ဝၼ်းၸၼ်၊ မၢတ်ႉၶျ် 25၊ 2024
.svg)
ထၢၼ်ၵၢၼ်ၼွၵ်ႈမိူင်း ၾရၢင်ႇသဵတ်ႈ လႆႈမွၵ်ႇလၢတ်ႈမိူဝ်ႈဝၼ်းဢႃးတိတ်ႉၼၼ်ႉဝႃႈ တွၼ်ႈတႃႇႁွင်ႉဢွၵ်ႇ ၵူၼ်းမိူင်းၾရၢင်ႇသဵတ်ႈ ၸိူဝ်းၶမ်ယူႇတီႈၼႂ်းၵႄႈ လွင်ႈသုၵ်ႉယုင်ႈၼႂ်းမိူင်းႁေးတီႇၼၼ်ႉ တေပွႆႇ ႁိူၼ်းမိၼ်ၶိုၵ်ႉတွၼ်းၵႂႃႇ ဝႃႈၼႆယဝ်ႉ။ ယွၼ်ႉပိူဝ်ႈ လွင်ႈသုၵ်ႉယုင်ႈၵၢၼ်မိူင်းလႄႈ ၶပ်ႉမၢႆသၢႆၵၢၼ်မိၼ် ဢၼ်မိၼ်ၸူး ဝဵင်းလူင် Port-au-Prince ၼၼ်ႉ လႆႈၵိုတ်းလိုဝ်ႈၵႂႃႇလႄႈ လူင်ပွင်ၸိုင်ႈၾရၢင်ႇသဵတ်ႈ ၸင်ႇလႆႈပိုၼ်ၽၢဝ်ႇၸိူင်ႉၼင်ႇၼႆယဝ်ႉ။
ႁူမ်ႈဝႃႈသၢႆငၢႆမၼ်း ႁၢႆႉမႃးသေတႃႉ လုမ်းၽွင်းၾရၢင်ႇသဵတ်ႈ တီႈ ဝဵင်း Port-au-Prince ၼၼ်ႉတႄႉ တေသိုပ်ႇပိုတ်ႇဝႆႉသေ ၸိူဝ်းပဵၼ် ၽူႈႁၢပ်ႇၵၢၼ်လုမ်းၽွင်းၶဝ် တိုၵ်ႉသိုပ်ႇၸွႆႈထႅမ် တူင်ႇဝူင်းၾရၢင်ႇသဵတ်ႈ ၸိူဝ်းမီးယူႇတီႈၼႂ်းမိူင်းၼၼ်ႉ ဝႃႈၼႆယဝ်ႉ။ ၵူၼ်းမိူင်းၾရၢင်ႇသဵတ်ႈ ဢၼ်ယူႇသဝ်းယူႇတီႈ မိူင်းႁေးတီႇၼၼ်ႉ မီးယူႇ မွၵ်ႈ 1,100 ၵေႃႉၼႆႉသေ ၵမ်ႉပႃႈၼမ်တႄႉ ပဵၼ်ၵူၼ်းၸိူဝ်းဢၼ်ႁပ်ႉပဵၼ် ၵူၼ်းမိူင်း သွင်မိူင်းၼႆ တီႈ ထၢၼ်ၵၢၼ်ၼွၵ်ႈမိူင်း ၾရၢင်ႇသဵတ်ႈ လႆႈမွၵ်ႇလၢတ်ႈဝႃႈၼႆ။
ႁိူၼ်းမိၼ်ၶိုၵ်ႉတွၼ်း ဢၼ်တေတႄႇပွႆႇ တီႈ ဝၼ်းဢႃးတိတ်ႉၼၼ်ႉ လုၵ်ႉတီႈ ထၢၼ်ၽွင်းလူင် ၵၢၼ်ၵႅတ်ႇၵင်ႈ ၾရၢင်ႇသဵတ်ႈ တေဢဝ်ပုၼ်ႈၽွၼ်း ၸတ်းၵၢၼ်ၵႂႃႇ ဝႃႈၼႆယဝ်ႉ။ ထၢၼ်ၵၢၼ်ၼွၵ်ႈမိူင်း ပၼ်တၢင်းၶႆႈၸႂ်ဝႆႉတႄႉ ၸိူဝ်းဢၼ်ၶႂ်ႈ ဢွၵ်ႇတီႈၼႂ်းမိူင်းႁေးတီႇၼၼ်ႉ ႁႂ်ႈၵပ်းသိုပ်ႇတိတ်းတေႃႇၵၼ်တင်း လုမ်းၽွင်းသေ ႁူဝ်ၼပ်ႉၵူၼ်း မီးၵႃႈႁိုဝ် ဢၼ်ဝႃႈၼၼ်ႉတႄႉ ဢမ်ႇလႆႈမွၵ်ႇလၢတ်ႈဝႆႉၼင်ႇၵဝ်ႇ။ တွၼ်ႈလင်လိူၼ်ၾႅပ်ႇဝႃႇရီႇၼၼ်ႉ တီႈ ဝဵင်း Port-au-Prince ၼႆႉ လႆႈတႄႇ ပၢင်တိုၵ်းတီႈၼိူဝ်တၢင်းမႃး ႁၢၼ်ႉတေႃႇထိုင် ယၢမ်းလဵဝ်သေ ၸွမ်ၽွင်းလူင် Ariel Henry ၵေႃႈ လႆႈထွၼ်ဢွၵ်ႇတႃၶုၼ်ႈ မိူဝ်ႈတွၼ်ႈၸဝ်ႉလိူၼ်မၢတ်ႉၶ်ျၼႆႉယဝ်ႉ။
ၸွမ်းၼင်ႇ ၸုမ်းယိပ်းၵွင်ႈၵၢင် ၸိူဝ်းၵုမ်းၵမ်ဝႆႉ ဝဵင်းလူင်ၵမ်ႉၼၼ်ၼၼ်ႉ ဢွၼ်ၵၼ်တုၵ်းယွၼ်းလႄႈ ၸွမ်ၽွင်းလူင် လႆႈထွၼ်တူဝ်ဢွၵ်ႇမႃးသေတႃႉ လွင်ႈၵေႃႇၵၢၼ်ႁၢႆႉတႄႉ ဢမ်ႇႁၼ်ယွမ်းမႃး။ ၽွင်းမိူဝ်ႉတိုၵ်ႉပဵၼ်ၶၢဝ်းယၢမ်း ဢၼ်ပႂ်ႉ တႃႇၽွတ်ႈႁႅၼ်း လူင်ပွင်ၸိုင်ႈမႂ်ႇ ၶၢဝ်းလႅၵ်ႈလၢႆႈၼၼ်ႉ တီႈမိူင်းႁေးတီႇၼၼ်ႉ လႆႈထူပ်းတၢင်းယၢပ်ႇၽိုတ်ႇ ဢၼ်ဢမ်ႇမီးၶဝ်ႈၼမ်ႉတၢင်းၵိၼ်ၼၼ်ႉယဝ်ႉ။
ငိူၼ်ႈငဝ်ႈတိုၼ်း edit
- Agence France-Presse. "France to Offer Evacuation Flights for Vulnerable Citizens in Haiti" — VOA News, March 24, 2024
- VOA News. "ဟေတီနိုင်ငံရောက် ပြင်သစ်နိုင်ငံသားတွေကယ်ထုတ်ဖို့ အထူးလေယာဉ်စေလွှတ်မည်" — VOA News, March 25, 2024
