ဝၼ်းၸၼ်၊ ၸူႇလၢႆႇ 29၊ 2024
ၾူၼ်တူၵ်းႁႅင်းလႄႈ လိၼ်ၵူၼ်ႇပင်း တီႈၸဵင်ႇၸၢၼ်းဝၼ်းဢွၵ်ႇမိူင်းၶႄႇ ႁဵတ်းႁႂ်ႈၵူၼ်းလူႉတၢႆ 12 ၵေႃႉ တီႈသုၼ်ၵၢင်ဢႅဝ်ႇယဵမ်ႈ ဢၼ်မီးၼိူဝ်လွႆၼၼ်ႉ ဝႃႈၼႆ။
မိူဝ်ႈၼႆႉ ဝၼ်းဢႃးတိတ်ႉ ၵၢင်ၼႂ် ၸႄႈမိူင်းႁူႇၼၢၼ်ႇ... ၶၢဝ်ႇငၢဝ်း CCTV ဢၼ်လူင်ပွင်ၸိုင်ႈ ၵုမ်းၵမ်ၼၼ်ႉ ဢွၵ်ႇၶၢဝ်ႇဝႆႉဝႃႈ တီႈႁူင်းဢႅဝ်ႇလႄႇ တီႈဝၢၼ်ႈယူင်ႇလိၼ်ၼၼ်ႉ ၵူၼ်း 21 ၵေႃႉ လႆႈၶမ်ဝႆႉ ၼႂ်းလိၼ်ၵူၼ်ႇ ၼႆယဝ်ႉ။ လိူဝ်ၼၼ်ႉ ၼႂ်းၶၢဝ်ႇလၢတ်ႈဝႃႈ ၼႂ်းၶၢဝ်းတၢင်း 24 ၸူဝ်ႈမူင်းၼႆႉ ၾူၼ်တူၵ်း 12 ၼိဝ်ႉသေ ၼမ်ႉၼိူဝ်လွႆ လႆလေႃႇလူင်း ႁဵတ်းႁႂ်ႈလိၼ်ၵူၼ်ႇ ၼင်ႇၼႆ ဝႃႈၼႆယဝ်ႉ။
ၶဝ်လၢတ်ႈဝႃႈ ယွၼ်ႉလိၼ်ၵူၼ်ႇလႄႈ လႆႈဢဝ်ၵူၼ်း 6 ၵေႃႉ ဢၼ်မၢတ်ႇၸဵပ်း ၼႂ်းႁူင်းႁေႃ ဢၼ်မီးတီႈၸၼ်ႉတႂ်ႈၼၼ်ႉ လႆႈဢဝ်ဢွၵ်ႇယူႇၼႆသေတႃႉ လွင်ႈမၢတ်ႇၸဵပ်း ႁၢဝ်ႈႁႅင်းၵႃႈႁိုဝ်ၼႆတႄႉ ၶဝ်ဢမ်ႇလၢတ်ႈပႃး။ ၸုမ်းၸွႆႈထႅမ်ၶိုၵ်ႉၶၵ်ႉၶဝ် လၢမ်းၶၢတ်ႈဝႆႉဝႃႈ ၵူၼ်းဢၼ်ႁၢႆလၢႆၵႂႃႇၼၼ်ႉ တေမီးထႅင်ႈယူႇၼႆယဝ်ႉ။ ယွၼ်ႉၾူၼ်တူၵ်းႁႅင်း ဢၼ်လၢမ်းၶၢတ်ႈဝႆႉဝႃႈ တေပဵၼ်ၽွၼ်းယွၼ်ႈ လူမ်းလႅင်ႉလူင် Gaemi ဢၼ်ဢူၼ်ႈဢွၼ်ႇသေ ၶဝ်ႈမႃးၼႂ်းမိူင်းၶႄႇ မိူဝ်ႈဝၼ်းသုၵ်းပူၼ်ႉမႃးၼၼ်ႉလႄႈ ၽူၼ်ႁႃႇယႂ်ႇသေ ဢၼ်ၵူၼ်းပေႃးလႆႈတၢႆၼႆႉ ပဵၼ်ပွၵ်ႈဢွၼ်တၢင်းသုတ်း ၼႂ်းမိူင်းၶႄႇ ၼႆယဝ်ႉ။
တီႈမိူင်းၾိလိပ်ႉပိၼ်း တီႈဢၼ်လူမ်းလႅင်ႉလူင် လတ်းၽၢၼ်ႇၵႂႃႇၼၼ်ႉ ၵူၼ်းတၢႆ ဢမ်ႇယွမ်း 34 ၵေႃႉ၊ တီႈထၢႆႇဝၢၼ်းၵေႃႈ ၸဝ်ႈၼႃႈတီႈၶဝ် ပိုၼ်ၽၢဝ်ႇဝႃႈ ၵူၼ်းတၢႆ 10 ၵေႃႉ ၼႆယဝ်ႉ။
ငိူၼ်ႈငဝ်ႈၶၢဝ်ႇ
- Reuters. "Typhoon Gaemi lashes China after pounding Taiwan, Philippines" — Reuters, July 26, 2024
- Associated Press. "At least 12 killed by mudslide in China as heavy rains from tropical storm Gaemi drench region" — NBC News, July 28, 2024
- Associated Press. "12 killed by mudslide in China" — Daily Times, July 29, 2024
- Ken Moritsugu. "Mudslide kills 15 people near tourist site in China as rains from tropical storm Gaemi drench region" — AP News, July 28, 2024
