Wikimedia Incubator

Wn/shn/မိူင်းယူႇၶရဵၼ်း - မိူင်းရတ်ႈသျႃး လႅၵ်ႈလၢႆႈ ၵူၼ်းတူၵ်းၶွၵ်ႈ 206 ၵေႃႉ

< Wn | shn
Wn > shn > မိူင်းယူႇၶရဵၼ်း - မိူင်းရတ်ႈသျႃး လႅၵ်ႈလၢႆႈ ၵူၼ်းတူၵ်းၶွၵ်ႈ 206 ၵေႃႉ

ဝၼ်းဢႃးတိတ်ႉ၊ သႅပ်ႇ​ထႅမ်ႇပႃႇ 15၊ 2024

ၵူၼ်းတူၵ်းၶွၵ်ႈသိုၵ်း ယူႇၶရဵၼ်း
လိၵ်ႈႁွမ်တွမ် ၸိူဝ်းၵဵဝ်ႇၵပ်း
ဢွင်ႈတီႈ ယူႇၶရဵၼ်း
ႁူမ်ႈသၢင်ႈ!
Wn/shn/ယူႇၶရဵၼ်း
Wn/shn/ယူႇၶရဵၼ်း

မိူဝ်ႈဝၼ်းသဝ်ၼၼ်ႉ ရတ်ႈသျႃးလႄႈ ယူႇၶရဵၼ်း လႅၵ်ႈလၢႆႈ ၵူၼ်းတူၵ်းၶွၵ်ႈ 206 ၵေႃႉ၊ ဝၢႆးသေ မိူင်းႁူမ်ႈတုမ် ၸဝ်ႈၾႃႉ ဢႃႇရၢပ်ႈ ၵႄႈလိတ်ႈပၼ်ယဝ်ႉ ၼႂ်းၶၢဝ်းတၢင်း 2 ဝၼ်းၼႆႉ ပဵၼ်ပွၵ်ႈၵမ်းသွင်ယဝ်ႉ။

ၸွမ်ပွင်ၸိုင်ႈ ယူႇၶရဵၼ်း လၢတ်ႈဝႃႈ ၵူၼ်းတူၵ်းၶွၵ်ႈ ယူႇၶရဵၼ်း ဢၼ်လႅၵ်ႈလၢႆႈၵၼ် 103 ၵေႃႉၼၼ်ႉ တင်းမူတ်း ပဵၼ်ၵူၼ်းသိုၵ်းသေ ၼႂ်းၼၼ်ႉ ၵူၼ်းသိုၵ်း 82 ၵေႃႉ လႄႈ ၽူႈမီးၸၼ်ႉ 21 ၵေႃႉ ၼႆယဝ်ႉ။

ႁွင်ႈၵၢၼ်ၽၢႆႇၵႅတ်ႇၵင်ႈ ရတ်ႈသျႃး လၢတ်ႈဝႃႈ ၵူၼ်းယူႇၶရဵၼ်းၶဝ်ၼႆႉ ပဵၼ်တႃႇလႅၵ်ႈလၢႆႈ ၵူၼ်းသိုၵ်းရတ်ႈသျႃး 103 ၵေႃႉ ဢၼ်ထုၵ်ႇတီႉၺွပ်း မိူဝ်ႈၽွင်း ၶဝ်ႈတိုၵ်း ၼႃႈလိၼ် Kursk မိူင်းရတ်ႈသျႃး မိူဝ်ႈလိူၼ်ဢေႃးၵၢတ်ႉၼၼ်ႉၼႆယဝ်ႉ။ ၵၢၼ်လႅၵ်ႈလၢႆႈၵူၼ်းတူၵ်းၶွၵ်ႈၼႆႉ ပဵၼ်မိူင်းႁူမ်ႈတုမ် ၸဝ်ႈၾႃႉ ဢႃႇရၢပ်ႈ ႁဵတ်းပဵၼ်တူဝ်ယူႇၵၢင်သေ တႄႇဢဝ်ပီ 2024 ၼႆႉ ပဵၼ်ပွၵ်ႈၵမ်း 8 ၼႆ သိုဝ်ႇၶၢဝ်ႇလူင်ပွင်ၸိုင်ႈ မိူင်းႁူမ်ႈတုမ် ၸဝ်ႈၾႃႉ ဢႃႇရၢပ်ႈ WAM ဢွၵ်ႇၶၢဝ်ႇဝႆႉၼင်ႇၼႆ။

ဝၢႆးသေ ရတ်ႈသျႃး ၶဝ်ႈတိုၵ်း ယူႇၶရဵၼ်း မိူဝ်ႈလိူၼ်ၾႅပ်ႇဝႃႇရီႇ 2022 ၼၼ်ႉ သွင်ၽၢႆႇ ၵႆႉၵႆႉ လႅၵ်ႈလၢႆႈ ၵူၼ်းတူၵ်းၶွၵ်ႈၵၼ်သေ မိူဝ်ႈဝၼ်းဢႃးတိတ်ႉၼၼ်ႉ ပဵၼ်ပွၵ်ႈၵမ်းသၢမ် ဝၢႆးသေ ယူႇၶရဵၼ်းၶဝ် ၶဝ်ႈတိုၵ်း ၼႃႈလိၼ် ရတ်ႈသျႃး မိူဝ်ႈႁူဝ်လိူၼ်ဢေႃးၵၢတ်ႉသေ တွပ်ႇတႅၼ်းၶိုၼ်းၼၼ်ႉယဝ်ႉ။

ၼႂ်းပၢင်တိုၵ်းၼၼ်ႉ တီႉၺွပ်းလႆႈ ၵူၼ်းသိုၵ်းရတ်ႈသျႃး ဢမ်ႇယွမ်း 600 ၵေႃႉသေ ၽူႈမီးပုၼ်ႈၽွၼ်း ယူႇၶရဵၼ်းၶဝ် လၢတ်ႈဝႃႈ တေၸွႆႈထႅမ် တႃႇတေလႅၵ်ႈလၢႆႈ ၵူၼ်းသိုၵ်း ယူႇၶရဵၼ်း ဢၼ်ရတ်ႈသျႃးၶဝ် တီႉၺွပ်းလႆႈၼၼ်ႉၼႆယဝ်ႉ။ ၽူႈမီးပုၼ်ႈၽွၼ်း ၽၢႆႇၵူတ်ႇထတ်း မိူင်းယူႇၶရဵၼ်း Dmytro Lubinets လၢတ်ႈဝႃႈ တေႃႇထိုင်ယၢမ်းလဵဝ် ၵူၼ်းမိူင်းယူႇၶရဵၼ်း ဢၼ်လႆႈႁဵတ်းလွင်ႈလႅၵ်ႈလၢႆႈ ၵူၼ်းတူၵ်းၶွၵ်ႈ တႃႇ 57 ၵမ်းၼၼ်ႉ ပွၵ်ႈမႃးၶိုၼ်း မီး 3,672 ၵေႃႉ ၼႆယဝ်ႉ။


ငိူၼ်ႈငဝ်ႈၶၢဝ်ႇ

Retrieved from "https://incubator.wikimedia.org/w/index.php?title=Wn/shn/မိူင်းယူႇၶရဵၼ်း_-_မိူင်းရတ်ႈသျႃး_လႅၵ်ႈလၢႆႈ_ၵူၼ်းတူၵ်းၶွၵ်ႈ_206_ၵေႃႉ&oldid=6379799"