ဝၼ်းၽတ်း၊ ၸၼ်ႇဝႃႇရီႇ 25၊ 2024
.svg)
ဢမၢတ်ႈပႃႇတီႇၶိုပ်ႈၼႃႈ (Move Forward) ပီႇတႃႇ လိမ်းၸရိူၼ်းရတ်ႉ ၼႆႉ လွင်ႈဢၼ်မၼ်းပိူင်ႇ သျႄႇယႃႇ ငဝ်းႁၢင်ႈသဵင် ITV ၼႆႉ မၼ်းဢမ်ႇလႆႈၽိတ်းၽိင်ႈ ၵူတ်းမၢႆပၢင်လိူၵ်ႈတင်ႈ ၼႆ လုၵ်ႉတီႈ လုမ်းတတ်းသိၼ်လၵ်းမိူင်း လႆႈတႅပ်းတတ်းပၼ် မိူဝ်ႈဝႃး လႄႈ မၼ်းၸဝ်ႈ လႆႈၶိုၼ်းႁၢပ်ႇၵၢၼ် ပဵၼ် ၽွင်းသၽႃး ယူႇယဝ်ႉ။
မိူဝ်ႈ လုမ်းတတ်းသိၼ်လၵ်းမိူင်း ပႆႇလႆႈ တႅပ်းတတ်းဝႃႈ လွင်ႈဢၼ် ပီႇတႃႇ ပိူင်ႇ သျႄႇယႃႇ တီႈ ITV ၼၼ်ႉ ၸွင်ႇမၼ်းမီး လွင်ႈၽိတ်းၽိင်ႈၵူတ်းမၢႆႉပၢင်လိူၵ်ႈတင်ႈ ႁိုဝ် ဢမ်ႇမီးၼၼ်ႉ မၼ်းထုၵ်ႇယင်ႉၵိုတ်း ၵၢၼ်ငၢၼ်းၽွင်းမၼ်းၼၼ်ႉယဝ်ႉ။
ယၢမ်းလဵဝ်တႄႉ ပီႇတႃႇၵေႃႉၼိုင်ႈ တႄႇဢဝ် ၸၼ်ႇဝႃႇရီႇ 25 ပွတ်းၼႂ်ၼႆႉသေ မၼ်းၶိုၼ်းၶိုၼ်ႈႁွတ်ႈ သၽႃးထႆး ယူႇယဝ်ႉ။
တီႈပၢင်လိူၵ်ႈတင်ႈ မိူင်းထႆး ပီၵၢႆၼၼ်ႉ ၽိထႃႊ လိမ်ႉၸရိူၼ်းရတ်ႉ ဢၼ်ယဝ်ႉႁဵၼ်းမႃးတီႈ ၸၼ်ႉၸွမ်ႁႃးဝႅတ်ႉ လႄႈ ပႃႇတီႇမၼ်းၼႆႉ လႆႈဢွင်ႇမၢၼ် ဢမၢတ်ႈသၽႃးတႂ်ႈ တင်းၼမ်ယဝ်ႉ။
ၵူၺ်းၵႃႈဝႃႇ ၽိူဝ်ႇ တၢင်ႇသဵၼ်ႈၸိုဝ်ႈ ၽိထႃႇ တီႈ သၽႃး တွၼ်ႈတႃႇ ပဵၼ် ၸွမ်ၽွင်းလူင်ၸိုင် လႆႈထူပ်းၺႃး ၸိူဝ်းပဵၼ် ၽွင်းသၽႃးၼိူဝ် ဢၼ်ဢမ်ႇၸႂ်ႈ ၵူၼ်းမိူင်းလိူၵ်ႈတင်ႈဝႆႉၼၼ်ႉ ဢွၼ်ၵၼ်သၢၼ်ၶတ်းမၼ်းယဝ်ႉ။
ၼႆႉၵေႃႈ မၼ်းပဵၼ်ယွၼ်ႉ ၵႂၢမ်းမၼ်ႈ ပၢင်လိူၵ်ႈတင်ႈ ဢၼ်ၽိထႃႊ ပၼ်ဝႆႉဝႃႈ တေႁဵတ်း လွင်ႈလႅၵ်ႈလၢႆႈ ၵူတ်းမၢႆ ဢၼ်ႁႄႉႁၢမ်ႈ လွင်ႈထတ်းသၢင်ၼိူဝ် ၸၢဝ်းၶိူဝ်းၶုၼ်ႁေႃၶမ်း လႄႈ တေႇယွၼ်ႇလူင်း လွင်ႈတပ်ႉသိုၵ်း ႁူမ်ႇငမ်းဝႆႉၼိူဝ် ၵၢၼ်မိူင်း မိူင်းထႆး ဢၼ်ဝႃႈၼၼ်ႉသေ ၼႆႉ ထုၵ်ႇႁၼ်ထိုင်ဝႃႈ မၼ်းပဵၼ် လွင်ႈလွၵ်ႇငိူတ်ႈ ပိူင်မိူင်းထႆး ဢၼ်မီးဝႆႉယူႇယၢမ်းလဵဝ်ၼႆႉ ၼႆယဝ်ႉ။
