႈၽွၼ်းမၼ်းၼၼ်ႉၵေႃႈ ပႆႇလႆႈပၼ်တၢင်းၶႆႈၸႂ် ဝၼ်းထိမၼ်းၼင်ႇၵဝ်ႇ။
ငိူၼ်ႈငဝ်ႈတိုၼ်း
- VOA News. "King Charles III Diagnosed With Cancer" — VOA News, February 5, 2024
- Sean Coughlan. "King diagnosed with cancer, Buckingham Palace says" — BBC News, February 6, 2024
