Wn/shn/ပေႃးတေဢုပ်ႇ လွင်ႈႁူမ်ႇလူမ်ႈ တင်းၵၢၼ်ႇ ရတ်ႈသျႃးတုၵ်းယွၼ်း ႁႂ်ႈပႃးယူႇၶရဵၼ်း

ဝၼ်းသဝ်၊ ၸုၼ်ႇ 22၊ 2024 

Dmitry Peskov ၽူႈမီးသုၼ်ႇလၢတ်ႈ လူင်ပွင်ၸိုင်ႈရတ်ႈသျႃး

မိူဝ်ႈဝၼ်းသုၵ်းၼၼ်ႉ Dmitry Peskov ဢၼ်ပဵၼ် ၽူႈမီးသုၼ်ႇလၢတ်ႈ လူင်ပွင်ၸိုင်ႈရတ်ႈသျႃး လႆႈမွၵ်ႇလၢတ်ႈဝႃႈ ၽၢႆႇရတ်ႈသျႃး ပဵၼ်ဢၼ်တူဝ်ႈတၼ်း တႃႇဢုပ်ႇဢူဝ်း တင်းဢမႄႇရိၵၢၼ်ႇ ဢၼ်ၵဵဝ်ႇၵပ်း လွင်ႈႁူမ်ႈလူမ်ႈ ဝႃႈၼႆယဝ်ႉ။ ၵူၺ်းၵႃႈဝႃႈ တီႈပၢင်ဢုပ်ႇဢူဝ်းလႂ်သေဢမ်ႇဝႃႈ တေလႆႈဢုပ်ဢူဝ်းပႃး လွင်ႈဢၼ် ဢမႄႇရိၵၢၼ်ႇ ၶဝ်ႈပႃးၵမ်းသိုဝ်ႈတီႈ လွင်ႈသုၵ်ႉယုင်ႈ ဢၼ်ပဵၼ်ယူႇတီႈ ယူႇၶရဵၼ်းၼၼ်ႉ ဝႃႈၼႆယဝ်ႉ။

Peskov လၢတ်ႈၵႂႃႇတီႈ ပၢင်ၸႅင်ႈၶၢဝ်ႇ မိူဝ်ႈဝၼ်းသုၵ်းၼၼ်ႉဝႃႈ တီႈၼႂ်းၵႄႈ မိူင်းဢမႄႇရိၵၢၼ်ႇ လႄႈ ရတ်ႈသျႃး ၼႆႉ လူဝ်ႇ လွင်ႈဢုပ်ႇဢူဝ်းၼင်ႇၼႆတႄႉတႄႉ၊ ဢၼ်ၼႆႉၼႆႉ မၼ်းလႆႈပဵၼ်မႃးပၼ်ႁႃ ပဵၼ်ၵေႃႇပဵၼ်ၵွင်သေ၊ မၼ်းမီးပၼ်ႁႃ ဢၼ်ၵဵဝ်ႇၵပ်းလူၺ်ႈ ၵၢၼ်ၵေႃႇသၢင်ႈ လွင်ႈႁူမ်ႇလူမ်ႈၵမ်ႇၽႃႇ ဝႃႈၼႆယဝ်ႉ။

ၵဵဝ်ႇၵပ်းလူၺ်ႈ ၶေႃးထၢမ် ဢၼ်ဝႃႈ လိူဝ်သေ ပၢင်တိုၵ်းယူႇၶရဵၼ်း၊ ၵဵဝ်ႇၵပ်းလူၺ်ႈ ၽေး ဢၼ်တေၸၢင်ႈပဵၼ်မႃးလႆႈ ပၢင်တိုၵ်းၼိဝ်ႇၵလီးယႃးၼၼ်ႉသေ ၸွင်ႇမီး တႃႇဢုပ်ႇဢူဝ်းၵၼ်တင်း ဢမႄႇရိၵၢၼ်ႇ ဢၼ်ဝႃႈၼၼ်ႉသေ Peskov လႆႈတွပ်ႇၶိုၼ်းမႃးၼင်ႇၼႆယဝ်ႉ။