ဝၢႆးသေ ဢွင်ႇမၢၼ်ပၢင်လိူၵ်ႈတင်ႈယဝ်ႉ ၽွင်းတိူၵ်ႉငူပ်ႉငိ တႃႇၽွတ်ႈႁႅၼ်း လူင်ပွင်ၸိုင်ႈႁူမ်ႈပွင်ႈယူႇၼၼ်ႉ မၼ်းထုၵ်ႇၺႃး လိူင်ႈတၢင်ႇလုမ်း သွင် လိူင်ႈယဝ်ႉ။
ၸိူဝ်းပဵၼ် ၵူၼ်းၵမ်ႉထႅမ် ၽိထႃႊတႄႉ ႁၼ်ထိုင်ဝႃႈ လွင်ႈတၢင်ႇလိူင်ႈထိုင်လုမ်းဢၼ်ၼႆႉ မၼ်းပဵၼ် ၶတ်းၸႂ် ၸိူဝ်းပဵၼ် ႁႅင်းၵၢၼ်မိူင်းၸွမ်းၽိင်ႈမိူဝ်ႈၵွၼ်ႇ တႃႇႁဵတ်းႁႂ်ႈ ၽိထႃႊ ဢွၵ်ႇယၢၼ်တူင်ႇၵၢၼ်မိူင်း လႄႈ တႃႇႁဵတ်းႁႂ်ႈ ၶေႃႈယၼ် ပႃႇတီႇ ပေႃးတေ ယွၼ်ႇယွမ်းၵႂႃႇ ဝႃႈၼႆယဝ်ႉ။
မိူဝ်ႈဝၼ်းပုတ်ႉၼၼ်ႉ ႁူမ်ႈဝႃႈ မၼ်းလႆႈလွတ်ႈၵၢင်းမႃးလီ ၼႂ်းၵႃႈ လိူင်ႈဢၼ်ၼိုင်ႈ ဢၼ်မၼ်းလႆႈထူပ်းၺႃးယူႇၼၼ်ႉသေတႃႉ ဝူင်ႈဢၼ်တေမႃးၼၼ်ႉ မၼ်းတေႇလႆႈ ထူပ်းၺႃးလိူင်ႈထႅင်ႈဢၼ်ၼိုင်ႈ ဢၼ်တေ တိူဝ်းႁၢဝ်ႈႁႅင်း လိူဝ်ၼႆႉၼၼ်ႉယဝ်ႉ။
လိူင်ႈဢၼ်ၼၼ်ႉၵေႃႈ လုၵ်ႉတီႈ လုမ်းတတ်းသိၼ်လၵ်းမိူင်း ၵေႃႉတေလႆႈ တႅပ်းတတ်းၵႂႃႇယူႇ။ ၵမ်းၼႆႉတႄႉ လၢႆးငၢၼ်း ဢၼ်ၶတ်းၸႂ် တႃႇႁဵတ်းလွင်ႈလႅၵ်ႈလၢႆႈ ၵူတ်းမၢႆ ဢၼ်ႁႄႉႁၢမ်ႈဢဝ်လႆႈၼိူဝ် လွင်ႈသႄႉသွမ်းထတ်းသၢင်ႈၼိူဝ် မုင်ႉႁိူၼ်းၸၢဝ်းၶိူဝ်းၶုၼ် ၼၼ်ႉၼႆႉ ထုၵ်ႇႁၼ်ထိုင်ဝႃႈ မၼ်းပဵၼ် လွင်ႈၶတ်းၸႂ် ဢၢၼ်းလူတ်းပႅတ်း လွင်ႈဢုပ်ႇပိူင်ႇ တီႇမူဝ်ႇၶရႅတ်ႉ ဢၼ်ဢဝ် ၶုၼ်ႁေႃၶမ်း ပဵၼ်ၸိၵ်းၸွမ်ၸိုင်ႈမိူင်း ၼႆလႄႈ ၸင်ႇထုၵ်ႇၺႃး တိုင်ႇလၢတ်ႈတီႈ လုမ်းတတ်းသိၼ်လၵ်းမိူင်းၼၼ်ႉယဝ်ႉ။
