Wikimedia Incubator

Wn/shn/မေႃသွၼ်ဢမႄႇရိၵၢၼ်ႇ 4 ၵေႃႉ ၺႃးႁဵတ်းႁၢႆႉ တီႈသူၼ်ႇမွၵ်ႇဢၼ်ၼိုင်ႈ တီႈမိူင်းၶႄႇ

< Wn | shn
Wn > shn > မေႃသွၼ်ဢမႄႇရိၵၢၼ်ႇ 4 ၵေႃႉ ၺႃးႁဵတ်းႁၢႆႉ တီႈသူၼ်ႇမွၵ်ႇဢၼ်ၼိုင်ႈ တီႈမိူင်းၶႄႇ

ဝၼ်းပုတ်ႉ၊ ၸုၼ်ႇ 12၊ 2024

လိၵ်ႈႁွမ်တွမ် ၸိူဝ်းၵဵဝ်ႇၵပ်း
ဢွင်ႈတီႈ မိူင်းၶႄႇ
ႁူမ်ႈသၢင်ႈ!
Wn/shn/မိူင်းၶႄႇ
Wn/shn/မိူင်းၶႄႇ
သူၼ်မွၵ်ႇ Beishan တီႈ ဝဵင်းၸီးလိၼ်

ၸဝ်ႈၼႃႈတီႈၶဝ်ဝႃႈ မေႃသွၼ် သီႇၵေႃႉ ဢၼ်ပဵၼ်တီႈ ၶေႃးလဵၵ်ႉၵေႃႇၼႄးလ် တီႈ ၸႄႈမိူင်းဢၢႆးဢူဝ်းဝႃႇ မိူင်းဢမႄႇရိၵၢၼ်ႇ ဢၼ်တိုၵ်ႉၵႂႃႇသွၼ်ႇလိၵ်ႈပၼ်တီႈ ၸၼ်ႉၸွမ်ၶႄႇၼၼ်ႉ လႆႈၺႃးဢဝ်မိတ်ႈတႅင်း တီႈသူၼ်မွၵ်ႇဢၼ်ၼိုင်ႈ တီႈမိူင်းၶႄႇ ဝႃႈၼႆယဝ်ႉ။

ၽူႈမီးဝုၼ်ႇလၢတ်ႈ ထၢၼ်ၽွင်းလူင် ၵၢၼ်ၼွၵ်ႈမိူင်းၶႄႇ လႆႈမွၵ်ႇလၢတ်ႈ မိူဝ်ႈဝၼ်းဢင်းၵၢၼ်းၼၼ်ႉဝႃႈ လႆႈဢဝ်ၶဝ် သီႇၵေႃႉ တၢင်ႇဝႆႉတီႈႁူင်းယႃသေ တိုၵ်ႉယူတ်းယႃပၼ်ယူႇသေ ဢမ်ႇလႆႈမီးလွင်ႈမႆႈၸႂ် တွၼ်ႈတႃႇၽေးသၢႆၸႂ် ဝႃႈၼႆယဝ်ႉ။ ၽူႈပၼ်တၢင်းၶႆႈၸႂ် ပၢႆးႁူမ်ႇလူမ်ႈၸိုင်ႈမိူင်း ႁိူၼ်းၵႅဝ်ႈၶၢဝ် ၵျဵၵ်ႉသူႇလီဝႅၼ်ႇ (Jake Sullivan) တႅမ်ႈဝႆႉတီႈ သိုဝ်ႇသၢၼ်တူင်ႇၵူၼ်း X မၼ်းဝႃႈ ၵဵဝ်ႇၵပ်းလူၺ်ႈ ၵူၼ်းမိူင်းဢမႄႇရိၵၢၼ်ႇ လႆႈထုၵ်ႇၺႃးဢဝ် မိတ်ႈတႅင်းသေ လႆႈမီးလွင်ႈမႆႈၸႂ်ၸွမ်း၊ လႆႈမီးလွင်ႈၵပ်းသိုပ်ႇၵၼ်တင်း မေႃသွၼ်ၶဝ် လႄႈ ၸဝ်ႈၼႃႈတီႈၶႄႇၶဝ်သေ တိုၵ်ႉႁဵတ်းသၢင်ႈ တႃႇၽိူမ်ႉထႅမ်ပၼ် လွင်ႈဢၼ်မေႃသွၼ်ၶဝ် လူဝ်ႇၼၼ်ႉလႄႈ လႆႈႁဵတ်းသၢင်ႈ တႃႇဢဝ်လိူင်ႈလႆႈ ၸွမ်းၼင်ႇပၵ်းပိူင်မီးဝႆႉၼၼ်ႉ ဝႃႈၼႆယဝ်ႉ။

မေႃသွၼ်ၸိူဝ်းၼၼ်ႉ ၶဝ်သွၼ်လိၵ်ႈတီႈ ၸၼ်ႉၸွမ် ပႄးႁႂႃႈ (Beihua University) တီႈ မိူင်းၶႄႇၸဵင်ႇႁွင်ႇဝၼ်းဢွၵ်ႇၼၼ်ႉယဝ်ႉ။ ၽူႈမီးသုၼ်ႇလၢတ်ႈ ထၢၼ်ၽွင်းလူင် ၵၢၼ်ၼွၵ်ႈမိူင်းၶႄႇ လိၼ်ၸၼ်း (Lin Jian) မွၵ်ႇလၢတ်ႈတီး ပၢင်ၸႅင်ႈၶၢဝ်ႇၵူႈဝၼ်း ၼၼ်ႉဝႃႈ ၸွမ်းလူၺ်ႈ လွင်ႈၵူတ်ႇထတ်းႁူဝ်တေးမၼ်းတႄႉ ပိူင်ပဵၼ်ၼၼ်ႉ လႆႈပဵၼ်ၵႂႃႇတီႈ သူၼ်မွၵ်ႇပႄးသျၢၼ်း တီႈဝဵင်းလူင်ၸီးလိၼ်သေ လွင်ႈႁဵတ်းႁၢႆႉတၢင်ႇၸိူဝ်းတႄႉ ဢမ်ႇႁၼ်မီးၼႆသေ တိုၵ်ႉသိုပ်ႇႁဵတ်း လွင်ႈၵူတ်ႇထတ်းၵႂႃႇယူႇ ဝႃႈၼႆႉယဝ်ႉ။


ငိူၼ်ႈငဝ်ႈတိုၼ်း

Retrieved from "https://incubator.wikimedia.org/w/index.php?title=Wn/shn/မေႃသွၼ်ဢမႄႇရိၵၢၼ်ႇ_4_ၵေႃႉ_ၺႃးႁဵတ်းႁၢႆႉ_တီႈသူၼ်ႇမွၵ်ႇဢၼ်ၼိုင်ႈ_တီႈမိူင်းၶႄႇ&oldid=6303909"