Wn/shn/လုမ်းတြႃးလၵ်းမိူင်းထႆး တေတႅပ်းတတ်း လွင်ႈ တေယႃႉပႅတ်ႈ ပႃႇတီႇၽၢႆႇသၢၼ်ၶတ်း ႁိုဝ် ဢမ်ႇယႃႉ
ဝၼ်းဢင်းၵၢၼ်း၊ ဢေႃးၵၢတ်ႉ 6၊ 2024
.svg)
.jpg)
ပႃႇတီႇသၢၼ်ၶတ်းပိူင်လူင် မိူင်းထႆး ဢၼ်ပဵၼ် Move Forward ၼၼ်ႉ မိူဝ်ႈၽုၵ်ႈ ဝၼ်းပုတ်ႉၼၼ်ႉ လုမ်းတြႃး ပိူင်ငဝ်ႈပိုင်းမိူင်း တေတႅပ်းတတ်းဝႃႈ တေယႃႉပႅတ်ႈ ႁိုဝ် ဢမ်ႇယႃႉ ၼႆယဝ်ႉ။ ပၢင်ထွမ်ႇတြႃး တႃႇတေဢဝ်လိူင်ႈ ပႃႇတီႇ Move Forward ဢၼ်လၢတ်ႈမႃး မိူဝ်ႈပၢင်လိူၵ်ႈတင်ႈၼၼ်ႉ ပၼ်ၵႂၢမ်းမၼ်ႈဝႆႉဝႃႈ တေမူၼ်ႉမႄး မၢႆမီႈ ဢၼ်ႁၢဝ်ႈႁႅင်း ဢၼ်ယၢမ်ႈဢဝ်လိူင်ႈ ယွၼ်ႉလၢတ်ႈၵႂၢမ်း ဢၼ်တုမ်ႉတိူဝ်ႉ ၵုင်ႇမုၼ် ၼႃႈႁိူၼ်းၶိူဝ်းၶုၼ်ၼၼ်ႉၼႆၼၼ်ႉ ၸင်ႇတိုၵ်ႉၸတ်းႁဵတ်း ပၢင်ထွမ်ႇတြႃးယူႇဝႃႈၼႆယဝ်ႉ။
ပႃႇတီႇ Move Forward ၼႆႉ ပဵၼ်ပႃႇတီႇ ဢၼ်ၵူၼ်းမိူင်းထႆး ပၼ်ႁႅင်းၼမ်လိူဝ်ပိူၼ်ႈ မိူဝ်ႈပၢင်လိူၵ်ႈတင်ႈ လိူၼ်မေႇ ပီၵၢႆၼၼ်ႉယဝ်ႉ။ မိူဝ်ႈပၢင်လိူၵ်ႈတင်ႈ ပီၵၢႆၼၼ်ႉ ပႃႇတီႇ Move Forward ၶဝ် ပၼ်ၵႂၢမ်းမၼ်ႈဝႃႈ တေမူၼ်ႉမႄး မၢႆမီႈ ဢၼ်ပၼ်တၢမ်ႇ ၸိူဝ်းလၢတ်ႈၵႂၢမ်း သၢၼ်ၶတ်း ၼိူဝ်ၶုၼ်ႁေႃၶမ်းထႆး လႄႈ မုင်ႉႁိူၼ်းၶိူဝ်းၶုၼ်ၶဝ်ၼၼ်ႉသေဢမ်ႇၵႃး တေမူၼ်ႉမႄးပႃး လွင်ႈဢၼ် ၽွင်းငမ်းဝႆႉတီႈၼိူဝ် တပ်ႉသိုၵ်း လႄႈ ၵၢၼ်ပၢႆးမၢၵ်ႈမီးလူင် ၸိူဝ်းၼၼ်ႉ ၼႆယဝ်ႉ။
ၸုမ်းသုၼ်ႇလႆႈသုၼ်ႇပဵၼ်ၵူၼ်း ၼႂ်းပိုၼ်ႉတီႈ Fortify Rights သႄႉသွမ်း လွင်ႈဢၼ်ဝႃႈ တေယႃႉပႅတ်ႈ ပႃႇတီႇသၢၼ်ၶတ်း ဢၼ်ပဵၼ်ပိူင်လူင်သေ တေႁၢမ်ႈတၢပ်ႈ ဢမ်ႇပၼ်တွတ်ႈၶႅပ်းၵၢင်ၸႂ် တႃႇၶၢဝ်းတၢင်း 10 ပီၼၼ်ႉ ပဵၼ်လွင်ႈယႃႉၵဝ်း လၵ်းၵၢၼ် တီႇမူဝ်ႇၶရေႇသီႇ ၼႆယဝ်ႉ။ ဢႄးမီႇသမိတ်ႉ ၽူႈပွင်ၵၢၼ် ၸုမ်း Fortify Rights သႄႉသွမ်း လွင်ႈမိူင်းထႆး ဝႆႉၸႂ်ၼိူဝ် တီႇမူဝ်ႇၶရေႇသီႇ၊ ႁဝ်းၶႃႈတုၵ်းယွၼ်းႁႂ်ႈလူင်ပွင်ၸိုင်ႈထႆး ပၼ်ၶႂၢင်ႉပႃႇတီႇၵၢၼ်မိူင်းၶဝ် ၶႄႉၶဵင်ႇၵၼ်လွတ်ႈလွတ်ႈလႅဝ်းလႅဝ်း ၼႂ်းပၢင်လိူၵ်ႈတင်ႈ လူၺ်ႈဢမ်ႇမီးလွင်ႈယုင်ႈယၢင်ႈသေဢမ်ႇၵႃး ႁႂ်ႈထိင်းသိမ်းၵုင်ႇမုၼ်ပိူင်ၵၢၼ်လိူၵ်ႈတင်ႈ ဝႃႈၼႆယဝ်ႉ။
ငိူၼ်ႈငဝ်ႈၶၢဝ်ႇ
- Rattaphol Onsanit. "Thailand’s former PM contender awaiting court decision on whether to dissolve party" — VOA NEWS, August 6, 2024
- JERRY HARMER and JINTAMAS SAKSORNCHAI. "Thailand’s progressive Move Forward party might be dissolved, but its former chief remains hopeful" — AP NEWS, August 5, 2024
- The Nation. "Ruling on Move Forward Party to be announced tomorrow" — The Nation, August 6, 2024