ၵပ်းၵၢႆႇလူၺ်ႈၼႆႉသေ သင်ၸိူဝ်ႉဝႃႈ လုမ်းတတ်းသိၼ် တႅပ်းတတ်းဝႃႈ လွင်ႈႁဵတ်းသၢင်ႈ ပႃႇတီႇ Move Forward ၼႆႉ မၼ်းဢမ်ႇငမ်ႇမႅၼ်ႈၵၼ်တင်း လၵ်းမိူင်းၼႆၸိုင် ပႃႇတီႇၵေႃႈ တေထုၵ်ႇလူတ်းသိမ်းပႅတ်ႈ၊ ၸိူဝ်းပဵၼ်ထၢၼ်ႈၽူႈဢွၼ်ႁူဝ်ပႃႇတီႇၼၼ်ႉၵေႃႈ တေ ၸၢင်ႈထုၵ်ႇႁႄႉႁၢမ်ႈ လွင်ႈၶဝ်ႈပႃးၼႂ်း တူင်ႇဝူင်းၵၢၼ်မိူင်းၵွၼ်ႇယဝ်ႉ။
ယွၼ်ႉပိူဝ်ႈ လွင်ႈမၢပ်ႇလၢတ်ႈၸိူဝ်းၼႆႉလႄႈ ၽိထႃႊၼႆႉ လႆႈထုၵ်ႇယိုတ်း လွင်ႈႁၢပ်ႇၵၢၼ်ပုၼ်ႈၽွၼ်း ဢမၢတ်ႈသၽႃးတႂ်ႈ မိူဝ်ႈလိူၼ်ၸူႇလၢႆႇၼၼ်ႉသေ လႆႈပွႆႇၽႃႈပႃး ပုၼ်ႈၽွၼ်းၽၢႆႇဢွၼ်ႁူဝ်ပႃႇတီႇပႃးၵွၼ်ႇ။
လွင်ႈဢၼ်ဝႃႈ ပိူင်ႇသျႄႇယႃႇ ၶွင် ITV ၼၼ်ႉတႄႉ ၽိထႃႊ လဝ်ႈတွပ်ႇၶိုၼ်းဝႃႈ သျႄႇယႃႇၸိူဝ်းၼႆႉ မၼ်းပဵၼ် ဢၼ်မၼ်းသိုပ်ႇပုတ်ႈဢဝ် ၶူဝ်းပူၺ်ႈ တီႈပေႃႈမၼ်းသေ ၸဵမ်မိူဝ်ႈမၼ်းပႆႇပဵၼ် ဢမၢတ်ႈမွၵ်ႈလၢႆပီၼၼ်ႉၵေႃႈ ႁူင်းၵၢၼ်ၼႆႉ ပေႃး ဢမ်ႇပၼ်ႇပဵၼ်ၵၢၼ်ယဝ်ႉ ဝႃႈၼႆ။
မိူဝ်ႈဝၼ်းပုတ်ႉၼၼ်ႉတႄႉ ၸိူဝ်းပဵၼ် ၽူႈထတ်းသတ်းၵမ်ႉၼမ် တီႈ လုမ်းတတ်းသိၼ်လၵ်းမိူင်း ၼၼ်ႉ ႁပ်ႉလွင်ႈ လဝ်ႈတွပ်ႇမၼ်းသေၵေႃႈ တႅပ်းတတ်းပၼ်မႃးယဝ်ႉ။
“လွင်ႈပိူင်ႇသျႄႇယႃႆ ဢၼ်ဝႃးၼႆႉ မၼ်းဢမ်ႇၸႂ်ႈ လွင်ႈပူၼ်ႉပႅၼ် ၵူတ်းမၢႆပၢင်လိူၵ်ႈတင်ႈ။ လုၵ်ႉတီႈ လုမ်းတတ်းသိၼ် လႆႈတႅပ်းတတ်းပၼ်ဝႃႈ တႃၶုၼ်ၽွင်းသၽႃးမၼ်းၼၼ်ႉ ပႆႇသုတ်းသဵင်ႈ“ ၼႆ ဢၼ်ပဵၼ် ၽူႈတတ်းသိၼ် ပၼ်ႇၺႃႇဢူႇၶျႃႇၶျုၼ်ႇ မွၵ်ႇလၢတ်ႈၼင်ႇၼၼ်ယဝ်ႉ။