ၵဵဝ်ႇၵပ်းလူၺ်ႈ ဢၼ် Peskov လၢတ်ႈဝႃႈ ဢမႄႇရိၵၢၼ်ႇ လႆႈၶဝ်ႈၵွင်ႉၵၢႆႇပႃး တီႈ ယူႇၶရဵၼ်းဢၼ်ဝႃႈၼၼ်ႉ ၽၢႆႇဢမႄႇရိၵၢၼ်ႇ လႄႈ Jens Stoltenberg ဢၼ်ပဵၼ် ၽူႈၼမ်းၼႂ်းၵူႈလွင်ႈလွင်ႈ ၸုမ်းၼေႇတူဝ်းၶဝ် ဢမ်ႇယွမ်းႁပ်ႉမႃး။ ၶဝ်ပၢၵ်ႈပႅတ်ႈ လွင်ႈမွၵ်ႇလၢတ်ႈဝႃႈ ၶဝ်ႈၵွင်ႉၵၢႆႇပႃးၵမ်းသိုဝ်ႈ ဢၼ်ဝႃႈၼၼ်ႉ မၼ်းပဵၼ် လွင်ႈပၼ်တၢင်းၸွႆႈထႅမ် ၶိူင်ႈလၢၵ်ႈၼၢၵ်ႈ တႃႇယူႇၶရဵၼ်း ၵႅတ်ႇၵင်ႈမိူင်းမၼ်း တီႈ ရတ်ႈသျႃးၶဝ် ၶဝ်ႈတိုၵ်းၼၼ်ႉယဝ်ႉ။

မိူဝ်ႈဝၼ်းၽတ်းၼၼ်ႉ ရတ်ႈသျႃးၶဝ် ဢဝ်မၢၵ်ႇမိသ်ႉသၢႆး၊ ဢဝ်တရူၼ်းသေ တိုၵ်းတေႃး ႁူင်းၸၢၵ်ႈပၼ်ၾႆးၾႃႉ ယူႇၶရဵၼ်း တင်းၶိုၼ်းလႄႈ ဢမႄႇရိၵၢၼ်ႇ လႆႈပိုၼ်ၽၢဝ်ႇဝႃႈ တေဢဝ် မၢၵ်ႇမိသ်ႉသၢႆးၵႅတ်ႇၵင်ႈၵၢင်ႁၢဝ် ဢၼ်ႁႅင်းယႂ်ႇၼၼ်ႉ သူင်ႇပၼ် ယူႇၶရဵၼ်းၼႆယဝ်ႉ ထႅင်ႈဝၼ်းၼိုင်ႈ Petrov ၸင်ႇလႆႈလၢတ်ႈမႃးၼင်ႇၼႆယဝ်ႉ။

မိူဝ်ႈဝၼ်းၽတ်းၼၼ်ႉ John Kirby ဢၼ်ပဵၼ် ၽူႈမီးသုၼ်ႇလၢတ်ႈ ႁိူၼ်းၵႅဝ်ႈၶၢဝ်ၸဝ်ႈၸွမ်ၸိုင်ႈ မွၵ်ႇလၢတ်ႈဝႃႈ တေဢဝ် Patriot လႄႈ NASAMS ဢၼ်လုၵ်ႉၼိူဝ်လိၼ် ပိုတ်းယိုဝ်းၶိုၼ်ႈၵၢင်ႁၢဝ် ဢၼ်ႁဵတ်းဢွၵ်ႇလိုၼ်းသုတ်းၼႆႉ သူင်ႇပၼ် ယူႇၶရဵၼ်း ဝႃႈၼႆယဝ်ႉ။ ယၢမ်းၼၼ်ႉၼင်ႇၵဝ်ႇ ၵၢဝ်းလီၸၢၼ်းၵေႃႈ လၢတ်ႈဝႃႈ တိုၵ်ႉဝူၼ်ႉတႃႇဢဝ်ၶိူင်ႈလၢၵ်ႈၼၢၵ်ႈ ပၼ်ယူႇၶရဵၼ်းၼႆလႄႈ ၸဝ်ႈၸွမ်ၸိုင်ႈရတ်ႈသျႃး ဝလႃႇၻီႇမီႇရ် ပူႇထိၼ်ႇ ဢၼ်ဢွၵ်ႇၶၢဝ်းတၢင်းထိုင် ဢေးသျႃးယူႇၼၼ်ႉ မွၵ်ႇလၢတ်ႈဝႃႈ ယႃႇပေႁႂ်ႈပၼ် ဝႃႈၼႆယဝ်ႉ။

ငိူၼ်ႈငဝ်ႈတိုၼ်း

• Reuters. "Russia tells US: we need to talk, but Ukraine must be on agenda" — Reuters, June 22, 2024
• huaxia. "Russia open to dialogue with U.S. amid global security concerns" — Xinhua, June 21, 2024
• Reuters. "Russia 'open to dialogue' with US, but says Ukraine must be on agenda" — India Today, June 22, 2024