ဝၼ်းသုၵ်း၊ ဢေႃးၵၢတ်ႉ 9၊ 2024
.svg)
ၼႂ်းမိူင်းထႆးၼႆႉ ပႃႇတီႇသၢၼ်ၶတ်းပိူင်လူင် ဢၼ်လႆႈယႃႉပႅတ်ႈ လူၺ်ႈၶေႃႈၸီႉသင်ႇ လုမ်းတြႃးၼၼ်ႉ ၶိုၼ်းမႄးၶွတ်ႇၽွတ်ႈပႃႇတီႇ လူၺ်ႈၸိုဝ်ႈမႂ်ႇ လႄႈ ၽူႈၼမ်းမႂ်ႇ။ ပႃႇတီႇ Move Forward ဢၼ်လႆႈတီႈၼင်ႈ ၼႂ်းသၽႃး မိူဝ်ႈပီၵၢႆၼၼ်ႉ လႆႈတီႈၼင်ႈ 151 တီႈၼင်ႈသေ လႅၵ်ႈလၢႆႈၸိုဝ်ႈဝႃႈ Prachachon ဢၼ်ပွင်ႇဝႃႈ ပႃႇတီႇၵူၼ်းမိူင်းၼႆသေ လိူၵ်ႈတင်ႈ ၽူႈမၢၵ်ႈမီး ပၢႆးၸၢင်ႊ ၼတ်ႉထၽူင်း ရူဢဵင်ပၼ်ယဝုတ်ႉ ဢႃႇယု 37 ပီ ပဵၼ်ၽူႈဢွၼ်ႁူဝ် ပႃႇတီႇ Prachachon ၼႆယဝ်ႉ။
"လွင်ႈယုမ်ႇယမ်ႁဝ်း၊ ပၢႆးဝူၼ်ႉႁဝ်း၊ ႁဝ်းၶႃႈယုမ်ႇယမ်ၼၵ်းၼၵ်းၼႃၼႃဝႃႈ ပေႃးႁဝ်းသိုပ်ႇႁဵတ်းၸွမ်း ပေႃႇလသီႇၸိူဝ်းၼၼ်ႉၸိုင် တေၸၢင်ႈႁဵတ်းႁႂ်ႈၸၢတ်ႈပၢၼ်ၵူၼ်းမိူင်းတႆး ၶိုၼ်ႈယႂ်ႇမႂ်ႇသုင်လႆႈယူႇ။ တေဢမ်ႇႁဵတ်းလွင်ႈလႅၵ်ႈလၢႆႈ ပိူဝ်ႈတႃႇၵပ်းၵၢႆႇၵၼ်တင်း ပႃႇတီႇၵၢၼ်မိူင်းၵဝ်ႇ၊ တေႁဵတ်းလွင်ႈလႅၵ်ႈလၢႆႈ တႃႇငဝ်းလၢႆးၵၢၼ်မိူင်းၼႂ်းမိူင်းထႆးၶိုၼ်ႈယႂ်ႇမႃး၊ တႃႇတူင်ႇဝူင်းၵူၼ်းထႆး လႆႈတိူဝ်းလီမႃး၊ ႁဝ်းၶႃႈၶႂ်ႈႁႂ်ႈၵူၼ်းမိူင်းထႆးလႄႈ လုမ်ႈၾႃႉ ယုမ်ႇယမ်ႁဝ်းၶႃႈ” ၼႆယဝ်ႉ။
တီႈမိူင်းထႆးၼႆႉ ယွၼ်ႉပၼ်ၵႂၢမ်းမၼ်ႈဝႃႈ တေမူၼ်ႉမႄးမၢႆမီႈ တွၼ်ႈ 112 ဢၼ်ဝႃႈ လွင်ႈသႄႉသွမ်း ၶုၼ်ႁေႃၶမ်းၼႆႉ ပဵၼ်လိူင်ႈၼႆသေ လုမ်းတြႃးပၵ်းပိူင်လၵ်းမိူင်း ၸင်ႇတႅပ်းတတ်း တႃႇတေယႃႉပႅတ်ႈ ပႃႇတီႇ Move Forward ၼၼ်ႉယဝ်ႉ။ ၽူႈၶဝ်ႈၸုမ်း ၸုမ်းပွင်ၵၢၼ် ပႃႇတီႇ Move Forward ပႃးၸဵမ် ၽူႈတႅၼ်းၽွင်း ဢၼ်ၵမ်ႉထႅမ် လွင်ႈမူၼ်ႉမႄး ၽိထႃႊ လိမ်းၸရိူၼ်ႊရတ်းၼၼ်ႉ လႆႈထုၵ်ႇ လုမ်းတြႃး ႁၢမ်ႈတၢပ်ႈ လွင်ႈႁဵတ်းၵၢၼ်မိူင်း ၶၢဝ်းတၢင်း 10 ပီယဝ်ႉ။
ၸိူဝ်းဢၼ်ၵိုတ်းဝႆႉ ပဵၼ်ၽူႈတႅၼ်းသၽႃးပဵၼ်တၢင်းၵၢၼ်ၼၼ်ႉ လႅၵ်ႈလၢႆႈပဵၼ် ၽူႈၶဝ်ႈပႃႇတီႇမႂ်ႇမူတ်း။ ၽူႈၼမ်းပႃႇတီႇမႂ်ႇ လၢတ်ႈတီႈပၢင်သပ်းၸႅင်ႈၶၢဝ်ႇ ဢၼ်ၸတ်းႁဵတ်းတီႈၵုင်းထဵပ်ႈ မိူဝ်ႈၼႆႉၼၼ်ႉဝႃႈ ႁၼ်ထိုင်ဝႃႈ တႃႇတေမူၼ်ႉမႄး မၢႆမီႈ တွၼ်ႈ 112 ဢၼ်ပဵၼ်လွင်ႈတိူဝ်ႉၶိူၵ်ႈငၢႆႈ တီႈၼႂ်းမိူင်းထႆးၼၼ်ႉ တေၸၢင်ႈဢုပ်ႇဢူဝ်းၵႄႈလိတ်ႈလႆႈ ၼႂ်းသၽႃးယူႇ ၼႆယဝ်ႉ။
ငိူၼ်ႈငဝ်ႈၶၢဝ်ႇ
- Jintamas Saksornchai. "Thailand’s reformist Move Forward Party, dissolved by court order, regroups as People’s Party" — AP News, August 9, 2024
- Apornrath Phoonphongphiphat. "Thailand's disbanded Move Forward reborn as People's Party" — Nikkei, August 9, 2024
- JINTAMAS SAKSORNCHAI Associated Press. "Thailand's reformist Move Forward Party, dissolved by court order, regroups as People's Party" — ABC News, August 9, 2024
- Surya Gangadharan. "Thailand’s Dissolved Move Forward Party Reborn As People’s Party, Same Agenda" — Strat News Global, August 9, 2024