ၽိထႃႊ လိမ်ႉၸရိူၼ်းရတ်ႉ လႆႈမွၵ်ႇလၢတ်ႈ ၽူႈဢဝ်ၶၢဝ်ႇၶဝ် ၼႃႈ လွင်ႈတႅပ်းတတ်း လုမ်းတတ်းသိၼ်ၼၼ်ႉဝႃႈ တေၶတ်းၸႂ် တႃႇသိုပ်ႇႁဵတ်းလႆႈ လွင်ႈလႅၵ်ႈလၢႆႈ ၸွမ်းၼၼ်ႇ ပႃႇတီႇမၼ်း လႆႈပၼ် ၶေႃႈမၼ်ႈမႃးၼၼ်ႉ ဝႃႈၼႆ။
မိူဝ်ႈလုမ်းတတ်းသိၼ် ပႆႇတႅပ်းတတ်းပၼ်ၼၼ်ႉ မၼ်းလၢတ်ႈမႃးဝႃႈ “ၽွၼ်းမၼ်းဢွၵ်ႇမႃးၸိူင်ႉႁိုဝ်ၵေႃႈယႃ၊ ၶႃႈႁဝ်း တေ သိုပ်ႇႁဵတ်းၵၢၼ်ပၼ်ၵႂႃႇ တႃႇၵူၼ်းမိူင်းႁဝ်းၶႃႈယူႇ“ ဝႃႈၼႆ။
မူၼိၼ်းပွင်သၽၼ်း ဢၼ်ပဵၼ် ၵႅမ်ဢႃးၸၢၼ် တီႈ ႁွင်ႈထၢၼ်ၵူတ်းမၢႆ ၶွင် ၸၼ်ႉၸွမ်ထမ်မသတ်ႈ မွၵ်ႇလၢတ်ႈ မိူဝ်ႈဝၼ်းပုတ်ႉၼၼ်ႉဝႃႈ ၼႆႉ မၼ်းပဵၼ် “ဝၼ်းလီ တွၼ်ႈတႃႇ ပိူင်မၢႆမီႈ မိူင်းထႆး“ သေ မၼ်းပဵၼ် သၢႆငၢႆၶႅမ်ႉ တွၼ်ႈတႃႇ လိူင်ႈဢၼ်တေ မႃး ၼၼ်ႉ ဝႃႈၼႆယဝ်ႉ။
“သင်ၸိူဝ်ႉဝႃႈ လုမ်းတတ်းသိၼ်ၼႆႉ သိုပ်ႇၸွမ်းလၵ်းၸဵင်ၼႆႉသေ တႅပ်းတတ်းပၼ်ၵႂႃႇ လိူင်ႈဢၼ်တေမႃးၼၼ်ႉၼႆၸိုင် တွၼ်ႈတႃႇ ပႃႇတီႇ Move forward တေ ၸၢင်ႈသိုပ်ႇၸုၵ်းမၼ်ႈၵႂႃႇလႆႈၼၼ်ႉ မၼ်းတိူဝ်းတေ မီး တိုဝ်ႉတၢင်းသုင်လိူဝ်ၼႆႉမႃး၊ ယွၼ်ႉပိူဝ်ႈဝႃႈ လွင်ႈမၢပ်ႇလၢတ်ႈ ၸိူဝ်းၼၼ်ႉ မၼ်းဢမ်ႇလွင်ႈမီးတၢင်းမၼ်းသင် ၼၼ်ႉယဝ်ႉ“ ဝႃႈၼႆ။
ငိူၼ်ႈငဝ်ႈတိုၼ်း
- BBC. "Move Forward ပါတီ အမတ် ပီတာလင်ဂျာရိုရက် လွှတ်တော်ပြန်တက်ပြီ" — BBC, January 25, 2024
- Helen Regan လႄႈ Wasu Vipoosanapat. "Thai court dismisses media shares case against popular progressive politician - but party’s future still in doubt" — CNN, January 24, 2024
